ފެނަކައިގެ ކުރީގެ ޕްރޮކިއުމަންޓް ހެޑް ދީނާގެ މައްޗަށް ކޮރަޕްޝަންގެ ކުށް ސާބިތުކޮށްފި

ފެނަކަ ކޯޕަރޭޝަނުގައި 2018 ވަނަ އަހަރު ހިންގި ކޮރަޕްޝަންގެ މައްސަލައިގައި އެ ކުންފުނީގެ އޭރުގެ ޕްރޮކިއުމަންޓް ހެޑް މަރިޔަމް ދީނާގެ މައްޗަށް ކުށް ސާބިތުވާ ކަމަށް ކްރިމިނަލް ކޯޓުން އާދީއްތަ ދުވަހު ކަނޑައަޅައިފިއެވެ.

ދީނާ އާއި ފެނަކައިގެ ކުރީގެ މެނޭޖިން ޑިރެކްޓަރު އަހުމަދު ސައީދުގެ މައްޗަށް ދައުލަތުން ދައުވާ އުފުލީ ރަސްމީ ހައިސިއްޔަތު ނާޖާއިޒު ގޮތުގައި ބޭނުންކުރުމުގެ ކުށުގައެވެ. ފެނަކައާއި ބްލޭޒަން އިންކް ކުންފުންޏާ ދެމެދު ވެފައިވާ އެއްބަސްވުމެއްގެ ދަށުން، ބްލޭޒަން އިންކުން މަސައްކަތް ފުރިހަމަ ނުކުރަނީސް އެ ކަން ނިމުނުކަން ކަށަވަރު ނުކޮށް ފައިސާ ދޫކުރި ކަމާއި، މަސައްކަތް ނުނިމެނީސް އިތުރު އެއްބަސްވުމެއް ހެދިކަން ތަހުގީގަށް ފާހަގަވެފައިވެއެވެ.

ދީނާގެ މައްޗަށް ކުށް ސާބިތުވި ނަމަވެސް އަދި ހުކުމެއް ނީއްވައެވެ. އަދަބު ކަނޑައެޅުން އޮންނާނީ ކުރިއަށް އޮންނަ އަޑުއެހުމެއްގައެވެ. މިއީ ހަމަ މި މައްސަލައިގައި ސައީދަށް ހަތަރު އަހަރުގެ ޖަލު ހުކުމެއް އިއްވިތާ ގާތްގަނޑަކަށް އެއް އަހަރު ފަހުން ނިންމި ނިންމުމެކެވެ.

ސައީދަށް ހުކުމް އިއްވެވި ކްރިމިނަލް ކޯޓުގެ އިސް ގާޒީ އާދަމް މުހައްމަދު އެ ދުވަހު ވިދާޅުވެފައި ވަނީ "ދައުލަތުގެ ކުންފުނިތަކުގައި ކޮރަޕްޝަން ހިންގުމާއި ރައްޔިތުންގެ ފައިސާއަށް ހިޔާނާތްތެރިވުން އާންމުވެފައިވާ" ކަމަށެވެ. އެ ފަދަ އަމަލުތައް ހިންގާ ފަރާތްތަކަށް ދެވޭ އަދަބު ކުޑަވުމަކީ ކޮރަޕްޝަނަށް ލިބޭ ހިތްވަރެއް ކަމުން ގާނޫނުގައިވާ އެންމެ ހަރުކަށި އަދަބު ދޭންޖެހޭ ކަމަށް ގާޒީ ވިދާޅުވެފައިވެއެވެ.

ދީނާއަށް އަދަބު ކަނޑައެޅުމުގެ އަޑުއެހުމެއް ކުރިއަށް އޮތް ދުވަސްތަކުގެ ތެރޭގައި ކްރިމިނަލް ކޯޓުގައި ބާއްވާނެއެވެ.