ފުއްގިރި މައްސަލައިގެ ހުކުމް މި މަހުގެ 29 ގައި އިއްވުމަށް ތާވަލުކޮށްފި

ރ. ފުއްގިރި ކުއްޔަށް ދޫކުރުމުގެ މުޢާމަލާތާ ގުޅިގެން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް އުފުލާފައިވާ މަނީ ލޯންޑަރިންގ އަދި ރިޝްވަތު ޤަބޫލުކުރުމުގެ ކުށުގެ ދައުވާތަކުގެ ޝަރީޢަތް ނިންމައި، ހުކުމް އިއްވުން މި އޮކްޓޫބަރު މަހުގެ 29 ވަނަ ދުވަހަށް ކްރިމިނަލް ކޯޓުން ތާވަލުކޮށްފިއެވެ.

އިއްޔެ ކްރިމިނަލް ކޯޓުގައި ބޭއްވީ ދިފާޢީ ފަރާތުން ޚުލާޞާ ބަޔާން ހުށަހެޅުމަށް ބޭއްވި އަޑުއެހުމެކެވެ. ދައުލަތުގެ ޚުލާޞާ ބަޔާން އިއްވާފައިވަނީ މިދިޔަ ހޯމަ ދުވަހުއެވެ. ގާތްގަނޑަކަށް ތިން ގަޑިއިރަށް ދެމިގެންދިޔަ މި އަޑުއެހުމުގައި ރައީސް ޔާމީންގެ ދިފާޢީ ވަކީލުންގެ ޓީމާއި އެމަނިކުފާނު އަމިއްލަފުޅަށް ވެސް ދައުލަތުގެ ދައުވާތަކަށް ރައްދު ދެއްވާފައިވެއެވެ.

ދިފާޢީ ޚުލާޞާ ބަޔާން ފެށުމުގެ ގޮތުން ވަކީލު ހަމްޒާ ލަތީފް ވިދާޅުވީ ފުއްގިރި ޓޫރިޒަމަށް ތަރައްޤީކުރަން ހުޅުވައިލީ ކާކު، ކޮން އިރަކު ކަން ވެސް ދައުލަތަށް ސާބިތުކޮށްދެވިފައި ނުވާ ކަމަށެވެ. އޭނާ ފާހަގަކުރެއްވި ގޮތުގައި، ބިޑަކާ ނުލައި ދައުލަތުގެ ހިއްސާ އޮންނަ ކުންފުންޏަކަށް ރަށް ދޫކުރެވޭ އުޞޫލު އޮންނައިރު، ކްލެސިކް ހޯލްޑިންގްސްއާ މެދު އެއްވެސް ތަޙުޤީޤެއް ހިންގާފައި ނުވާ ކަމަށާއި، އެ ކުންފުންޏާ މެދު ކަން ހިނގި ގޮތުން ޔާމީނާ އެއްކޮޅަށް ހެކި ލިބޭ ކަމަށެވެ. ހަމައެހެންމެ ސަން ކުންފުންޏާ އެކު ކުރި ޑޮލަރުގެ މުޢާމަލާތުގައި އެ ކުންފުނީގެ މައްޗަށް ކުށެއް ސާބިތުނުވުމަކީ ވެސް ޔާމީންގެ މައުސޫމުކަން ސާބިތުވާ ކަމެއް ކަމަށް ވިދާޅުވިއެވެ. މީގެ އިތުރުން ދައުލަތުގެ މައިގަނޑު ހެކިންގެ ގޮތުގައި ބޭނުންކުރާ ކުރީގެ ނައިބު ރައީސް އަޙުމަދު އަދީބާއި އެމްއެމްޕީއާރުސީގެ ކުރީގެ މެނޭޖިންގ ޑިރެކްޓަރު ޢަބްދުﷲ ޒިޔަތަކީ އަދަބު ލުއިކޮށްދީގެން ހެކިބަސް ނަގާފައިވާ ދެ ފަރާތް ކަމަށާއި، ސުޕްރީމް ކޯޓުން ވެސް އެ ދެ މީހުންގެ ހެކިބަހާ މެދު ސުވާލު އުފައްދާފައިވާ ކަމަށް ހަމްޒާ ވިދާޅުވިއެވެ. އަދީބު ހެކި އުފައްދާފައިވާ ކަމަށާއި، ފަސް އަހަރު ފާއިތުވީ އިރު ވެސް މި މައްސަލައިގައި ދައުލަތަށް މިނިވަން ހެއްކެއް ހުށަހެޅިފައި ނުވާ ކަމަށް ވެސް ވިދާޅުވިއެވެ. މައްސަލައިގައި ދައުވާ ލިބުނު ކްރިކް ރިޒާގެ މައްސަލަ އަނބުރާ ގެންދިޔަ ސަބަބު ދައުލަތަށް ބުނެދެވިފައި ނުވާ ކަމަށާއި، ރިޒާގެ ބަޔާނުގައި ވެސް ޔާމީނާ ދުވަހަކު ވެސް މަޝްވަރާ ނުކުރާ ކަމަށް ބުނެފައިވާކަން ހަމްޒާ ފާހަގަކުރެއްވިއެވެ.

ދިފާޢީ ބަޔާނުގެ ދެވަނަ ބައި ހުށަހެޅުއްވި އިސް ވަކީލު ޑރ. މުޙައްމަދު ޖަމީލު އަޙުމަދު ވިދާޅުވީ، ރައީސް ޔާމީނާ ދެކޮޅަށް އެއް ވާޤިޢާއެއް ނުވަތަ ހެއްކެއް ވެސް އެކަށީގެންވާ ޝައްކެއް ނެތް މިންވަރަށް ދައުލަތަށް ސާބިތުކޮށްދެވިފައި ނުވާ ކަމަށެވެ. ރިޝްވަތު ހިފިކަމާއި ނުފޫޒު ފޯރުވި ކަމުގެ ޢުންޞުރުތައް ސާބިތުނުކޮށް، ހީތަކެއްގެ މައްޗަށް ދައުވާ ބިނާކޮށްފައިވާ ކަމަށް ވެސް ޑރ. ޖަމީލު ވިދާޅުވިއެވެ. އެމަނިކުފާނު ވިދާޅުވި ގޮތުގައި އަދީބާއި ޒިޔަތަކީ ދެ ފާސިޤުން ކަމަށާއި، އެ ދެ މީހުންގެ ހެކިބަސް ބަލައިނުގަނެވޭނެ ކަމަށެވެ. މިއީ ސިޔާސީ ދައުވާއެއް ކަމަށް ޑރ. ޖަމީލު ސިފަކުރެއްވިއެވެ. ވަކީލު ފަލާޙު ހުށަހެޅުއްވި ބައިގައި 78 މިލިއަން ޑޮލަރުގެ ލީސްއެއްގެ ވާހަކަ ދައްކާ އިރު، އެ ފައިސާ ހޯދަން ދައުލަތުން މަސައްކަތް ނުކުރާ ސަބަބާ މެދު ސުވާލު އުފެއްދެވިއެވެ.

ރައީސް ޔާމީން ވެސް މި އަޑުއެހުމުގައި ވާހަކަފުޅު ދެއްކެވިއެވެ. އެމަނިކުފާނު ވިދާޅުވީ "އަދުލުވެރި ހުކުމަކާ ހަމައަށް ދެވޭނީ އަދުލުވެރި ޝަރީޢަތެއް ހިންގައިގެން" ކަމަށެވެ. ފުއްގިރި މައްސަލަ ނިމިފައިވަނީ އެމަނިކުފާނުގެ ވެރިކަމުގެ ކުރިން ކަމަށާއި، ކުންފުންޏަކުން ގޯހެއް ހަދައިފައިވާ ނަމަ ޒިންމާ ނަގަން ޖެހޭނީ ބޯޑާއި ފައިނޭންޝަލް ކޮންޓްރޯލަރު ކަމަށް ވެސް ވިދާޅުވިއެވެ. ސިޔާސީ މީހުންނަށް ލިބޭ ހުރިހާ ފައިސާއަކީ ޕާޓީއަށް ޖަމާކުރަން ޖެހޭ އެއްޗެއް ނޫން ކަމަށާއި، ގޭގައި ފައިސާ ބެހެއްޓުމަކީ މަނާ ކަމެއް ނޫން ކަމަށް ވިދާޅުވެ، ދައުލަތުން މައްސަލަ ބިނާކޮށްފައިވަނީ ޚިޔާލީ ވާހަކަތަކެއްގެ މައްޗަށް ކަމަށް ވެސް އެމަނިކުފާނު ވިދާޅުވިއެވެ.

ދެ ފަރާތުގެ ޚުލާޞާ ބަޔާން ނިމުމާ އެކު، މައްސަލަ ބައްލަވާ ޤާޟީ ޢަލީ ނަދީމް ވަނީ ޝަރީޢަތުގެ އަޑުއެހުންތައް ނިމުނީ ކަމަށް އިޢުލާނުކުރައްވައިފައެވެ. ހުކުމް އިއްވުމުގެ މަޖިލިސް ބާއްވާނީ މި މަހުގެ 29 ވާ ބުރާސްފަތި ދުވަހުގެ ހެނދުނު 11:00 ގައި ކަމަށް ޤާޟީ އިޢުލާނުކުރެއްވިއެވެ.