މާލެއާއި ވިލިމާލޭގެ 14 ބިމެއް ކައުންސިލުގެ އިޚްތިޞާޞުން ވަކިކޮށް ސަރުކާރުގެ ދަށަށް ބަދަލުކޮށްފި

މާލެ ސިޓީ ކައުންސިލުގެ ބެލުމުގެ ދަށުގައި ހުރި މާލެއާއި ވިލިމާލޭގެ 14 ބިމެއް ސަރުކާރުގެ ކަމާ ބެހޭ މިނިސްޓްރީގެ ދަށަށް ބަދަލުކޮށް، އެ ބިންތަކުގައި ހިންގާނެ މަޝްރޫޢުތަކުގެ ތަފްޞީލު އިމާރާތްކުރުމާއި ގެދޮރުވެރިކަމާއި ބިނާރާ ބެހޭ މިނިސްޓްރީން މިއަދު ހާމަކޮށްފިއެވެ.

އެ މިނިސްޓްރީން ބުނީ ލާމަރުކަޒީ ޤާނޫނުގެ ދަށުން މި ނިންމުން ނިންމީ ރައްޔިތުންނަށް ބޭނުންވާ ޢުމްރާނީ ތަރައްޤީގެ މަޝްރޫޢުތައް ހިންގުމާއި އަސާސީ ޚިދުމަތްތައް ހަރުދަނާ ގޮތެއްގައި ފޯރުކޮށްދިނުމުގެ ބޭނުމުގައި ކަމަށެވެ. ކޮންމެ ބިމެއް ބޭނުންކުރާނެ ގޮތުގެ ޕްލޭންތައް ސަރުކާރުގެ ގެޒެޓުގައި މިހާރު ޝާއިޢުކޮށްފައިވެއެވެ.

ސަރުކާރުން ރާވާފައިވާ ގޮތުން ސަލްޓަން ޕާކާއި މިއުޒިއަމް ސަރަޙައްދުގައި އީ-ސްޕޯޓްސް އެރީނާއަކާއި މިއުޒިއަމް ޕާކެއް ޤާއިމުކުރާނެއެވެ. މަސް މާރުކޭޓު ހުރި ބިމުގައި އޮފީސްތަކާއި ވިޔަފާރިތަކަށް ޚާއްޞަ ޢިމާރާތެއް އަޅާއިރު، ލޯކަލް މާރުކޭޓު ހުރި ތަނުގައި ޒަމާނީ ބޮޑު މާރުކޭޓު ކޮމްޕްލެކްސްއެއް ތަރައްޤީކުރާނެއެވެ. ދަތުރުވެރިންގެ މާރުކޭޓު ހުރި ބިމުގައި އެކި ބޭނުންތައް ހިމެނޭ ވިޔަފާރި މަރުކަޒެއް ހެދުމަށް ވެސް ވަނީ ނިންމައިފައެވެ.

މީގެ އިތުރުން ކުރީގެ ވިޔަފާރިވެރިންގެ ޖަމްޢިއްޔާ ހިންގި ބިމުގައި ޑޭ-ކެއާ ސެންޓަރަކާއި ކުޑަކުދިންގެ ޙަރަކާތްތަކަށް ޚާއްޞަ މަރުކަޒެއް ބިނާކުރާ ގޮތަށް ވަނީ ހަމަޖައްސައިފައެވެ. ކުރީގެ ހަކަތަ ޕެޓްރޯލް ޝެޑް ހުރި ބިމުގައި އިލެކްޓްރިކް ވެހިކަލް ޗާޖުކުރާ މަރުކަޒެއް ޤާއިމުކުރާނެއެވެ. ބޮނޑިބަތް ޕާކު ހުރި ބިމުގައި ޕާކިން ޢިމާރާތަކާއި ވިޔަފާރި ޚިދުމަތްތައް ހިމެނޭ ފެސިލިޓީއެއް ތަރައްޤީކުރާއިރު، އާޓިފިޝަލް ބީޗު ޢާންމުންގެ މުނިފޫހިފިލުވުމުގެ ޙަރަކާތްތަކަށް ޚާއްޞަކުރާނެއެވެ. ރަސްފަންނު ސަރަޙައްދު ހިންގުމާއި ބެލެހެއްޓުން ސީދާ ސަރުކާރުގެ ދަށަށް ގެންނަ ގޮތަށް ނިންމާފައިވާ އިރު، ތައިސޭކޮށީގެ ހުސް ބިންތައް ތަރައްޤީގެ މަޝްރޫޢުތަކުގެ ވޯކް ސައިޓެއްގެ ގޮތުގައި ބޭނުންކުރާނެއެވެ. މަސްވެރިންގެ މައިޒާން އެމްޑަބްލިއުއެސްސީގެ ޕަމްޕް ސްޓޭޝަނެއްގެ ގޮތުގައި ދެމެހެއްޓުމަށާއި ޕޭ ޓޮއިލެޓް 2 ހުރި ބިމުގައި ޒަމާނީ ފެންވަރުގެ ޢާންމު ފާޚާނާއެއް ޤާއިމުކުރުމަށް ވެސް ވަނީ ކަނޑައަޅައިފައެވެ. ކާނިވާ ކެފޭ ޕާކިން އޭރިއާ ބޭނުންކުރާ ގޮތަށް ހަމަޖެހިފައި ވަނީ މުނިފޫހިފިލުވުމާއި ވިޔަފާރި ބޭނުމަށެވެ. ސިޓީ ކައުންސިލް އެކޮމޮޑޭޝަން ހުރި ބިން ކަނޑައަޅާފައި ވަނީ ލޭބާ އެކޮމޮޑޭޝަން އެންޑް ސްޓޯރޭޖް ފެސިލިޓީއެއްގެ ގޮތުގައެވެ.

ހުސްކޮށް ހުރި ބިންތަކުން ރައްޔިތުންނަށް އެންމެ ފައިދާހުރި މަންފާއެއް ހޯދައިދިނުމާއި ޕާކުތައް ދެމެހެއްޓެނިވި ގޮތެއްގައި ތަރައްޤީކޮށް ބެލެހެއްޓުމުގެ މަޤްޞަދުގައި ނިންމި ނިންމުމެއް ކަމަށް ސަރުކާރުން ބުނެފައިވެއެވެ. މި މަޝްރޫޢުތަކާ ގުޅޭ ގޮތުން ޚިޔާލެއް ނުވަތަ ޝަކުވާއެއް ހުށަހެޅުމަށް ބޭނުންވާ ފަރާތްތަކަށް ކުރިއަށް އޮތް ދެ ހަފުތާގެ ތެރޭގައި ލިޔުމުން އެ މިނިސްޓްރީއަށް ހުށަހެޅުމުގެ ފުރުޞަތު ވަނީ ހުޅުވައިލައިފައެވެ.