ސީޖޭޕީގެ ބާނީ ޑިޕްކޭ ދިއްލީ ފުލުހުން ދެވަނަ ފަހަރަށް ހައްޔަރުކޮށްފި

ކޮނޯޓް ޕްލޭސްގައި ހުއްދައެއް ނެތި ތިރަންގާ ރެލީއެއް ބޭއްވުމާ ގުޅިގެން ކޮކްރޯޗް ޖަންތާ ޕާޓީގެ ބާނީ ދިއްލީ ފުލުހުން ހައްޔަރުކޮށް، އެސްއީއެމް ކޯޓަށް ހާޒިރުކުރަން ހަމަޖައްސާފައިވާ ކަމަށް އެ ޕާޓީން ބުނެފިއެވެ.

ފުލުހުން ހައްޔަރުކުރީ ކޮކްރޯޗް ޖަންތާ ޕާޓީ (ސީޖޭޕީ) ގެ ބާނީ އަބީޖީތު ޑިޕްކޭއެވެ. ހުކުރު ދުވަހު ނިއު ދިއްލީގެ ކޮނޯޓް ޕްލޭސްގައި އޮންނަ ސެންޓްރަލް ޕާކުގައި ސީޖޭޕީން "ލެހެރާ ދޯ ތިރަންގާ" ރެލީ ބޭއްވުމުން އޭނާ ހައްޔަރުކުރީ، ސަބްޑިވިޝަނަލް އެކްޒިކެޓިވް މެޖިސްޓްރޭޓް (އެސްއީއެމް) ކޯޓަށް ހާޒިރުކުރުމަށެވެ.

ސީޖޭޕީގެ ގާނޫނީ ކަންކަމުގެ ވެރިޔާ ރަތުނާ ސިންގް ބުނީ، ޑިޕްކޭ ބަހައްޓާފައިވާ ތަނެއް އަދި އެނގިފައި ނުވާ ކަމަށާއި، އޭނާއާ ބައްދަލުކުރުމުގެ ފުރުސަތު ވަކީލުންނަށް ނުލިބޭ ކަމަށެވެ. ފުލުހުން ރަތުނާވެސް ބަންދުކުރި ނަމަވެސް، ކުޑަ ވަގުތުކޮޅަކަށްފަހު ދޫކޮށްލާފައިވެއެވެ.

"އަބީޖީތު ހައްޔަރުކޮށް، އެސްއީއެމް ކޯޓަށް ހާޒިރުކުރާނެ. އޭނާ ހުރި ތަނެއް އަދިވެސް ނޭނގޭ. ވަކީލުން ބައްދަލެއް ނުކުރޭ،" ރަތުނާ ބުންޏެވެ.

ރިޕޯޓުތަކުގައިވާ ގޮތުން، ރެލީގެ ކުރިން ބާރަތިޔާ ނާގަރިކް ސުރަކްޝާ ސަންހިތާ (ބީއެންއެސްއެސް) ގެ 163 ވަނަ މާއްދާގެ ދަށުން ދިއްލީ ފުލުހުން ޑިޕްކޭއަށް ނޯޓިހެއް ދީފައިވެއެވެ. ކޮނޯޓް ޕްލޭސްއަކީ މުޒާހަރާކުރުމަށް ކަނޑައަޅާފައިވާ ސަރަހައްދެއް ނޫން ކަމަށާއި، ނިއު ދިއްލީ މުނިސިޕަލް ކައުންސިލް (އެންޑީއެމްސީ) އިން ތިރަންގާ ޔާތްރާއަށް ހުއްދަ ދީފައި ނުވާ ކަމަށް އެ ނޯޓިހުގައި ބުނެފައިވެއެވެ. އެ ސަރަހައްދުގައި ހިނގަމުންދާ މަނާކުރުމުގެ އަމުރުތަކާ ޚިލާފަށް މީހުން އެއްކޮށްފިނަމަ ފިޔަވަޅު އަޅާނެ ކަމުގެ އިންޒާރުވެސް ނޯޓިހުގައި ދީފައިވެއެވެ.

ހަފުތާއެއްގެ ތެރޭގައި ޑިޕްކޭ ފުލުހުން ބަންދުކުރި ދެވަނަ ފަހަރަކީ މިއީއެވެ. ސްޕެޝަލް އިންޓެންސިވް ރިވިޝަން (އެސްއައިއާރު) ގައި އިންތިހާބީ ލިސްޓުތަކަށް ބަދަލު ގެނައި ކަމުގެ ތުހުމަތުގައި ޗީފް އިލެކްޝަން ކޮމިޝަނަރު ގްޔާނޭޝް ކުމާރާ ދެކޮޅަށް ބާއްވާ މުޒާހަރާއެއްގައި ބައިވެރިވުމަށް މުމްބާއީން ދިއްލީއަށް އައިއިރު ވެސް އޭނާ ބަންދުކޮށްފައިވެއެވެ. އަދި ސީޖޭޕީގެ އިސް ދެ ވެރިން ކަމުގައިވާ ސޯރަވް ދާސް އާއި އާޝްތޯޝް ރަންކާ ފަސް ދުވަހަށް ޖުޑީޝަލް ބަންދަށް ފޮނުވާފައިވަނީ، ޖަންތަރް މަންތަރްގެ ބަންދު ސިފައިން އުވާލުމުން ޖެހިގެން އައި ދުވަސް ކަމުގައިވާ އޮކްޓޫބަރު 13 ވަނަ ދުވަހު އެ ސަރަހައްދަށް ވަދެ ޤައުމީ ދިދަ ވިހުރުވި ކަމުގެ ތުހުމަތުގައެވެ.