އީރާނު ހަނގުރާމައިގައި ބޮޑެތި ކުށްތައް ހިނގިކަން ވޭންސް ޤަބޫލުކޮށްފި

އީރާނާ ދެކޮޅަށް ކުރިއަށް ގެންދާ ހަނގުރާމަ ހިންގުމުގައި ގިނަ ކުށްތަކެއް ހިނގާފައިވާކަން އެމެރިކާގެ ނައިބު ރައީސް ޖޭޑީ ވޭންސް، ހަމަލާއެއްގައި މަރުވި ސިފައެއްގެ ފިރިމީހާ ކުރި ސުވާލަކަށް ޖަވާބުދެމުން ޤަބޫލުކޮށްފިއެވެ.

ކުވެއިތުގައި އޮންނަ ސިފައިންގެ ތަނަކަށް އީރާނުން ދިން ހަމަލާއެއްގައި މަރުވި މާސްޓަރ ސާޖަންޓް ނިކޯލް އަމޯގެ ފިރިމީހާ ޖޯއީ އަމޯ ކުރި ސުވާލަކަށް ޖަވާބުދެމުން ވޭންސް މި ވާހަކަ ބުނީ، ހަނގުރާމައިގެ ސަބަބުން އިންސާނީ އަދި އިޤްތިޞާދީ ގެއްލުން އިތުރުވަމުންދާއިރުއެވެ. ފެބްރުއަރީ މަހުގެ ފަހުކޮޅު ފެށުނު ހަނގުރާމައިގެ ފުރަތަމަ ގަޑިއިރުތަކުގައި ދިން އެ ހަމަލާގައި އެމެރިކާގެ އާމީ ރިޒާވްގެ ހަ ސިފައަކު މަރުވިއެވެ. މިހާތަނަށް މަދުވެގެން 21 އެމެރިކާ ސިފައަކު މަރުވެ، ސަތޭކަ ގިނަ ބަޔަކު ޒަޚަމްވެފައިވާ ކަމަށް އެނަޑޯލު އެޖެންސީން ރިޕޯޓުކޮށްފައިވެއެވެ.

އެ ތަނުގެ ސަލާމަތީ އިންތިޒާމުތައް ފުދިފައި ނުވާ ކަމަށް ރިޕޯޓުތަކުގައި ބުނާކަން ފާހަގަކުރި އަމޯ ބުނީ، އެކަމުގެ ޒިންމާ ޓްރަމްޕްގެ ސަރުކާރުން ނަގަން ޖެހޭ ކަމަށެވެ. "އަހަރެންގެ އަނބިމީހާ މަރާލި ހަތިޔާރަކީ އީރާނުގެ ޑްރޯނެއް ނަމަވެސް، އެކަމާ ހަމައަށް ދިއުމަށް ވަރަށް ގިނަ ކުށްތަކާއި ވަރަށް ގިނަ ބިންގާގެ ނާކާމިޔާބީތަކެއް ހިނގައިފިއެވެ،" ކަމަށް އަމޯ ބުނެފައިވެއެވެ.

އުނިކަންތައްތައް ހުރިކަން ޤަބޫލުކުރި ވޭންސް ބުނީ، "ބައެއް ފަހަރު މަޢުލޫމާތު އަހަރެންނާ ހަމައަށް ނާދެއެވެ" ކަމަށެވެ. ކޮންމެ ނާކާމިޔާބީއެއް "ވަރަށް ބޮޑަށް ސީރިއަސްކޮށް ނަގާނެ" ކަމަށްވެސް އޭނާ ވަޢުދުވިއެވެ. ސިފައިން ބަހައްޓާފައިވާ ތަންތަނުން ހަނގުރާމަ ހިންގާ ގޮތުގެ ބަލިކަށިކަންތައްތައް ފާޅުވި ކަމަށްވެސް ވޭންސް ބުނެއެވެ. "މިސާލަކަށް... ސިފައިން ތިބި ތަންތަނާ ގުޅޭ ބައެއް މައްސަލަތައް ހުރިކަން އަހަރެންނަށް އެނގެއެވެ. އެއީ ބޮޑު ކުށެއްކަމާއި، އޭގައި އިތުރަށް ރަނގަޅު ކުރެވިދާނެކަން އަހަރުމެންނަށް ވިސްނުނެވެ. އަދި އެކަން އަހަރުމެން ބަދަލުކޮށްފީމުއެވެ،" ކަމަށް ވޭންސް ބުންޏެވެ.

އަގުހެޔޮ ޑްރޯންތަކުގެ ނުރައްކާ ބޮޑުވަމުންދާތީ، ސިފައިން ރައްކާތެރިކޮށް އިތުރު ގެއްލުންތައް ހުއްޓުވުމަށް އެމެރިކާގެ ސިފައިން ޙަރަކާތްތެރިވާ ގޮތް ބަދަލުކޮށްފައިވާ ކަމަށް ވޭންސް ބުނެއެވެ. ރައީސް ޑޮނަލްޑް ޓްރަމްޕް އުންމީދުކުރި ފަދަ ފައިސަލާކުރަނިވި ކާމިޔާބީއެއް ނުލިބެނީ ކީއްވެތޯ ކުރި ސުވާލަށް އޭނާ ބުނީ، "ބައެއް ގޮތްގޮތުން... ފައިސަލާކުރަނިވި ގޮތެއްގައި ކާމިޔާބުވެއްޖެ" ކަމަށެވެ. ނަމަވެސް ނަތީޖާއަށް އީރާނުގެ ޢަމަލުތަކުގެ އަސަރުކުރާކަން ޤަބޫލުކުރަމުން، "ދުޝްމަނަށްވެސް މިކަމުގައި ވޯޓެއް ލިބެއެވެ" ކަމަށް ވޭންސް ބުންޏެވެ.

ވޮޝިންޓަނުން މިހާރު މަސައްކަތްކުރަނީ ނިއުކްލިއާ ޕްރޮގްރާމް އަލުން ބިނާނުކުރާނެ ކަމުގެ "ފަހު، ހަރުދަނާ ވަޢުދެއް" އީރާނުން ހޯދުމަށް ކަމަށް ވޭންސް ބުނެއެވެ. ހަނގުރާމައިގެ ގެއްލުން އިތުރުވަމުންދާއިރު، އެމެރިކާގެ ސަރުކާރުން ހަނގުރާމަ ހިންގާ ގޮތާ މެދު ސުވާލުތައް އުފެދެމުން ދެއެވެ.