ހުޅުމާލެ ހޮސްޕިޓަލުން ތިން ދާއިރާއެއްގެ ސްޕެޝަލިސްޓް ފަރުވާ މިއަދު ތައާރަފުކޮށްފި

ހުޅުމާލެ ހޮސްޕިޓަލުގައި ބަނޑާއި ގޮހޮރުގެ ބަލިތަކާއި ނާރު އަދި ކުޑަކަމުދާ ނިޒާމުގެ ބަލިތަކަށް ޚާއްޞަ ފަރުވާ ދިނުން ހެލްތު މިނިސްޓަރު ގީލާ އަލީ މިއަދު ފައްޓަވައިދެއްވައިފިއެވެ.

އެ ތިން ޚިދުމަތް އިފުތިތާޙުކުރީ އެ ހޮސްޕިޓަލުގައި ބޭއްވި ޚާއްޞަ ރަސްމިއްޔާތެއްގައެވެ.

ޞިއްޙީ ވުޒާރާއިން ބުނީ މި ބަދަލާ އެކު ސްޕެޝަލިސްޓް ފެންވަރުގެ ފަރުވާ ހޯދުމުގައި ޢާންމުންނަށް އިތުރު ލުއި ފަސޭހަ ލިބިގެންދާނެ ކަމަށެވެ.

ހުޅުމާލޭގެ އާބާދީ ހަލުވިކަމާ އެކު އިތުރުވަމުން ދިއުމުން އެ ސަރަޙައްދުގައި ހިންގާ ސަރުކާރުގެ ހަމައެކަނި ހޮސްޕިޓަލަށް ބާރު ބޮޑުވެ ލިބެން ހުރި ފަރުވާތައް މަދުކަމުގެ ޝަކުވާ ޢާންމުންގެ ފަރާތުން ދިޔައީ އިތުރުވަމުންނެވެ.

އެ ޝަކުވާތަކަށް ރިޢާޔަތްކޮށް ފަހަކަށް އައިސް އެ ހޮސްޕިޓަލުގައި ވަނީ އުރަމަތީ ކެންސަރުގެ އޮޕަރޭޝަންތައް ތައާރަފުކޮށް ލޮލުގެ ފަރުވާގެ ދާއިރާ ވެސް ފުޅާކޮށްފައެވެ. އެއާ އެކު އާ ވޯޑުތައް ހެދުމާއި އިމަޖެންސީ ރޫމް އަދި ޑައިލިސިސް ސެންޓަރު ބޮޑުކުރުމުގެ މަސައްކަތް ވެސް ކުރިއަށް ގެންދެއެވެ.