އިންޑިއާ ސަފީރު ތިލަމާލެ ބުރިޖުގެ މަސައްކަތް ބައްލަވައިލައްވައިފި

ތިލަމާލެ ބުރިޖު މަޝްރޫޢުގެ މަސައްކަތް ކުރިއަށްދަނީ ދިވެހި ސަރުކާރުގެ ފުރިހަމަ އެއްބާރުލުމާ އެކުގައި ކަމަށް ވިދާޅުވެ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީ. ބާލަސުބްރަމާނިއަން އެ މަޝްރޫޢުގެ ސައިޓަށް ޒިޔާރަތް ކުރައްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެއިން ވިލިމާލެއަށް ބުރިޖު މަތިން ހިންގަވާފައި ވަޑައިގެންނެވި ތާރީޚީ ހިނގާލުމުގައި ސަފީރު ވެސް ބައިވެރިވެވަޑައިގެންނެވިއެވެ. ސަފީރު ސިފަކުރެއްވި ގޮތުގައި ރައީސްގެ އަރިހުގައި ބުރިޖު މަތިން ހިންގެވުމަކީ ލިބިވަޑައިގެންނެވި އުފާފުޅެކެވެ. އެ މަޝްރޫޢަކީ އިންޑިއާ ބޯޑަރުން ބޭރުގައި އެ ޤައުމުން ހިންގާ ޢުމްރާނީ ތަރައްޤީގެ އެންމެ ބިޔަ އެއް މަސައްކަތް ކަމަށް ވެސް ސަފީރު ވިދާޅުވިއެވެ.

މީޑިއާތަކާ ވާހަކަ ދައްކަވަމުން ސަފީރު ވިދާޅުވީ "އިންޑިއާ ސަރުކާރާއި ދިވެހި ސަރުކާރުން ވަރަށް ގާތުން ދަނީ މަސައްކަތް ކުރަމުން. މިއީ އިންޑިއާގެ ބޯޑަރުން ބޭރުގައި އިންޑީއާއިން ކުރިއަށް ގެންދާ ވަރަށް ބޮޑު ޢުމްރާނީ ތަރައްޤީގެ އެންމެ ބިޔަ އެއް މަޝްރޫޢު. މިކަން ރާއްޖޭގައި ކުރާއިރު އަޅުގަނޑުމެން ވަރަށް އުފާވޭ މިމަސައްކަތް ނިމެން ދާތީ. އެއީ ދިވެހި ސަރުކާރުން ވަރަށް ބޮޑު އެއްބާރުލުމެއް ލިބިގެން ކުރެވޭ މަސައްކަތެއް. ބިނާރާއި ބެހޭ ވުޒާރާއާއި ޚާރިޖީ ވުޒާރާ އަދި ޚާއްސަކޮށް ރައީސްއަށް ޝުކުރުދަންނަވަން" ކަމަށެވެ.

އިންޑިއާގެ އެފްކޮންސް ކުންފުނިން ކުރިއަށް ގެންދާ މި މަޝްރޫޢުގެ ތެރެއިން މާލެއާއި ވިލިމާލެއާ ދެމެދު ގާތްގަނޑަކަށް 2.05 ކިލޯމީޓަރުގެ ސެގްމެންޓް މިހާރު ވަނީ އެއްގަމު މަގުން ގުޅުވައިލައިފައެވެ. މުޅި މަޝްރޫޢު ފުރިހަމަވުމުން މާލެ ވިލިމާލެ ގުޅީފަޅު އަދި ތިލަފުށި ހިމެނޭހެން ޖުމްލަ 6.7 ކިލޯމީޓަރުގެ ސަރަޙައްދެއް ގުޅައިލެވޭނެއެވެ.

ޖުމްލަ 500 މިލިޔަން ޑޮލަރު — ދިވެހި ފައިސާ އިން ހަތް ބިލިޔަނަށް ވުރެ ގިނަ ރުފިޔާ — ޚަރަދުވާ މި މަޝްރޫޢަށް ފައިނޭންސް ކުރަނީ އިންޑިއާ ސަރުކާރުގެ 100 މިލިޔަން ޑޮލަރުގެ ހިލޭ އެހީ އާއި 400 މިލިޔަން ޑޮލަރުގެ ލައިން އޮފް ކްރެޑިޓުގެ އިތުރުން ދިވެހި ސަރުކާރުގެ ބަޖެޓުންނެވެ. ސަރުކާރުން އަމާޒު ހިފާފައި ވަނީ މި މަޝްރޫޢުގެ ހުރިހާ މަސައްކަތެއް އަންނަ އަހަރުގެ ނިޔަލަށް ފުރިހަމަ ކުރުމަށެވެ.