ރިސޯޓުތަކުގެ އާމްދަނީ އޮޅުވައިލައިފި ނަމަ ފިޔަވަޅު އަޅާނެ ކަމުގެ އިންޒާރު ރައީސް ދެއްވައިފި
ރައީސް އޮފީހުގައި ބޭއްވި އެ ބައްދަލުވުމުގައި ނޫސްވެރިއެއްގެ ސުވާލަށް ޖަވާބު ދެއްވަމުން ރައީސް ވިދާޅުވީ ލޯނު ދައްކައި މުވައްޒަފުންނަށް މުސާރަ ދީ ދުވަހުގެ ހިންގުމުގެ ޚަރަދުތައް ކެނޑުމަށް ފަހު ވެސް 40 އިންސައްތަ މާރުކުރެވޭނެ ތަނަވަސްކަން ކޮންމެ ރިސޯޓެއްގައި ވެސް ހުންނާނެ ކަމަށެވެ.
ރިސޯޓުތަކުން ލިބޭ އާމްދަނީގެ 40 އިންސައްތަ ޑޮލަރު މާރުކުރުން ލާޒިމުކޮށް ބޭރު ފައިސާގެ ޤާނޫނަށް ގެނައި އިސްލާހު މިއަދު ތަސްދީޤުކުރެއްވުމަށް ފަހު ބޭއްވި ނޫސްވެރިންގެ ބައްދަލުވުމުގައި ހިސާބު އޮޅުވައިލައިގެން މަދުން ޑޮލަރު މާރުކުރަން ބައެއް ވިޔަފާރިވެރިން ރާވަމުންދާ ކަމަށް ތުހުމަތުކުރައްވައި ރައީސް ޑރ. މުޙައްމަދު މުޢިއްޒު ރިސޯޓު ވެރީންނަށް ވަރުގަދަ އިންޒާރެއް ދެއްވައިފިއެވެ.
ރައީސް އޮފީހުގައި ބޭއްވި އެ ބައްދަލުވުމުގައި ނޫސްވެރިއެއްގެ ސުވާލަށް ޖަވާބު ދެއްވަމުން ރައީސް ވިދާޅުވީ ލޯނު ދައްކައި މުވައްޒަފުންނަށް މުސާރަ ދީ ދުވަހުގެ ހިންގުމުގެ ޚަރަދުތައް ކެނޑުމަށް ފަހު ވެސް 40 އިންސައްތަ މާރުކުރެވޭނެ ތަނަވަސްކަން ކޮންމެ ރިސޯޓެއްގައި ވެސް ހުންނާނެ ކަމަށެވެ.
"ދެން ބައެއް ފަރާތްތަކުން އެބަ ބުނޭ ދެން އާމްދަނީ ނުލިބޭ ކަމަށް ހިސާބުކިތާބު ހަދާފައި ފޮނުވާނީއޭ. މަކަރު ހަދަން ދޮގު ހަދަން ވެސް މަސައްކަތްކުރެވިދާނެ. އެ ކަން ވެސް ހުއްޓުވޭނެ ނިޒާމުތައް މިއަދުގެ ބިލުތަކުން ވެސް އައިިސްފި" ރައީސް ވިދާޅުވިއެވެ.
އެ މަނިކުފާނު ވިދާޅުވި ގޮތުގައި އެއް މަސް ދުވަހުގެ ތެރޭގައި ޓޫރިސްޓުން ރާއްޖެ އެތެރެވާ ހިސާބުން ފެށިގެން އެ ފަރާތްތައް ތިބޭ ތަނާއި ފުރާ ވަގުތު ދެނެގަނެވޭ ނިޒާމެއް ސަރުކާރުގެ ސިސްޓަމްތަކުން ފެންނަން ފަށާނެއެވެ. އެ ނިޒާމާ އެކު އާމްދަނީ އޮޅުވައިލުމުގެ ޖާގައެއް ނޯންނާނެ ކަމަށް ރައީސް ވިދާޅުވިއެވެ.
"މި ސަރުކާރުން ހައްގު ގާއިމުކުރުމުގައި ވަރަށް ސާބިތުވާނެ. އަދުލު އިންސާފު ގާއިމުކުރުމުގައި ވަކި މީހަކަށް ނުބަލާނަން. ތަފާތެއް ނުކުރާނަން. ކީއްވެގެން ވަކި ބަޔަކު މުއްސަނދިވެފައި އެހެން އެންމެން ސަފާކުރަން ޖެހޭނީ. ނުޖެހޭނެ" ރައީސް ވިދާޅުވިއެވެ.
ރައީސް އިތުރަށް ތުހުމަތުކުރެއްވީ ޑޮލަރު މާރުކުރުމުގެ ބަދަލެއްގެ ގޮތުގައި މަޝްރޫޢުތައް ހުއްޓައިލުމަށް ބައެއް ވިޔަފާރިވެރިން ހިޔާލު ދެއްވި ކަމަށާއި ތަރައްޤީގެ ބަޖެޓު ބޮޑުކޮށްފި ނަމަ ކަޅު ބާޒާރުގައި ޑޮލަރުގެ އަގު ބޮޑުކުރާނެ ކަމުގެ އިންޒާރު ވެސް ވިޔަފާރިވެރީންގެ ފަރާތުން ލިބިވަޑައިގެންފައިވާ ކަމަށެވެ. ރިސޯޓުތަކަކީ ދައުލަތުގެ މުދާ ކަމަށް ސިފަކުރައްވައި ވަކި ބައެއްގެ މުއްސަނދިކަމަށް ޓޫރިޒަމް ސިނާއަތް ބޭނުންކުރުމުގެ ފުރުޞަތު ނުދެއްވާނެ ކަމަށް ވެސް ރައީސް ވިދާޅުވިއެވެ.
މި އިސްލާހާ ގުޅިގެން ފާރަވެރިވުމުގެ ނިޒާމު އެއް މަސް ދުވަހުގެ ތެރޭގައި ޤާއިމުކުރައްވާނެ ކަމަށް ރައީސް ވަނީ ވިދާޅުވެފައެވެ.
ލިޔުންތެރިޔާ
އަހުމަދު އާހިލް ސައީދު
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
