ޤާނޫނާ ޚިލާފުވާން ގޮވައިލުމަކީ ކުށަކަށް ދައުވަތު ދިނުން ކަމަށް ފަލާހް ވިދާޅުވެއްޖެ

ބޭރު ފައިސާ މާރުކުރުމުގެ ޤާނޫނާ ރިސޯޓުތަކުން ދެކޮޅު ހެދުމަށް ކުރީގެ ރައީސް ޢަބްދުﷲ ޔާމީން ގޮވައިލެއްވުމާ ގުޅިގެން އެއީ ކުށަކަށް ދައުވަތު ދިނުން ކަމަށް ސިފަކުރައްވައި ޕީއެންސީގެ ޕާލަމެންޓްރީ ގްރޫޕުގެ ލީޑަރު އިބްރާހީމް ފަލާހް މިއަދު ރައްދު ދެއްވައިފިއެވެ.

ޑޮލަރުން ލިބޭ އާމްދަނީގެ 40 އިންސައްތަ ރާއްޖޭގެ ބޭންކަކަށް މާރުކުރުން ލާޒިމުކުރާ ބިލާ ދެކޮޅަށް ހުރިހާ ރިސޯޓަކުން ތެދުވާން ޖެހޭ ކަމަށް ޔާމީން ވިދާޅުވީ އެ މަނިކުފާނުގެ ޕީއެންއެފުން ފުވައްމުލަކުގައި ރޭ ބޭއްވި ޖަލްސާގައެވެ. މި ބަދަލުގެ ސަބަބުން އެންމެ ބޮޑު ދައްޗެއް ކުރިމަތިވާނީ ފަތުރުވެރިކަމުގެ ސިނާއަތަށް ކަމަށާއި ހަމައެކަނި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ދެކޮޅު ހެދުމުން ނުފުދޭ ކަމަށް ވެސް ޔާމީން ވިދާޅުވިއެވެ.

އެ ވާހަކަފުޅަށް ރައްދު ދެއްވައި އެކްސްގައި ކުރެއްވި ޕޯސްޓެއްގައި ފަލާހް ވިދާޅުވީ ރާއްޖޭގެ ޤާނޫނަކާ ޚިލާފުވުމަށް ރިސޯޓުތަކަށް ގޮވައިލެއްވުމުން ފެނިގެން ދަނީ ޔާމީންގެ "ދަހިވެތިކަމާއި ހަސަދަވެރިކަން" ކަމަށެވެ.

"...އަދި ފަހަކަށް އައިސް އެމްޑީޕީއާ ގުޅިގެން ސަރުކާރު ވައްޓާލަން ޔާމީން ކުރަމުންދާ މަސައްކަތުން ހާމަވަނީ ޔާމީން ދައްކާ ވާހަކަ އާއި އަމަލާ ދިމާނުވާ މިންވަރު. މިއަދު ވެސް ޔާމީން ފަދަ ހާއިނަކަށް ގޭގައި އިނުމުގެ ފުރުސަތު ލިބިފައިވުމަކީ ހިތާމަ ހުރި އެކަމާ ގައުމު ވެސް ލަދުވެތިވާ ކަމެއް" ފަލާހް ވިދާޅުވިއެވެ.

"ޔާމީން ދައުލަތުން ވަގަށް ނަގާފައިވާ އެތައް މިލިއަން ޑޮލަރެއް ދައުލަތަށް ހޯދިއްޖެ ނަމަ މިހާރުން މިހާރަށް ޑޮލަރުގެ މައްސަލަ އަށް ހައްލެއް ލިބިގެންދާނެ."

މި ބިލަކީ ސަރުކާރުގެ ފަރާތުން ހޮޅުދޫ ދާއިރާގެ މެންބަރު ޢަބްދުއްސައްތާރު މުޙައްމަދު ހުށަހެޅުއްވި ބިލަކަށް ފުނަދޫ ދާއިރާގެ މެންބަރު މުޙައްމަދު މަމްދޫހު އިސްލާހެއް ހުށަހަޅުއްވައިގެން ފާސްކުރި ބިލެކެވެ. އެ ބިލުގައިވާ ގޮތުން އޭ ކެޓަގަރީގެ ވިޔަފާރިތަކުން ބޭރު ފައިސާގެ 40 އިންސައްތަ ބޭންކަކަށް މާރުކުރުން ފެށެނީ އަންނަ މަހުގެ އެއް ވަނަ ދުވަހުން ފެށިގެންނެވެ.

މަރުކަޒީ ބޭންކު (އެމްއެމްއޭ) ގެ ގަވަރުނަރު އަޙުމަދު މުނައްވަރު ވިދާޅުވެފައި ވަނީ އިމްޕޯޓަށް ބޭނުންވާ ޑޮލަރު ނުލިބޭ މައްސަލައަށް ދާއިމީ ހައްލެއް ހޯދެން އޮތީ ޑޮލަރުން އާމްދަނީ ލިބޭ ފަރާތްތަކުން ދައުރީ ގޮތެއްގައި ރާއްޖޭގެ ބޭންކުތަކަށް ޑޮލަރު މާރުކޮށްގެން ކަމަށެވެ. ފާއިތުވި މަހުގެ ނިޔަލަށް އެ ފަރާތްތަކުން އެމްއެމްއޭއަށް މާރުކުރި ޑޮލަރުގެ ތެރެއިން 56 އިންސައްތަ ޚަރަދުވީ ދައުލަތުގެ ދަރަނި އަދާކުރުމަށް ކަމަށް ވެސް މުނައްވަރު ވިދާޅުވެފައިވެއެވެ.

މަޓީން ބުނެފައި ވަނީ ތެލާއި މުސާރައާއި ސާވިސް ޗާޖާއި ޓެކްސްތަކާއި ކުއްޔާއި ބޭރު ފައިސާ އިން ދައްކަން ޖެހޭ ލޯނުތައް ފަދަ ގިނަ ޚަރަދުތައް ޑޮލަރުން ކުރާން ޖެހޭތީ އާމްދަނީގެ 40 އިންސައްތަ މާރުކުރުމަކީ ފަތުރުވެރިކަމުގެ ސިނާއަތަށް ތަޙައްމަލުކުރެވޭ ވަރުގެ ކަމެއް ނޫން ކަމަށެވެ. ބައެއް ރިސޯޓު އޮޕަރޭޓަރުން ކަޅު ބާޒާރުގައި ބޭރު ފައިސާގެ މުޢާމަލާތް ހިންގާ ކަމަށް ތަޙުޤީޤަކަށް ފަހު ތުހުމަތުކޮށްފައި ވިޔަސް އެ ފަދަ ކަމެއް ހިނގާ ކަމުގެ މަޢުލޫމާތު ލިބިފައި ނުވާ ކަމަށާއި ހުރިހާ ރިސޯޓު އޮޕަރޭޓަރުން ވެސް ޤާނޫނުތަކާ ޤަވާޢިދުތަކަށް ފުރިހަމައަށް ޢަމަލުކުރުމަށް އަބަދުވެސް އިލްތިމާސްކުރާ ކަމަށް މަޓީން ބުނެފައިވެއެވެ.