ގަދަކަމުން ކާރެއް އަތުލައި ފުވައްމުލަކުގައި ނުރައްކާތެރި އެކްސިޑެންޓެއް ހިންގި މީހަކު ހައްޔަރުކޮށްފި

ފުވައްމުލަކުގައި އިއްޔެ ކާރެއް ސައިކަލެއްގައި ޖައްސައި އެ މަގުން ދަތުރުކުރި އިތުރު ކާރަކާއި ރުކެއްގައި ޖެއްސި މައްސަލައިގައި މީހަކު ހައްޔަރުކޮށް 15 ދުވަހަށް ބަންދުކުރުމަށް ކޯޓުން އަމުރުކޮށްފިއެވެ.

މި މައްސަލައިގައި ހައްޔަރުކޮށްފައި ވަނީ ޏ. ފުވައްމުލައް މިސްކިތްމަގު އަންދާޒު އަޙްމަދު ޢައުނުﷲ (35އ) ކަމަށް ފުލުހުން ބުނެފައިވެއެވެ. ފުލުހުން ހާމަކުރި ގޮތުގައި އޭނާ ކޯޓަށް ހާޒިރުކުރުމުން ބަންދުގައި ބެހެއްޓުމަށް 15 ދުވަހުގެ މުއްދަތެއް ދީފައިވެއެވެ.

އިއްޔެ ރޭގަނޑު 18:22 ހާއިރު ފުވައްމުލަކު މޫޑިގެ ކުރިމަތިން ދުއްވާފައި ދިޔަ ކާރެއް ސައިކަލެއްގައި ޖެއްސުމަށް ފަހު މަޑުނުކޮށް ދުއްވާފައި ގޮސް ހަމަ އެ މަގުން ދިޔަ އެހެން ކާރެއްގައްޔާއި ރުކެއްގައި ޖެއްސި ކަމަށް ފުލުހުންނަށް ރިޕޯޓުކޮށްފައިވެއެވެ. ތަޙުޤީޤަށް އެނގިފައިވާ ގޮތުގައި ހައްޔަރުކުރި މީހާ ވަނީ ކާރުގެ ވެރިފަރާތަށް އަނިޔާކޮށް ކާރު ހަލާކުކޮށްލާނެ ކަމުގެ އިންޒާރު ދީ ގަދަކަމުން އެ ކާރު އަތުލައިގެން ދުއްވާފައެވެ. އަދި ކާރު ދުއްވިއިރު އޭނާ ހުރީ މަސްތުގެ ހާލަތުގައި ކަމަށް ތުހުމަތުކުރެވޭ ކަމަށް ވެސް ފުލުހުން ބުނެފައިވެއެވެ.

ސައިކަލު ދުއްވި އަންހެން މީހާ އާއި ފަހަތުގައި އިން އަށް އަހަރުގެ އަންހެން ކުއްޖާއަށް އެކިވަރުގެ އަނިޔާ ލިބިގެން ފުވައްމުލައް ހޮސްޕިޓަލުގައި ފަރުވާ ދެމުން ގެންދާ ކަމަށާއި ނަމަވެސް ސީރިއަސް އަނިޔާއެއް ލިބިފައި ނުވާ ކަމަށް ފުލުހުން ބުނެފައިވެއެވެ.

މި ހާދިސާގައި ދެ ކާރާއި ސައިކަލަށް ވެސް ތަފާތު ގެއްލުންތައް ލިބިފައިވެއެވެ.