ދައުލަތުގެ އާމްދަނީ 27.6 ބިލިޔަން ރުފިޔާއަށް އަރައި %10.4 ކުރިއަރައިފި

މިމަހުގެ 20 ވަނަ ދުވަހުގެ ނިޔަލަށް ދައުލަތަށް އާމްދަނީއާއި ހިލޭ އެހީގެ ގޮތުގައި 27.6 ބިލިޔަން ރުފިޔާ ލިބި މިދިޔަ އަހަރުގެ އެ މުއްދަތާ އަޅާބަލާއިރު 10.4 އިންސައްތައިގެ ކުރިއެރުމެއް ހޯދާފައިވާ ކަމަށް މާލީ ވުޒާރާގެ ހަފުތާ ރިޕޯޓުން ދައްކައިފިއެވެ.

މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާއިން ޢާންމުކުރި ވީކްލީ ފިސްކަލް ޑިވެލޮޕްމަންޓްސް ރިޕޯޓުގައިވާ ގޮތުން މިދިޔަ އަހަރު ހަމަ މި މުއްދަތުގައި ދައުލަތަށް ލިބިފައިވަނީ 25 ބިލިޔަން ރުފިޔާއެވެ. މި ކުރިއެރުމުގެ މައިގަނޑު ސަބަބެއް ކަމަށް އެ ވުޒާރާއިން ފާހަގަކުރައްވާފައިވަނީ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ ޓެކްސް (ޓީޖީއެސްޓީ) އާއި ވިޔަފާރީގެ ޓެކުހުން ލިބުނު ފައިސާ މައްޗަށް ދިއުމެވެ.

ޓެކުހުގެ އާމްދަނީގެ ތަފްސީލަށް ބަލާއިރު ޖުމްލަ ޓެކްސް އާމްދަނީ 21.4 ބިލިޔަން ރުފިޔާއަށް އެރީ 12.1 އިންސައްތައިގެ ކުރިއެރުމަކާ އެކުގައެވެ. މިދިޔަ އަހަރު މި ޢަދަދު ހުރީ 19.1 ބިލިޔަން ރުފިޔާގައެވެ. ޓެކްސް ނޫން ގޮތް ގޮތުން 5.6 ބިލިޔަން ރުފިޔާ ވެސް ދައުލަތަށް ވަދެފައިވެއެވެ. ޓީޖީއެސްޓީގެ ގޮތުގައި 7.3 ބިލިޔަން ރުފިޔާ ލިބުނުއިރު އެއީ ކުރީ އަހަރުގެ 6.8 ބިލިޔަނާ އަޅާ ބަލައިއިރު 7.4 އިންސައްތައިގެ އިތުރުވުމެކެވެ.

އެންމެ ފާހަގަކޮށްލެވޭ ކުރިއެރުމެއް ފެނިފައިވަނީ ވިޔަފާރިއާއި މުދަލުން ނަގާ ޓެކުހުގެ ދާއިރާއިންނެވެ. އެ ދާއިރާއިން 5.5 ބިލިޔަން ރުފިޔާ ލިބި މިދިޔަ އަހަރުގެ 4.6 ބިލިޔަނާ އަޅާ ބަލާއިރު 20.5 އިންސައްތައިގެ ކުރިއެރުމެއް ހޯދާފައިވެއެވެ. އޭގެ ތެރެއިން ކޯޕަރޭޓް އިންކަމް ޓެކްސް 7.1 އިންސައްތަ މައްޗަށް ގޮސް 2.86 ބިލިޔަން ރުފިޔާއަށް އެރިއިރު ނޮން-ރެޒިޑެންޓް ވިތުހޯލްޑިންގް ޓެކްސް 10.2 އިންސައްތަ އިތުރުވެ 924.5 މިލިޔަން ރުފިޔާ ލިބިފައިވެއެވެ. ވިޔަފާރިއާއި މުދަލުގެ އެހެނިހެން ޓެކުހުން ލިބުނު ފައިސާ 87.9 އިންސައްތައިގެ ބޮޑު ފުންމައިގެންނެއް ހޯދައި 1.39 ބިލިޔަން ރުފިޔާއަށް އެރިއެވެ. މީގެ އިތުރުން އިމްޕޯޓް ޑިއުޓީން 2.19 ބިލިޔަން ރުފިޔާ ލިބި 16.6 އިންސައްތައިގެ ކުރިއެރުމެއް ހޯދީއިރު ޢާންމު ޖީއެސްޓީ 10.8 އިންސައްތަ މައްޗަށް ގޮސް 3.53 ބިލިޔަން ރުފިޔާ ވަދެފައިވެއެވެ. ގްރީން ޓެކްސް 6.2 އިންސައްތަ އިތުރުވެ 1.40 ބިލިޔަން ރުފިޔާ އެއާޕޯޓް ޚިދުމަތުގެ ޗާޖާއި ޑިޕާޗަރ ޓެކްސް 13.4 އިންސައްތައިގެ ކުރިއެރުމާ އެކު 1.24 ބިލިޔަން ރުފިޔާ ދައުލަތަށް ލިބިފައިވެއެވެ.

ދައުލަތުގެ ޚަރަދަށް ނަޒަރު ހިންގާއިރު މިމަހުގެ 20 ވަނަ ދުވަހާ ހަމައަށް ޖުމްލަ 28.7 ބިލިޔަން ރުފިޔާ ވަނީ ޚަރަދުކޮށްފައެވެ. ކުރީ އަހަރުގެ ހަމަ މި މުއްދަތުގެ 24.1 ބިލިޔަނާ އަޅާ ބަލާއިރު 19.3 އިންސައްތައިގެ އިތުރުވުމެއް ޚަރަދުގެ ފަރާތުންވެސް ފެނިފައިވެއެވެ. ރިކަރަންޓް ޚަރަދުގެ ތެރެއިން އެންމެ ބޮޑު ކުރިއެރުމެއް ފެނުނީ ކައުންސިލް ގްރާންޓުންނެވެ. އެ ގޮތުން ކައުންސިލްތަކަށް 1.6 ބިލިޔަން ރުފިޔާ ދޫކޮށްފައިވާއިރު އެއީ 15.8 އިންސައްތައިގެ އިތުރުވުމެކެވެ. މުސާރައާއި އިނާޔަތްތަކަށް 9.39 ބިލިޔަން ރުފިޔާ ހޭދަވެ ކުރީ އަހަރަށް ވުރެ 11.1 އިންސައްތަ މައްޗަށް ގޮސްފައިވެއެވެ.

ކެޕިޓަލް ޚަރަދުގެ ދަށުން ޢުމްރާނީ ވަސީލަތްތަކަށް 3.2 ބިލިޔަން ރުފިޔާ ހޭދަކޮށް މިދިޔަ އަހަރުގެ 2.9 ބިލިޔަނާ އަޅާ ބަލާއިރު 9.1 އިންސައްތައިގެ ކުރިއެރުމެއް ހޯދާފައިވެއެވެ. ބިމާއި ޢިމާރާތްތަކަށް 1.20 ބިލިޔަން ރުފިޔާ ފާލަންތަކާއި ބަނދަރު ހެދުމަށް 284.5 މިލިޔަން ރުފިޔާ ހޭދަކޮށްފައިވެއެވެ. މި ތަފާސްހިސާބުތަކުން ދައްކާ ގޮތުގައި އާމްދަނީ އިތުރުވީ ނަމަވެސް ދައުލަތުގެ ޚަރަދުގެ ދުވެލި ވެސް ހަލުއިކޮށް ކުރިއަށް ގޮސްފައިވެއެވެ.