ކުށުގެ މުދާ ދައުލަތަށް ނެގުމާ ބެހޭ ބިލެއް މަޖިލީހަށް ހުށަހަޅައިފި

ޖިނާޢީ ބޮޑެތި ކުށްތައް ކޮށްގެން ހޯދާ މުދަލާއި ފައިސާ ދައުލަތަށް ނެގުމުގެ އުސޫލުތައް ކަނޑައެޅުމަށް ސަރުކާރުން ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ފަހު ޖަލްސާއަށް ބިލެއް ހުށަހަޅައިފިއެވެ.

މި ބިލުގެ ބޭނުމަކީ ކުށުގެ ޢަމަލުތައް ހިންގައިގެން ނުޙައްގުން ލިބޭ މާލީ މަންފާ ހުއްޓުވައި އެ މުދާ ދައުލަތަށް ނެގޭނެ ނިޒާމެއް ޤާއިމުކުރުމެވެ. މަނީ ލޯންޑަރިންއާއި ޓެރަރިޒަމާއި މީހަކު މެރުމުގެ ކުށާއި މަސްތުވާތަކެތީގެ ކުށާއި މީހުން ޓްރެފިކް ކުރުމާއި ހަތިޔާރު ޓްރެފިކް ކުރުމާއި އެކްސްޕްލޮއިޓޭޝަން އެކުލެވޭ ޖިންސީ ކުށާއި ކައުންޓަރފިޓް ކުރުމާއި ކޮރަޕްޝަނާއި އިންތިޒާމުވެގެން ހިންގާ ކުށްތައް ހިމެނޭ ގޮތަށް ފުޅާ ދާއިރާއެއް ބިލުގައި ހިމެނެއެވެ. އެ ކުށްތައް ކޮށްގެން ހޯދާ މުދަލުގެ އިތުރުން ކުށް ކުރުމަށް ބޭނުންކުރާ މުދާ ވެސް ދައުލަތަށް ނެގޭނެ ކަމަށް ބިލުގައި ބަޔާންކޮށްފައިވެއެވެ.

ރާއްޖޭގައި ނުވަތަ ރާއްޖޭން ބޭރުގައި ކުރާ ކުށްތައް ވެސް މި ޤާނޫނުގެ ދަށުން ބެލޭނެއެވެ. ޤާނޫނު ވުޖޫދުވުމުގެ ކުރިން ހިންގާފައިވާ ކުށްތަކުން ހޯދި މުދަލާއި އެ މުދަލުން މިހާތަނަށް ނެރެމުން އަންނަ ފައިދާ ވެސް ދައުލަތަށް ނެގެން ފަށާނެއެވެ. ބިލުގައި ކަނޑައެޅިފައިވާ ގޮތުން މުދާ ނެގުމުގެ ނިންމުންތައް ބިނާކުރާނީ ޕްރޮސެކިއުޓަރ ޖެނެރަލްގެ އިރުޝާދުގެ މައްޗަށެވެ.

ބިލު ޤާނޫނަކަށް ވެ ޢަމަލުކުރަން ފެށުމާ އެކު 30 ދުވަހުގެ ތެރޭގައި "އެސެޓް މެނޭޖްމަންޓް އޮތޯރިޓީ" ނަމުގައި މިނިވަން އިދާރާއެއް ރައީސުލްޖުމްހޫރިއްޔާ އުފައްދަން ޖެހެއެވެ. ދައުލަތަށް ނެގޭ މުދާ ރައްކާތެރިކަމާ އެކު ބެލެހެއްޓުމާއި އަގުމަގު ކުރުމާއި ދަފްތަރު ކުރުމާއި ކުށުގެ ޝިކާރައަކަށްވާ ފަރާތްތަކަށް ބަދަލު ދިނުމުގެ މަސައްކަތް ކުރާނީ އެ އިދާރާއިންނެވެ. ހަމައެއާ އެކު ޤާނޫނަށް ޢަމަލުކުރާތާ 60 ދުވަހުގެ ތެރޭގައި "ރިކަވަރޑް އެސެޓް ފަންޑެއް" ވެސް ޤާއިމުކުރާ ގޮތަށް ބިލުގައި ހިމަނާފައިވެއެވެ. ރާއްޖޭން ބޭރުގައި ހުންނަ ކުށުގެ މުދާ ހޯދުމުގައި ބައިނަލްއަޤުވާމީ އެހީ ހޯދުމުގެ ބާރު ޕްރޮސެކިއުޓަރ ޖެނެރަލަށް ލިބިދޭ ކަމަށް ވެސް ބިލުގައި ބަޔާންކޮށްފައިވެއެވެ.

ބޭރު ޤައުމުތައް މެދުވެރިކޮށް ކުށުގެ މުދާ ހިފެހެއްޓުމާއި ނެގުމުގެ ތަފްސީލީ އުސޫލުތައް ވެސް ބިލުގައި ހިމެނެއެވެ. މި ބިލާ ގުޅިގެން ޖިނާޢީ އިޖުރާޢަތުގެ ޤާނޫނަށް ގެންނަން ޖެހޭ އިސްލާހުތައް ވެސް ސަރުކާރުން ވަކިން މަޖިލީހަށް ހުށަހަޅާފައިވެއެވެ. ކުށްކޮށްގެން ހޯދާ މުދާ ދައުލަތަށް ނެގުމާ ބެހޭ ވަކި ޤާނޫނެއް ނެތުމުގެ ކަންބޮޑުވުން ތަންފީޒީ އިދާރާތަކުން ކުރިން ވެސް ފާޅުކޮށްފައިވާއިރު މި ބިލު ފާސްވެއްޖެ ނަމަ ނުޙައްގު މުއްސަނދިކަމާ ދެކޮޅަށް ޤާނޫނީ ބާރެއް ލިބިގެންދާނެއެވެ.