ނޭޕާލް ފެންބޮޑުވުމުން އަރައިގަތުމަށް ފަސް ބިލިޔަން ޑޮލަރު ހޭދަވާނެ ކަމަށް ލަފާކޮށްފި

މި ހަފުތާގައި ނޭޕާލަށް ކުރިމަތިވި ފެންބޮޑުވުމުގެ ބޮޑު ކާރިސާގައި ލިބުނު ގެއްލުންތައް ފޫބެއްދުމަށް ހަތަރު ބިލިޔަނާއި ފަސް ބިލިޔަން ޑޮލަރާ ދެމެދު ޢަދަދެއް ޚަރަދުވާނެ ކަމަށް އެ ޤައުމުގެ މާލީ ވަޒީރު ހާމަކުރައްވައިފިއެވެ.

ނޭޕާލުގެ މާލީ ވަޒީރު ސުވަރްނީމް ވާގްލީ ވިދާޅުވި ގޮތުގައި އެ ޢަދަދަކީ ނޭޕާލުގެ ޖުމްލަ އިޤުތިޞާދުގެ ގާތްގަނޑަކަށް ދިހަ ބައިކުޅަ އެއް ބަޔާ އެއްވަރުގެ މިންވަރެކެވެ. ގެއްލުންތައް ވަޒަންކުރުމުގެ މަސައްކަތް އަދިވެސް ކުރިއަށްދާ ކަމަށާއި 2015 ވަނަ އަހަރުގެ ބިންހެލުމަށް ވުރެ މި ފަހަރުގެ ކާރިސާގެ ޚަރަދު ކުޑަވާނެ ކަމަށް އެ ވަޒީރު އަންދާޒާ ކުރައްވައެވެ.

އޮގަސްޓް 26 ވަނަ ދުވަހު ހިމާލަޔާ ފަރުބަދަމަތީ ސަރަޙައްދަކުން ބޮޑު ގަނޑުފެން ގަނޑެއް ކަނޑައިގެން ދިޔުމާ ގުޅިގެން ކޯރުތަކުގައި ކުއްލި ގޮތަކަށް ފެންގަނޑު ބޮޑުވެ ހިލައާއި ކިސަޑާއި ގަނޑުފެން ފައިބައިގެން ދިޔައީއެވެ. މި ހާދިސާގައި ނޭޕާލާއި ޓިބެޓުން މަރުވި މީހުންގެ ޢަދަދު 600 އަށް އަރާފައިވާ އިރު 3,000 އެއްހާ މީހުން ގެއްލިފައިވާ ކަމަށް ދެ ޤައުމުގެ އިދާރާތަކުން ބުނެއެވެ. ސަރަޙައްދީ ރޮނގު ކައިރީގައި އޮތް ގިނަ އަވަށްތައް ސުންނާފަތިވެ މަގުތަކާއި ބުރިޖުތަކަށް ވެސް ބޮޑެތި ގެއްލުންތައް ލިބިފައިވެއެވެ.

ފެނުން ކަރަންޓު އުފައްދާ ނޭޕާލުގެ ނިޒާމަށް ވެސް މި ކާރިސާގައި ބޮޑެތި ގެއްލުންތައް ކުރިމަތިވެފައިވެއެވެ. އެ ޤައުމުން އުފައްދާ ޖުމްލަ ކަރަންޓުގެ %12 ޙިއްޞާކުރާ މަރުކަޒުތަކުގެ ޚިދުމަތް ވަނީ މެދުކެނޑިފައެވެ. ނޭޕާލުގެ އިޤުތިޞާދު މައިގަނޑު ގޮތެއްގައި ބިނާވެފައި އޮންނަނީ ބޭރު ޤައުމުތަކުގައި މަސައްކަތްކުރާ ރައްޔިތުން ފޮނުވާ ފައިސާއާއި ހަކަތައިގެ ދާއިރާގެ މައްޗަށެވެ.

ޤުދުރަތީ ކާރިސާތަކުގެ ނުރައްކާ ބޮޑު ނޭޕާލަށް 2015 ވަނަ އަހަރު ކުރިމަތިވި ބާރުގަދަ ބިންހެލުމުގައި ގާތްގަނޑަކަށް 9,000 މީހުން މަރުވެ ގެއްލުންތަކުން އަރައިގަތުމަށް ނުވަ ބިލިޔަން ޑޮލަރު ހޭދަވެފައިވެއެވެ. މި ފަހަރުގެ ކާރިސާއާ ގުޅިގެން ވެސް އެ ޤައުމުގެ އިޤުތިޞާދަށް ބޮޑު ލޮޅުމެއް ކުރިމަތިވާނެ ކަމަށް ދާރިސުން ޤަބޫލުކުރެއެވެ.