ހުޅުމާލޭގެ މަގުތައް ރައްކާތެރިކުރުމަށް ފުލުހުންނާއި އެޗްޑީސީން މަޝްވަރާކޮށްފި

ހުޅުމާލޭގައި ނުރައްކާތެރި އެކްސިޑެންޓުތައް އިތުރުވަމުންދާތީ އެކަން ހައްލުކުރުމަށް އެޅިދާނެ ފިޔަވަޅުތަކާ ގުޅޭ ގޮތުން ފުލުހުންނާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއްޔެ މަޝްވަރާކޮށްފިއެވެ.

ހުޅުމާލެ 1 ގެ ޕޮލިސް ސްޓޭޝަނުގައި ބޭއްވި އެ ބައްދަލުވުމުގައި ފުލުހުންގެ ފަރާތުން ހުޅުމާލެ ޕޮލިސް ހެޑް ޗީފް އިންސްޕެކްޓަރު އިބްރާހީމް ހަލީލާއި ހުޅުމާލެ ޓްރެފިކް ޕޮލިސް ހެޑް ޗީފް އިންސްޕެކްޓަރު އަހްމަދު ހަނީފް ބައިވެރިވެވަޑައިގެންނެވި އިރު އެޗްޑީސީގެ ޕްލޭނިން ހެޑް އަހްމަދު ޝާހިދާއި އެ ކޯޕަރޭޝަނުގެ އިތުރު އިސް ބޭފުޅުން ބައިވެރިވެވަޑައިގެންނެވިއެވެ.

ފުލުހުން ބުނީ ގިނައިން އެކްސިޑެންޓު ހިނގާ ކަމަށް ފާހަގަކުރެވޭ ސަރަހައްދުތަކާއި ބާރު ދުވެލީގައި ދުއްވާ ސަރަހައްދުތަކާ ބެހޭ މައުލޫމާތު ހިއްސާކޮށް އެ ސަރަހައްދުތަކުގައި އަވަސް ފިޔަވަޅުތައް އެޅުމާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފައިވާ ކަމަށެވެ. މަގުމަތީގެ ރައްކާތެރިކަން ހަރުދަނާކުރުމަށް އިންޖިނިއަރިން އާއި އެންފޯސްމަންޓް އަދި އެޑިއުކޭޝަންގެ ދާއިރާއިން މަސައްކަތްކުރުމާ ގުޅޭ ގޮތުން އެ ބައްދަލުވުމުގައި ޚިޔާލު ބަދަލުކުރެވުނެވެ.

މި ބައްދަލުވުން ބާއްވާފައި މި ވަނީ ހުޅުމާލެ ދެވަނަ ފިޔަވަހީގައި ހުންނަ ވިނަރެސް 7 ކައިރީގައި މިދިޔަ ހޮނިހިރު ދުވަހުގެ ރޭ ހިނގި ނުރައްކާތެރި އެކްސިޑެންޓެއްގައި ކުޑަކުއްޖަކަށް ސީރިއަސް އަނިޔާތަކެއް ލިބިފައިވާ ދަނޑިވަޅެއްގައެވެ.

އެ ކުއްޖާއަށް އައިޖީއެމްއެޗުގެ ވެންޓިލޭޓަރުގައި ފަރުވާދެމުންދާ އިރު އެ ކުއްޖާ ގޮވައިގެން ސައިކަލު ދުއްވަން އިން ބޮޑުދައިތައަށް ވެސް އަނިޔާވެފައިވެއެވެ. ފުލުހުން ކުރިން ބުނެފައިވާ ގޮތުގައި ސީސީޓީވީ ފުޓޭޖުން ފެންނަ ގޮތުން ހިތިގަސްމަގުން ދުއްވާފައި ދިޔަ ސައިކަލު ޖެހިފައި ވަނީ ވިނަރެސް 7 ކައިރީ މަޑުކޮށްފައި އޮތް ކާރަކަށް އެރުމަށް މަގާވީ ފަޅިން ހިނގާފައި ދިޔަ މީހެއްގެ ގައިގައެވެ.