ޓްރެފިކް ޑިއުޓީގައި ހުރި ފުލުހެއްގެ ގައިގައި ސައިކަލުން ޖެއްސި މީހާ ބަންދުކޮށްފި

ޗަންދަނީމަގާއި މަޖީދީމަގު ގުޅޭ ހިސާބުގައި ޓްރެފިކް ބެލެހެއްޓުމުގައި ހުރި ފުލުހެއްގެ ގައިގައި ސައިކަލަކުން ޖައްސައި ފިލަން އުޅުނު މީހަކު 15 ދުވަހަށް ބަންދުކުރުމަށް ކްރިމިނަލް ކޯޓުން މިއަދު އަމުރުކޮށްފިއެވެ.

މި މައްސަލައިގައި ހައްޔަރުކޮށް ކޯޓަށް ހާޒިރުކޮށްފައިވަނީ ގދ. ފަރެސްމާތޮޑާ ހަތި ސާއިން ޢަބްދުލްޤައްޔޫމް (23 އަހަރު) އެވެ.

ހުކުރުދުވަހު ހަވީރު 5:34 ހާއިރު ހިނގި މި ހާދިސާގައި އޭނާ ވަނީ ޑިއުޓީގައި ހުރި ފުލުހެއްގެ ގައިގައި ސައިކަލުން ޖެއްސުމަށްފަހު އެ ސަރަހައްދުން ފިލުމަށް މަސައްކަތްކޮށްފައެވެ.

މި ހާދިސާގައި އެ ފުލުސް އޮފިސަރަށް އަނިޔާވީ ނަމަވެސް ސީރިއަސް އަނިޔާއެއް ލިބިފައި ނުވާ ކަމަށް ފުލުހުން ބުނެއެވެ.

ސާއިންގެ ބަންދާ މެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން ކްރިމިނަލް ކޯޓުން ވަނީ 15 ދުވަހުގެ ބަންދުގެ އަމުރެއް ނެރެފައެވެ.