ޤައުމީ އިންޖިނޭރުންގެ ދުވަހާ ގުޅުވައި އެސްޓީއޯއިން ދެ ސްކޮލަޝިޕެއް ތަޢާރަފްކޮށްފި

ރާއްޖޭގައި ފުރަތަމަ ފަހަރަށް ފާހަގަކުރާ ޤައުމީ އިންޖިނޭރުންގެ ދުވަހުގެ މުނާސަބަތުގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އިންޖިނިއަރިން ދާއިރާއަށް ޚާއްޞަ ދެ ސްކޮލަޝިޕެއް މިއަދު އިފްތިތާޙުކޮށްފިއެވެ.

މި ސްކޮލަޝިޕްތައް އިފްތިތާޙުކޮށްދެއްވީ އެ ދުވަހާ ގުޅިގެން އެސްޓީއޯއިން ބޭއްވި ޚާއްޞަ ހަފްލާގައި މޯލްޑިވްސް ނޭޝަނަލް ޔުނިވަރސިޓީގެ ޗާންސެލަރ ޑރ. މަޚުމޫދު ޝައުޤީއާއި އެސްޓީއޯގެ މެނޭޖިންގ ޑައިރެކްޓަރ ޝިމާދު އިބްރާހީމެވެ.

ތަޢާރަފްކުރި ދެ ސްކޮލަޝިޕްގެ ތެރެއިން އެއް ފުރުޞަތު ޚާއްޞަކޮށްފައި ވަނީ ކޮންކްރީޓް ޓެކްނޮލޮޖީގެ ދާއިރާއަށެވެ. އެސްޓީއޯއިން ބުނީ އެ ސްކޮލަޝިޕަކީ އިންޖިނިއަރިން ދާއިރާއިން އަންޑަރ ގްރެޖުއޭޓް ފެންވަރު ހާސިލުކޮށްފައިވާ ފަރާތްތަކަށް އަމާޒުކޮށް ހުޅުވައިލާ ފުރުޞަތެއް ކަމަށެވެ. ރާއްޖެއިން ބޭރުގެ ޔުނިވަރސިޓީއެއް މެދުވެރިކޮށް އެއް އަހަރު ދުވަހުގެ ތެރޭގައި ފުރިހަމަކުރެވޭ ސްޕެޝަލައިޒޭޝަނެއްގެ ގޮތުގައި މި ޕްރޮގްރާމް ރާވައިފައިވާ ކަމަށް ވެސް އެ ކުންފުނިން ބުނެފައިވެއެވެ.

ދެވަނަ ސްކޮލަޝިޕް ޚާއްޞަކޮށްފައި ވަނީ އެލެވޭޓާ އިންސްޓޮލޭޝަންގެ ދާއިރާއަށެވެ. ދުނިޔޭގެ އެންމެ މަޤުބޫލު އެލެވޭޓާ ބްރޭންޑުތަކުގެ ތެރޭގައި ހިމެނޭ "ކޯނޭ" ރާއްޖޭގައި ޑިސްޓްރިބިއުޓް ކުރަނީ އެސްޓީއޯ މެދުވެރިކޮށް ކަމަށް ވާތީ އެ ދާއިރާގައި މަސައްކަތްކުރާ ދިވެހީންގެ ޢަދަދު އިތުރުކުރުމުގެ ބޭނުމުގައި ކޯނޭ އެކަޑެމީއާ ގުޅިގެން މި ފުރުޞަތު ފަހިކޮށްދީފައިވާ ކަމަށް އެސްޓީއޯއިން ބުނެފައިވެއެވެ.

މި ދެ ސްކޮލަޝިޕަކީ ވެސް އިންޖިނިއަރިން ދާއިރާއިން ދިވެހި ފަންނީ މީހުން ބިނާކުރުމަށް އެސްޓީއޯއިން ކުރާ މަސައްކަތުގެ ބައެކެވެ.