ފުވައްމުލަކުގެ ފެން އުފެއްދުމުގެ ޤާބިލުކަން 90 އިންސައްތަ އިތުރުކުރުމަށް އާރޯ ޕްލާންޓެއް ގެންގޮސްފި

ފުވައްމުލައް ސިޓީގެ ފެނުގެ ޚިދުމަތް ހަރުދަނާކުރުމުގެ ގޮތުން ދުވާލަކު 350 ޓަނުގެ ފެން އުފެއްދުމުގެ ޤާބިލުކަން ހުރި އާރޯ ޕްލާންޓެއް އެ ސިޓީއަށް ގެންގޮސްފިއެވެ.

އެމްޑަބްލިއުއެސްސީގެ މެނޭޖިން ޑިރެކްޓަރު ޙުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، މި ޕްލާންޓް އޮޕަރޭޝަނަށް ގެނައުމުން ފުވައްމުލަކުގައި ފެން އުފެއްދުމުގެ ޤާބިލުކަން ގާތްގަނޑަކަށް 90 އިންސައްތަ އިތުރުވެގެންދާނެ ކަމަށެވެ. މީގެ ސަބަބުން ރަށުގެ ރައްޔިތުންނަށް މެދުކެނޑުމެއް ނެތި، އިތުބާރާ އެކު ރައްކާތެރި ބޯފެން ފޯރުކޮށްދިނުމަށް އެ ކުންފުނިން ވެފައިވާ ވަޢުދު އިތުރަށް ވަރުގަދަވާނެ ކަމަށް ފަހުމީ ފާހަގަކުރެއްވިއެވެ.

ފެނަކަ ކޯޕަރޭޝަނުން ކުރިން ބަލަހައްޓަމުން ގެންދިޔަ އައްޑޫ ސިޓީ (ހުޅުދޫ އަދި މީދޫ ހިމެނޭ ގޮތަށް) އާއި ފުވައްމުލައް ސިޓީގެ ފެނާއި ނަރުދަމާގެ ޚިދުމަތްތައް އެމްޑަބްލިއުއެސްސީން ރަސްމީކޮށް ހަވާލުވެފައިވަނީ މި އޮކްޓޫބަރު މަހުގެ އެއް ވަނަ ދުވަހުއެވެ. މި ބަދަލު ގެނައުމަށް ދެ ކުންފުނީގެ ދެމެދުގައި ޚާއްޞަ ފްރޭމްވޯކް އެއްބަސްވުމެއް އެކުލަވައިލައި ސޮއިކޮށްފައިވާ އިރު، ދެ ސިޓީގެ އިންފްރާސްޓްރަކްޗާ ބަދަލުކުރުމުގެ މަސައްކަތް މިހާރު ވަނީ ފުރިހަމައަށް ނިމިފައެވެ.

ޚިދުމަތް ބަދަލުވެގެންދާ މަރުޙަލާގައި ވެސް ރައްޔިތުންނަށް މެދުނުކެނޑި ޚިދުމަތް ދިނުމަށް އިސްކަންދޭ ކަމަށް އެމްޑަބްލިއުއެސްސީން ބުނެފައިވެއެވެ. އެ ކުންފުނިން ބުނީ، ފަންނީ އެސެސްމެންޓްތަކަށް ބިނާކޮށް އައްޑޫ އަދި ފުވައްމުލައް ސިޓީގެ ޚިދުމަތްތައް އަޕްގްރޭޑްކުރުމާއި ހިންގުން ހަރުދަނާކުރުމުގެ ޢަމަލީ މަސައްކަތްތައް މިހާރު ވެސް ބާރަށް ކުރިއަށްދާ ކަމަށެވެ.