ވަޠަނީ ޚިދުމަތަށް ފަންނީ އައު ދާއިރާތަކާއި އިންޓަރންޝިޕް ޕްރޮގްރާމްތައް ތަޢާރަފްކުރުމަށް ނިންމައިފި

ދިވެހި ވަޠަނީ ޚިދުމަތް (ނޭޝަނަލް ސަރވިސް) އިތުރަށް ފުޅާކޮށް، ފަންނީ އައު ދާއިރާތަކާއި އިންޓަރންޝިޕް ޕްރޮގްރާމްތައް އެ ޚިދުމަތުގެ ތެރެއަށް ގެނައުމަށް ސަރުކާރުން ނިންމައިފިއެވެ.

މި ނިންމެވުން ހާމަކުރެއްވީ ވަޠަނީ ޚިދުމަތުގެ ޕްރޮގްރާމަށް އެއް އަހަރު ފުރުމުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު "އެކްސް" ގައި ކުރެއްވި ޕޯސްޓެއްގައެވެ. ރައީސް ވިދާޅުވީ 1 އޮކްޓޫބަރު 2025 ގައި ފެށި މި ޕްރޮގްރާމަށް އެއް އަހަރު ފުރުނުއިރު، ފުރަތަމަ އަހަރުގެ ލަނޑުދަނޑިތައް ޙާޞިލުކުރެވިފައިވާ ކަމަށެވެ.

އެގޮތުން، އަހަރަކު 1000 ޒުވާނުން ތަމްރީނުކުރުމަށް ކަނޑައެޅި އަމާޒުގެ ދަށުން، ނޭޝަނަލް ސަރވިސް އިނީޝަލް ޓްރޭނިންގގެ ތެރެއިން 1028 ޒުވާނުން ތަމްރީނުކުރެވިފައިވާ ކަމަށާއި ނޭޝަނަލް ސަރވިސް ސްކިލް ޓްރޭނިންގ ޕްރޮގްރާމުން 136 ޒުވާނުން ތަމްރީނުވެފައިވާ ކަމަށް ރައީސް ވިދާޅުވިއެވެ. ތަމްރީނު ފުރިހަމަކުރާ ޒުވާނުންނަށް ވަޒީފާގެ ފުރުޞަތުތައް ހޯދައިދިނުމަށްޓަކައި ނޭޝަނަލް ކެރިއަރ ސަރވިސްގެ ދައުރު ފުޅާކުރުމަކީ ވެސް ސަރުކާރުގެ މުހިންމު އަމާޒެއް ކަމުގައި އެމަނިކުފާނު ވިދާޅުވިއެވެ.

މި މުނާސަބަތުގައި ރައީސް ވަނީ ތަމްރީނުތައް ފުރިހަމަކުރި ހުރިހާ ޒުވާނުންނަށާއި އެ ޒުވާނުންގެ ޢާއިލާތަކަށް ތަހުނިޔާ ދަންނަވައި، ޕްރޮގްރާމް ހިންގުމުގައި ބައިވެރިވި ފަރާތްތަކަށް ޝުކުރު އަދާކުރައްވައިފައެވެ.

ދިވެހި ވަޠަނީ ޚިދުމަތަކީ ޒުވާނުންގެ ހިތްތަކުގައި ޤައުމިއްޔަތުގެ ރޫޙު ދިރުވައި، އިސްލާމްދީނަށް ލޯބިކުރާ ޒިންމާދާރު ޖީލެއް ބިނާކުރުމުގެ މަޤްޞަދުގައި ސަރުކާރުން ހިންގާ ޚާއްޞަ ޕްރޮގްރާމެކެވެ. ރާއްޖެއަށް ކުރިމަތިވާ ކާރިސާތަކާއި ނުރައްކާތެރި ޙާލަތްތަކުގައި ޤައުމީ ޚިދުމަތަށް ނުކުންނާނެ ސާބިތު ރައްޔިތުން އުފެއްދުމަކީ ވެސް މި ޕްރޮގްރާމުގެ އެއް އަސާސެވެ.