ކުދި ރަށްރަށުގެ ކައުންސިލުތަކަށް އެ އަތޮޅެއްގެ އެހެން ރަށަކުން މުވައްޒަފުން ނެގޭނެ އުޞޫލެއް ހަދައިފި

އާބާދީ މަދު ރަށްރަށުގެ ކައުންސިލް އިދާރާތަކަށް ބޭނުންވާ މުވައްޒަފުން ހަމަ އެ ރަށަކުން ނުލިބޭ ޙާލަތުގައި އެ އަތޮޅެއްގެ އެހެން ރަށެއްގައި ދިރިއުޅޭ ފަރާތެއް ވަޒީފާއަށް ނެގެވޭނެ ގޮތަށް ސިވިލް ސާވިސް ކޮމިޝަނުން އުޞޫލެއް އެކުލަވައިލައިފިއެވެ.

އެ ކޮމިޝަނުން ތައްޔާރުކުރި މި އުޞޫލު ލާޒިމުކުރާ ގޮތުން ވަޒީފާއަށް ހުޅުވައިލާ މަޤާމަކީ އެ ރަށެއްގެ ކައުންސިލް އިދާރާގެ އިދާރީ އޮނިގަނޑުގެ ތެރޭގައި ހިމެނޭ އަދި މާލީ ގޮތުން ޚަރަދު ހަމަޖެހިފައި އޮތް މަޤާމަކަށް ވާންޖެހެއެވެ. ފުރުޞަތު ހުޅުވައިލާނީ ހަމައެކަނި އެ ރަށް ހިމެނޭ އަތޮޅުގެ ހުރިހާ ރަށެއް ޝާމިލުވާ ގޮތަށެވެ.

މި އިންތިޒާމުގެ ދަށުން ވަޒީފާ ހަމަޖެހޭ ފަރާތް ޙާޒިރުވެ މަސައްކަތް ކުރާނީ އެ ފަރާތެއް ދިރިއުޅޭ ރަށެއްގެ ކައުންސިލް އިދާރާގައެވެ. އެހެންނަމަވެސް ވަޒީފާ ލިބޭ މީހެއްގެ ދިރިއުޅުން ހުންނަންވާނީ ވަޒީފާ އޮތް އިދާރާ ނިސްބަތްވާ އަތޮޅުގެ ރަށެއްގައެވެ. މުސާރައާއި އެހެނިހެން އިނާޔަތްތައް ކަނޑައެޅުމުގައި ބަލާނީ ދައުލަތުގެ ޕޭ ފްރޭމްވާކުގެ މިންގަނޑާ އެއްގޮތަށެވެ.

ވަޒީފާ ދިނުމާއި ވަޒީފާއިން ވަކިކުރުމާއި ކުރިއެރުން ދިނުން ފަދަ ހުރިހާ ކަމެއް ގެންދާނީ ސިވިލް ސާވިސް ޤާނޫނާއި ޤަވާއިދާއި އެ ކޮމިޝަނުގެ އުޞޫލުތަކާ އެއްގޮތަށް ކަމަށް އެ އުޞޫލުގައި ބަޔާންކޮށްފައިވެއެވެ. އަދި މުވައްޒަފުގެ މަސައްކަތް މޮނިޓަރކޮށް ބެލެހެއްޓުން ހަވާލުވާނީ އެ މީހަކު ޙާޒިރުވެ މަސައްކަތް ކުރާ އިދާރާގެ ސެކްރެޓަރީ ޖެނެރަލް ނުވަތަ އެ މަސްއޫލިއްޔަތާ ހަވާލުވެ ހުރި ފަރާތެއް ކަމަށް ވެސް ބުނެފައިވެއެވެ.

މަޤާމުތަކަށް މީހުން ހޮވުމުގެ ޢަމަލީ މަސައްކަތް ކުރިއަށް ގެންދާނީ ސީދާ ސިވިލް ސާވިސް ކޮމިޝަނުން ނުވަތަ އެ ކޮމިޝަނުން ކަނޑައަޅާ އިދާރާއަކުންނެވެ.