އިންޖިނިއަރުންގެ އެވޯޑަށް ހުށަހެޅުމުގެ ސުންގަޑި އަންނަ ބުރާސްފައްޗަށް ފަސްކޮށްފި

ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ދެމުން ގެންދާ އިންޖިނިއަރުންގެ އެވޯޑަށް ކުރިމަތިލުމަށް ހުޅުވައިލީ މުއްދަތު މިއަދު ހަމަވާ ގޮތަށް އޮތް ނަމަވެސް އެ ފުރުސަތު އަންނަ ހަފުތާގެ ބުރާސްފަތި ދުވަހާ ހަމައަށް އިތުރުކޮށްފިއެވެ.

މި މަހުގެ ހަ ވަނަ ދުވަހު ފެށި އެ ފުރުސަތުގެ ސުންގަޑިއަކީ މިއަދު ކަމުގައި ކުރިން ކަނޑައަޅާފައި އޮތެވެ. ނަމަވެސް އެ ވުޒާރާއިން ނެރުނު އިޢުލާނުގައި ބުނެފައި ވަނީ އެވޯޑު ދިނުމާ ގުޅޭ އުސޫލުގައި ބަޔާންކޮށްފައިވާ ޝަރުތުތައް ފުރިހަމަވާ ފަރާތްތަކަށް ބުރާސްފަތި ދުވަހުގެ މެންދުރުފަހު 2:00 ގެ ނިޔަލަށް ހުށަހެޅޭނެ ކަމަށެވެ.

ސަރުކާރުގެ އިދާރާތަކާއި ދައުލަތް ހިއްސާވާ ކުންފުނިތަކުގެ އިތުރުން އިންޖިނިއަރިން ދާއިރާގައި ހަރަކާތްތެރިވާ އެކި ފާމުތަކާއި ކޮންޓްރެކްޓަރުންނާއި ކޮންސަލްޓެންޓުންނަށް ވެސް ކުރިމަތިލެވޭނެއެވެ. ހަމައެހެންމެ މަޝްރޫޢުތައް ހިންގާ ޕްރޮޖެކްޓް ޓީމުތަކާއި ތަޢުލީމީ އަދި ދިރާސާ ކުރާ ޓީމުތަކަށް ވެސް މި ފުރުސަތު ހުޅުވައިލާފައިވެއެވެ.

ހުށަހެޅުންތައް ބަލައިގަންނަނީ އެ ވުޒާރާގެ ވެބް ޕޯޓަލް މެދުވެރިކޮށެވެ. އެ އެވޯޑު ޖުމްލަ 10 ދާއިރާއަކުން ދިނުމަށް އުސޫލުގައި ހަމަޖައްސާފައިވެއެވެ.

ރާއްޖޭގައި އިންޖިނިއަރުންގެ ދުވަހެއް ފާހަގަކުރާނެކަން ރައީސް ޑރ. މުޙައްމަދު މުޢިއްޒު އިޢުލާނު ކުރެއްވީ މިދިޔަ އަހަރުގެ ޖޫން 15 ގައެވެ. ދިވެހި އިންޖިނިއަރުން ޤައުމަށް ކޮށްދޭ ޚިދުމަތުގެ އަގުވަޒަންކުރުމުގެ ގޮތުން ކޮންމެ އަހަރެއްގެ އޮގަސްޓް 30 ވަނަ ދުވަހަކީ އިންޖިނިއަރުންގެ ދުވަހުގެ ގޮތުގައި ފާހަގަކުރާ ދުވަހެއް ކަމުގައި ރައީސް ވަނީ ހަމަޖައްސަވާފައެވެ.