ނުކުޅެދުންތެރިކަން ހުންނަ މީހުން ބާރުވެރިކުރުވުމުގެ ދާއިރާއިން ރިވެލި އެވޯޑް އެޗްޑީސީއަށް
ސަރުކާރު ހިއްސާވާ ކުންފުނިތަކުގެ ތެރެއިން ނުކުޅެދުންތެރިކަން ހުންނަ މީހުން އިޤުތިޞާދީ ގޮތުން ބާރުވެރިކުރުވުމަށް އެހީތެރިވެދޭ ފަރާތްތަކުގެ ދާއިރާއިން މި އަހަރުގެ ރިވެލި އެވޯޑް އެޗްޑީސީއަށް ލިބިއްޖެއެވެ.
ސަރުކާރު ހިއްސާވާ ކުންފުނިތަކުގެ ތެރެއިން ނުކުޅެދުންތެރިކަން ހުންނަ މީހުން އިޤުތިޞާދީ ގޮތުން ބާރުވެރިކުރުވުމަށް އެހީތެރިވެދޭ ފަރާތްތަކުގެ ދާއިރާއިން މި އަހަރުގެ ރިވެލި އެވޯޑް އެޗްޑީސީއަށް ލިބިއްޖެއެވެ.
ރިވެލި އެވޯޑަކީ މުޖުތަމަޢުގެ ހުރިހާ ފަރުދުން ޝާމިލުކޮށްގެން ދެމެހެއްޓެނިވި ތަރައްޤީ ހާސިލުކުރުމަށާއި އެންމެންނަށް ފަހި މާޙައުލެއް ޤާއިމުކުރުމަށް ކުރާ މަސައްކަތް ޤައުމީ ފެންވަރުގައި ފާހަގަކުރުމުގެ ގޮތުން ސަރުކާރުން ދެމުން އަންނަ އެވޯޑެކެވެ.
އެޗްޑީސީން ވަނީ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތުތައް ހޯދައިދީ، ހުނަރު ތަރައްޤީ ކުރެވޭނެ ތަމްރީނު ޕްރޮގްރާމްތައް ހިންގައިފައެވެ. އެ ކޯޕަރޭޝަންގެ ތަފާތު އެކި މަޤާމުތަކުގައި ނުކުޅެދުންތެރިކަން ހުންނަ 46 މުވައްޒަފުން މިހާރު ވެސް ޚިދުމަތް ކުރަމުން ގެންދެއެވެ. އޭގެ އިތުރުން، ނުކުޅެދުންތެރިކަން ހުންނަ ފަރާތްތަކުގެ ޚިޔާލާއި ކަންބޮޑުވުންތައް ސީދާ ގޮތެއްގައި ޝާމިލުކުރުމަށްޓަކައި "ޕާސަންސް ވިތް ޑިސެބިލިޓީ (ޕީޑަބްލިއުޑީ) އެމްބެސެޑަރުން"ގެ ގޮތުގައި ދެ މުވައްޒަފަކު ވަނީ ޢައްޔަންކޮށްފައެވެ.
ވަޒީފާގެ މާޙައުލު ފަސޭހައިން ބޭނުންކުރެވޭ ގޮތަށް ބައްޓަންކުރުމުގެ ގޮތުން އެ ކޯޕަރޭޝަންގެ އޮފީސް ޢިމާރާތަށް ޒަމާނީ ބަދަލުތައް ގެނެސްފައިވެއެވެ. ވަކިން ޚާއްޞަކޮށް، ކުއްލި ނުރައްކަލުގެ ޙާލަތްތަކުގައި ބޭނުންކުރާ ސަލާމަތީ ނިޒާމުތައް ފަރުމާކޮށްފައި ވަނީ އަޑުއިވުމުގެ ނުކުޅެދުންތެރިކަން ހުންނަ މުވައްޒަފުންނާއި ކަސްޓަމަރުންނަށް ވެސް ފަސޭހައިން މަޢުލޫމާތު ލިބޭނެ އިންތިޒާމުތަކާ އެކުގައެވެ.
ހުޅުމާލޭގެ ބިނާރާއި ޢުމްރާނީ ތަރައްޤީގެ މައިގަނޑު މަސައްކަތް ހިންގާ ކުންފުނީގެ ޙައިޘިއްޔަތުން، މާސްޓަ ޕްލޭނާއި ތަރައްޤީގެ މަޝްރޫޢުތައް ރާވާއިރު ނުކުޅެދުންތެރިކަން ހުންނަ ފަރާތްތަކުގެ ޚާއްޞަ ބޭނުންތަކަށް ފުރިހަމައަށް ރިޢާޔަތްކުރާ ކަމަށް އެ ކޯޕަރޭޝަނުން ބުނެފައިވެއެވެ. މަގުމައްޗާއި ޢާންމު ޕާކުތަކާއި ޢިމާރާތްތައް، ހުރަހެއް ނެތި ހުރިހާ ރައްޔިތުންނަށް ބޭނުންކުރެވޭނެ ތަންތަނުގެ ގޮތުގައި ތަރައްޤީ ކުރުމަކީ ޝާމިލު މުޖުތަމަޢެއް ބިނާކުރުމުގެ ތަޞައްވުރުގެ މުހިންމު ބައެއް ކަމަށް ވެސް އެ ކޯޕަރޭޝަނުން ބުނެފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް