ތެލުގެ އަގު 29 އިންސައްތައަށް އުފުލުމުން ޓްރަމްޕް ބުނީ ކެތްކުރާށޭ

ހޮރްމުޒް ކަނޑުއޮޅީގައި އީރާނުން ޙިޞާރު ވަރުގަދަކޮށް ޓޭންކަރުތަކުގެ ދަތުރުތައް ހުއްޓުވާފައިވާ ދަނޑިވަޅެއްގައި ތެލުގެ އަގު އިތުރަށް މައްޗަށް ދާނެ ކަމުގެ އިންޒާރު ދީ އެ ކަމަށް ކެތްތެރިވުމަށް އެމެރިކާގެ ރައީސް ޑޮނަލްޑް ޓްރަމްޕް އެ ޤައުމުގެ ރައްޔިތުންނަށް ގޮވައިލައިފިއެވެ.

ނިއު ޔޯކުގައި ބޭއްވި ސިޔާސީ ކެންޕޭން ޖަލްސާއެއްގައި ޓްރަމްޕް ބުނީ އީރާނަށް ނިއުކްލިޔަރ ހަތިޔާރު އުފެއްދުމުގެ ފުރުޞަތު ބަންދުކުރުމަށްޓަކައި ޕެޓްރޯލަށް އިތުރު ޚަރަދުކުރަން ޖެހުމަކީ ދައްކަންޖެހޭ އަގެއް ކަމަށް ބަލައިގަންނަންޖެހޭ ކަމަށެވެ. މެދުއިރުމަތީގެ ހަނގުރާމައާ ގުޅިގެން ހުސްވި އަހަރާ އަޅައިބަލާއިރު އެމެރިކާގެ ބާޒާރުގައި ތެލުގެ އަގު %29 މައްޗަށް ގޮސްފައިވާއިރު މި ކަމަކީ ރިޔާސީ ދައުރުގެ މެދުތެރެއިން ބާއްވާ ޤާނޫނުހަދާ މަޖިލީހުގެ އިންތިޚާބުގެ ނަތީޖާއަށް ވެސް އަސަރުކޮށްފާނެ ކަމެކެވެ. ޓްރަމްޕާ އެކު އޭނާގެ މާލީ ވަޒީރު ސްކޮޓް ބެސެންޓް ވެސް ވަނީ އީރާނަށް އިތުރު މާލީ ގެއްލުންތައް ދިނުމަށް ތައްޔާރަށް ތިބި ކަމަށް ބުނެފައެވެ.

އީރާނުގެ ޚާރިޖީ ވަޒީރުގެ ނައިބު ކާޒިމް ޣަރީބްއާބާދީ ވިދާޅުވީ ކަނޑުއޮޅި ހުޅުވައި ބަންދުކުރުމުގެ ފުރިހަމަ ބާރު އޮތީ އީރާނަށް ކަމަށާއި ހަނގުރާމައިން ނާކާމިޔާބުވެފައިވާ ކަން އެމެރިކާއިން ޤަބޫލުނުކުރާހާ ހިނދަކު ޙިޞާރު ދެމިއޮންނާނެ ކަމަށެވެ. ޚާރިޖީ ވަޒީރު ޢައްބާސް ޢަރާޤިޖީ ވިދާޅުވި ގޮތުގައި ދުނިޔޭގެ ތެލުގެ ފަސްބައިކުޅަ އެއްބައި ދައުރުވާ އެ ކަނޑުއޮޅިން ދަތުރުތައް އަލުން ފެށެން އޮތީ އީރާނުގެ ޝަރުޠުތައް އެމެރިކާއިން ބަލައިގަތުމުންނެވެ. އޮގަސްޓް 14 ވަނަ ދުވަހު އެ ކަނޑުއޮޅި ހުރަސްކުރީ އެންމެ ދެ އުޅަނދެވެ. އެ ދެ އުޅަނދުގެ ތެރޭގައި ތެޔޮ ޓޭންކަރެއް ނެތެވެ.

ހުއްދައާ ނުލައި ކަނޑުއޮޅި ހުރަސްކުރަން އުޅޭ އުޅަނދުފަހަރަށް އީރާނުން ދަނީ ހަމަލާ ދެމުންނެވެ. އެންމެ ފަހުން ހަމަލާ އަމާޒުވީ ޔޫއޭއީގެ ދެ ޓޭންކަރަކަށެވެ. އޭގެ އިތުރުން މުދާ ބަރުކޮށްގެން ދަތުރުކުރި އެހެން އުޅަނދަކަށް ވެސް ހަމަލާ ދީފައިވާ ކަމަށް އިނގިރޭސިވިލާތުގެ ކަނޑު ދަތުރުފަތުރުގެ ވިޔަފާރިއާ ބެހޭ އިދާރާއިން ބުނެއެވެ. މީގެ އިތުރުން ޔަމަނުގެ ޙޫޘީ ޖަމާޢަތުން ވަނީ ޔަމަނުގެ މައްޚާ ބަނދަރަށާއި ސަޢޫދީ ޢަރަބިއްޔާގެ ނަޖްރާންގައި ހުންނަ އަރަމްކޯ ތެޔޮ ކުންފުނީގެ މަރުކަޒަކަށް ހަމަލާ ދީފައެވެ.

ފެބްރުއަރީ 28 ގައި އެމެރިކާއާއި އިސްތިޢުމާރީ އިސްރާއީލު ގުޅިގެން ފެށި ހަނގުރާމަ ހުއްޓުމަކަށް ގެނެވޭނެ ކަމުގެ ނިޝާނެއް ފެންނާކަށް ނެތެވެ. ޞުލްޙައިގެ މަޝްވަރާތައް ވަނީ މަޑުޖެހިފައެވެ. ޖޫން މަހު ދެ ފަރާތުން ސޮއިކުރި އިބުތިދާއީ ޞުލްޙައިގެ އެއްބަސްވުން ވެސް މިހާރު ވަނީ އުވިގޮސްފައެވެ.