ސްވީޑެންގެ ވަޒީރު އީޔޫގެ ބައްދަލުވުމަށް ވަޑައިގަތީ ތިން މަހުގެ ދަރިފުޅު ގޮވައިގެން

ސްވީޑެންގެ މޫސުމީ ބަދަލުތަކާ ބެހޭ ވަޒީރު ރޮމީނާ ޕޯރމޮޚްތާރީ, ތިން މަހުގެ ދަރިކަލުން އާދަމް ގޮވައިގެން ލަގްޒެމްބާގުގައި ބޭއްވި އީޔޫ ކައުންސިލް ބައްދަލުވުމަށް ވަޑައިގެންފިއެވެ. މިއީ އީޔޫ ވަޒީރުންގެ ބައްދަލުވުމަކަށް ތުއްތު ކުއްޖަކު ގެންދިޔަ ފުރަތަމަ ފަހަރެވެ. 

މޫސުމީ ސިޔާސަތުތަކާ ގުޅޭ ގޮތުން ބުރާސްފަތި ދުވަހު ބޭއްވި މި ބައްދަލުވުމަށް ދަރިފުޅު ގެންދެވީ ވިހެއުމާ ގުޅިގެން ދެވޭ ޗުއްޓީގެ ސިޔާސަތުތަކުގެ ފައިދާ ހާމަކޮށްދެއްވުމަށާއި ވަޒީފާއާއި ޢާއިލީ ޒިންމާތަކުން ކުރެ އެކަތި ޚިޔާރުކުރުމުގެ ބަދަލުގައި ދެކަންވެސް ކުރެވޭނެކަން ދައްކަވައިދެއްވުމަށް ކަމަށް ޕޯރމޮޚްތާރީ ވިދާޅުވިއެވެ.

"އެ (ދެކަމުން އެއްކަމެއް) ޚިޔާރު ކުރާން ނުޖެހޭ ކަމުގެ ނަމޫނާއެއް ދައްކަން ބޭނުންވީ. އެކަމަށް ޕޮޒިޓިވް ވިސްނުމެއް ގެންގުޅޭ އެކުގައި މަސައްކަތްކުރާން ތައްޔާރު ބައިވެރިއެއް ހުރުންވެސް މުހިންމު" ކަމަށް ޕޯރމޮޚްތާރީ ރޮއިޓާސްއަށް ވިދާޅުވިއެވެ.

ޕޯރމޮޚްތާރީ ވަނީ ވިހެއުމާ ގުޅޭ ޗުއްޓީ ނިންމެވުމަށްފަހު އެނބުރި މަސައްކަތަށް ނުކުންނަވައިފައެވެ. ފިރިކަލުން ވަނީ ސެޕްޓެމްބަރުގައި ބާއްވާ ސްވީޑެންގެ އިންތިޚާބާ ޖެހެންދެން ޗުއްޓީ ނަންގަވައި އާދަމް ބެލެހެއްޓެވުމަށް ލަގްޒެމްބާގަށް ވަޑައިގެންފައެވެ.

ހެޔޮ ސިޔާސަތުތަކަކީ ހަމައެކަނި ދިގު ޗުއްޓީ ދިނުން ނޫން ކަމަށާއި ޗުއްޓީ ޙިއްޞާކުރުމުގެ ލުއި އުސޫލުތަކާއި އަތްފޯރާ އަގެއްގައި ޗައިލްޑްކެއާ ލިބޭނެ ގޮތް ހެދުންވެސް މުހިންމު ކަމަށް ޕޯރމޮޚްތާރީ ވިދާޅުވިއެވެ.

"މީގެ ސަބަބުން ލިބޭ ފައިދާ ކުޑަ ކަމަށް ބަލައިގެން ނުވާނެ. އެއީ ހަމައެކަނި އިޤުތިޞާދީ ފައިދާ ކަމަށް ނުވެދާނެ. އެކަމަކު އާޚިރުގައި އެކަމުން އިޤުތިޞާދީ ފައިދާއެއްވެސް ލިބިދާނެ." ކަމަށް އޭނާ ވިދާޅުވިއެވެ.

ޕޮލެންޑުގެ ޑެޕިއުޓީ މޫސުމީ ވަޒީރު ކެޝިޝްޓޮފް ބޮލެސްޓާ ވިދާޅުވީ ސިޔާސީ ބައްދަލުވުމެއްގައި ތުއްތު ކުއްޖެއް ހުރުމުން އެއްވެސް އުނދަގުލެއް ނުވި ކަމަށާއި "އެއީ ވަރަށް ރަނގަޅު ކަމެއް. ނުކުޅެދުންތެރިކަމެއް ނޫން ދިރިއުޅުމުގެ ބައެއް" ކަމަށެވެ.

ސްވީޑެނަކީ ދުނިޔޭގައި އެންމެ ލުއިކޮށް ވިހެއުމާ ގުޅޭ ޗުއްޓީގެ ސިޔާސަތެއް އޮންނަ އެއް ޤައުމެވެ. އެ ޤައުމުގައި މައިންބަފައިންނަށް ޖުމްލަކޮށް ގާތްގަނޑަކަށް 16 މަސް ދުވަހުގެ ޗުއްޓީ މުސާރައާ އެކު ލިބެއެވެ. މީގެ ތެރެއިން 90 ދުވަސް އޮންނަނީ ކޮންމެ މީހަކަށްވެސް ވަކިން ޚާއްޞަކޮށްފައެވެ.

"ބައްޕައިންގެ މަސްތައް" ގެ ނަމުން މަޝްހޫރު މި އުސޫލު ތަޢާރަފުކުރީ ބައްޕައިން ދަރީންނާ އެކު ވަގުތު ހޭދަކުރުމަށް ހިތްވަރު ދިނުމަށެވެ.