ކާފްގެ ފުރިހަމަ ތާއީދު އިންފަންޓީނޯ އަށް އިންތިޚާބަށް ކެމްޕެއިން ފެށިއްޖެ

އަންނަ އަހަރު ބާއްވާ ފީފާގެ ރިޔާސީ އިންތިޚާބާ ދިމާކޮށް އެފްރިކާގެ ފުޓްބޯޅަ ޖަމިއްޔާ ކާފްއިން ފީފާގެ މިހާރުގެ ރައީސް ޖިއާނީ އިންފަންޓީނޯ އާ އެކު ސާބިތުވެ ހުރިކަން އިއްޔެ ރަސްމީކޮށް އިއުލާނުކޮށްފިއެވެ.

ކާފްގެ އެގްޒެކެޓިވް ކޮމިޓީގެ ބައްދަލުވުމުގައި އިންފަންޓީނޯ އަށް އޮތް ތާއީދު ދެމެހެއްޓުމާ މެދު ގޮތެއް ނިންމުމަށް ހުށަހެޅުނު ހުށަހެޅުމަށް ހާޒިރުވި ހުރިހާ މެންބަރުން އެއްބަސްވިއެވެ. މި ނިންމުމާ އެކު ރިޔާސީ އިންތިޚާބުގައި އިންފަންޓީނޯ އަށް ތާއީދުކުރާކަން ހާމަކުރި ބައިނަލްއަޤުވާމީ ފެންވަރުގެ ފުރަތަމަ ކޮންފެޑެރޭޝަނަކަށް ކާފް ވެގެންދިޔައެވެ. ފީފާގައި ޖުމްލަ 211 މެންބަރު ޤައުމު ހިމެނޭ އިރު ކާފްގެ ދަށުގައި 54 މެންބަރު އެސޯސިއޭޝަން އެބައޮތެވެ.

ފީފާ ފޯވާޑް އެންޓަޕްރައިޒަސް ޕްލޭނާ ގުޅިގެން މެންބަރު ކޮންފެޑެރޭޝަންތަކުގެ ހިތްހަމަނުޖެހުން ފާޅުކުރުމުން އެ ހުށަހެޅުން އަނބުރައި ގެންދެވުމަކީ ރަނގަޅު ފިޔަވަޅެއް ކަމަށް ކާފްއިން ފާހަގަކުރިއެވެ. އަދި ގޯސް ހެދުނުކަމަށް ޤަބޫލުކޮށް މައާފަށް އެދިވަޑައިގަތުމުން އެ މައާފު ބަލައިގަންނަ ކަމަށް ވެސް ކާފްއިން ހާމަކުރިއެވެ. ހަމަ އެ ޕްލޭނާ ދެކޮޅު ހެދި ފަރާތްތަކުގެ ތެރޭގައި ޔޫއެފާ އާއި އޭއެފްސީ އާއި ކޮންކާކަފް ހިމެނެއެވެ. ނަމަވެސް އޭއެފްސީ އާއި ކޮންކާކަފް އިން އިންފަންޓީނޯ އަށް ތާއީދުކުރުމާ ގުޅޭ ގޮތުން އެއްވެސް ވާހަކައެއް ނުދައްކައެވެ.

ޔޫއެފާ އިން ވަނީ ފީފާގެ މުބާރާތްތައް ބޮއިކޮޓް ކުރުމުގެ ނިންމުން ދެމެހެއްޓުމުގެ އިތުރުން އިންފަންޓީނޯ އަށް އިތުބާރު ނެތް ކަމަށް ކަނޑައަޅައިފައެވެ. އެހެން ނަމަވެސް ކާފްއިން ދެކެނީ އިންފަންޓީނޯ ރައީސްކަމާ ހަވާލުވެވަޑައިގެންނެވީއްސުރެ އެފްރިކާގެ ފުޓްބޯޅައިގެ ކުރިއެރުމަށް ބޮޑު ސަމާލުކަމެއް ދެއްވި ކަމަށެވެ.

"ފީފާގެ ރައީސް ޖިއާނީ އިންފަންޓީނޯއަށް އޮތް ތާއީދު ކާފްގެ އެގްޒެކެޓިވް ކޮމިޓީން އިއްތިފާގުވެ އަލުން ކަށަވަރުކޮށްދެން. އަދި ފާއިތުވި އަހަރުތަކުގައި އެފްރިކާގެ ފުޓްބޯޅައަށް އޭނާ ދެއްވި އެއްބާރުލެއްވުމަށް ޝުކުރުއަދާކުރަން" ކާފްގެ ރަސްމީ ބަޔާނުގައި ބުނެފައިވެއެވެ.

ފީފާގެ ރިޔާސީ އިންތިޚާބު އޮންނާނީ އަންނަ އަހަރުގެ މާޗް މަހު މޮރޮކޯގައެވެ. މިހާތަނަށް އެ އިންތިޚާބުގައި ވާދަކުރައްވާނެކަން އިއުލާނުކުރައްވާފައި ވަނީ ހަތަރު ވަނަ ދައުރަކަށް ކުރިމަތިލައްވާ އިންފަންޓީނޯ އެކަންޏެވެ.