އެމްއޭސީއެލްގެ ބޯޑުން މިހާދު އާއި ސަޙަރު މިއަދު ވަކިކޮށްފި

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑިރެކްޓަރުންގެ ބޯޑުގައި ތިއްބެވި ދެ ބޭފުޅަކު މިއަދު އެ މަގާމުތަކުން ވަކިކޮށްފިއެވެ.

ވަކިކޮށްފައި ވަނީ އެމްއޭސީއެލްގެ އެގްޒެކެޓިވް ޑިރެކްޓަރު މުޙައްމަދު މިހާދު އާއި ބޯޑު މެންބަރު ސަޙަރު ވަޙީދެވެ. ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މި ނިންމުން ޢާންމުކޮށްފައިވީ ނަމަވެސް، ވަކިކުރި ސަބަބެއް ހާމަކޮށްފައެއް ނުވެއެވެ.

މިހާދު އެމްއޭސީއެލްގެ ބޯޑަށް އައްޔަންކުރައްވާފައި ވަނީ 26 އެޕްރީލް 2025 ގައެވެ. އޭނާ އަކީ އިނގިރޭސިވިލާތުގެ ސީމާ (ސީއައިއެމްއޭ) ކޮލިފައިޑް ޗާޓަޑް މެނޭޖްމަންޓް އެކައުންޓެންޓެކެވެ. މިހާދު ވަނީ ކުރިން އެސްޓީއޯގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމާއި އެ ކުންފުނީގެ ބޯޑު މެންބަރުކަން އަދާކުރައްވައިފައެވެ. އޭގެ އިތުރުން މިފްކޯ އާއި މޯލްޑިވްސް ސްޓޭޓް ޝިޕިން (އެމްއެސްއެސް) ގެ ބޯޑު މެންބަރުކަމާއި، އެފްއެސްއެމްގެ ޗެއާމަންކަމާއި، އޮޑިޓް ފާމް ކޭޕީއެމްޖީ މޯލްޑިވްސްގެ ޕާޓްނަރެއްގެ ގޮތުގައި ވެސް އޭނާ ޚިދުމަތް ކުރައްވައިފައިވެއެވެ.

ސަޙަރު އެމްއޭސީއެލްގެ ބޯޑަށް އައްޔަންކުރެއްވީ 24 ޑިސެމްބަރު 2023 ގައެވެ. މާލީ ދާއިރާގެ އިސް މަގާމުތަކުގައި 17 އަހަރަށް ވުރެ ގިނަ ދުވަހު ޚިދުމަތް ކުރައްވައިފައިވާ ސަޙަރު އަކީ ޕްރޮފެޝަނަލް ޗާޓަޑް ބޭންކަރެކެވެ. އޭނާ ވަނީ ލަންޑަން ސްކޫލް އޮފް އިކޮނޮމިކްސް (އެލްއެސްއީ) އިން އިކޮނޮމިކްސްގެ ފުރަތަމަ ޑިގްރީ އަދި ޔުނިވާސިޓީ އޮފް ވެސްޓް އިންގްލެންޑުން ކޮމާޝަލް ލޯގެ ދާއިރާއިން މާސްޓާސް ޙާޞިލުކުރައްވައިފައެވެ.