ތަހުގީގުތައް އަވަސްކުރުމާއި ޝިކާރައަށްވާ ފަރާތްތަކަށް މައުލޫމާތު ދިނުން ހަރުދަނާކުރުމަށް ސީޕީ ބާރުއެޅުއްވައިފި
ޖިނާއީ މައްސަލަތަކުގެ ތަހުގީގު ހަލުވިކުރުމަށާއި، ކުށުގެ ޝިކާރައަށްވާ ފަރާތްތަކާއި މައްސަލަ ހުށަހަޅާ ފަރާތްތަކަށް ތަހުގީގު ކުރިއަށްދާ ގޮތުގެ މައުލޫމާތު ގަވާއިދުން ދިނުމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު މިއަދު އެދިވަޑައިގެންފިއެވެ.
ޖިނާއީ މައްސަލަތަކުގެ ތަހުގީގު ހަލުވިކުރުމަށާއި، ކުށުގެ ޝިކާރައަށްވާ ފަރާތްތަކާއި މައްސަލަ ހުށަހަޅާ ފަރާތްތަކަށް ތަހުގީގު ކުރިއަށްދާ ގޮތުގެ މައުލޫމާތު ގަވާއިދުން ދިނުމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު މިއަދު އެދިވަޑައިގެންފިއެވެ.
ކޮމިޝަނަރ މިގޮތަށް އެދިވަޑައިގެންނެވީ ސެންޓްރަލް އިންވެސްޓިގޭޝަން ކޮމާންޑުގެ އިސް އޮފިސަރުންނާ އެކު ސާޖަންޓް އާދަމް ޙަލީމް ކްރިމިނަލް އިންވެސްޓިގޭޝަން ބިލްޑިންގުގައި ބޭއްވެވި ބައްދަލުކުރެއްވުމެއްގައެވެ. އެ ބައްދަލުކުރެއްވުމުގެ ބޭނުމަކީ ތަހުގީގީ ދާއިރާގެ ޤާބިލުކަން އިތުރުކުރުމާއި، މަސައްކަތުގެ ހަލުވިމިން ރަނގަޅުކުރުމާއި، އަނިޔާ ލިބޭ ފަރާތްތަކަށް ދެވޭ ޚިދުމަތުގެ ފެންވަރު މަތިކުރުމާ މެދު މަޝްވަރާ ކުރެއްވުމެވެ.
ކޮމިޝަނަރ ވަނީ ތަހުގީގުގެ މިންގަނޑުތަކާއި ހެކީގެ ރައްކާތެރިކަމަށް ބުރޫ ނާރާނެ ހެން ތަހުގީގުތައް ފުރިހަމައަށް އަދި އަވަހަށް ނިންމުމުގެ މުހިންމުކަމާ މެދު ވާހަކަފުޅު ދައްކަވައިފައެވެ. ލަސްވުންތައް ކުޑަކުރުމާއި ނުނިމި ހުރި މައްސަލަތައް މަދުކުރުމަށް ޚާއްޞަ ސަމާލުކަމެއް ދެއްވުމަށާއި، ތަހުގީގުކުރާ ބަހާތަކުގެ ދެމެދުގައި އޮންނަ ގުޅުން ހަރުދަނާކުރެއްވުމަށް ވެސް އިރުޝާދު ދެއްވިއެވެ. މީގެ އިތުރުން، މައްސަލަ ކުރިއަށްދާ މަރުހަލާތަކުގެ މައުލޫމާތު ގަވާއިދުން ހިއްސާކުރުމަކީ ފުލުހުންގެ މުއައްސަސާއަށް ރައްޔިތުންގެ އިތުބާރު ދެމެހެއްޓުމަށް ކޮންމެހެން ބޭނުންތެރި ކަމެއް ކަމަށް ފާހަގަކުރައްވައި، އަނިޔާ ލިބޭ ފަރާތްތަކާ މުއާމަލާތްކުރުމުގައި އޯގާތެރިކަމާއި އިހުތިރާމާއި ޕްރޮފެޝަނަލިޒަމް އިސްކުރެއްވުމަށް ބާރުއެޅުއްވިއެވެ.
ޒަމާނީ ކުށްތައް ބަދަލުވަމުން ދާ ގޮތާ އެއްވަރަށް ގޮންޖެހުން ބޮޑު މައްސަލަތައް ތަހުގީގުކުރެވޭ ފެންވަރަށް އިންވެސްޓިގޭޝަން އޮފިސަރުން ބިނާކުރެއްވުމުގެ މުހިންމުކަން ވެސް ކޮމިޝަނަރ ފާހަގަކުރެއްވިއެވެ. ޒަމާނީ ޓެކްނޮލޮޖީއާއި އިންޓެލިޖެންސާއި ފައިނޭންޝަލް އެނަލިޓިކްސް ފުޅާ ދާއިރާއެއްގައި ބޭނުންކުރެއްވުމަށް އެދިވަޑައިގެންނެވީ ވެސް މި ބައްދަލުކުރެއްވުމުގައެވެ. ހަމައެއާ އެކު ކޮންމެ ފަންތިއެއްގައި ވެސް ޖަވާބުދާރީވުމާއި ސުލޫކީ އަދި އަޚްލާޤީ މަތީ މިންގަނޑުތައް ހިފެހެއްޓެވުމަށް ކޮމިޝަނަރ އެދިވަޑައިގެންނެވިއެވެ.
ސެންޓްރަލް އިންވެސްޓިގޭޝަން ކޮމާންޑަކީ ޖިނާއީ ބޮޑެތި ކުށްތަކާއި ޚާއްޞަ މައްސަލަތައް ތަހުގީގުކުރުމުގެ ޒިންމާ އުފުލާ ބަހާއެވެ. އެ ކޮމާންޑުގެ ދަށުން ފައިނޭންޝަލް އެނަލިޓިކްސް، ހުޅުމާލެ ސީރިއަސް ކްރައިމް އިންވެސްޓިގޭޝަން، ޑްރަގް އެންފޯސްމަންޓް، ގޭންގް ކްރައިމް އެންފޯސްމަންޓް، ފެމިލީ އެންޑް ޗައިލްޑް ޕްރޮޓެކްޝަން، މޭޖަރ ކްރައިމް އިންވެސްޓިގޭޝަންސް، އިކޮނޮމިކް ކްރައިމް އިންވެސްޓިގޭޝަންސް އަދި ސްޕެޝަލިސްޓް އިންވެސްޓިގޭޝަން ސަޕޯޓުގެ މަސައްކަތް ކުރިއަށް ގެންދެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް