ޑރ. އަޒްމިރާލްދާގެ މައްސަލައިގައި ހެކި ނެތިގެން ފުލުހުން މައްސަލަ ފައިލްކޮށްފި

ސުޕްރީމް ކޯޓުގެ ކުރީގެ ފަނޑިޔާރު ޑރ. އަޒްމިރާލްދާ ޒާހިރު މަގާމުގެ ނުފޫޒު ބޭނުންކުރެއްވި ކަމަށް ބެލި މައްސަލައިގައި ޖިނާއީ ދައުވާ ކުރެވޭ މިންވަރަށް ހެކި ނެތް ކަމަށް ކަނޑައަޅައި ފުލުހުން އެ މައްސަލަ ފައިލްކޮށްފިއެވެ.

ޕްރޮސެކިއުޓާ ޖެނެރަލް (ޕީޖީ) ގެ އޮފީހުން ތަހުގީގު ފައިލް ދިރާސާކުރުމަށް ފަހު، ޖިނާއީ ކުށެއް ސާބިތުވާ ފަދަ ހެއްކެއް ނެތް ކަމަށް ނިންމީ ކަމަށް ފުލުހުން ބުނެފައިވެއެވެ. ޕީޖީގެ އެ ނިންމެވުމާ ގުޅިގެން ފުލުހުން ވެސް ހެއްކާއި ގަރީނާ އިތުރަށް ވަޒަންކޮށް މައްސަލަ ނިންމީ ކަމަށް ބުނެފައިވެއެވެ. ނަމަވެސް މި މައްސަލައާ ގުޅިގެން އެންޓި-ކޮރަޕްޝަން ކޮމިޝަން (އޭސީސީ) އިން ވަކިން ހިންގާ ތަހުގީގާ ބެހޭ އެއްވެސް ތަފްސީލެއް އެ ކޮމިޝަނުން ހާމަކޮށްފައެއް ނުވެއެވެ.

މިދިޔަ އަހަރުގެ ފެބްރުއަރީ 27 ވަނަ ދުވަހު ސުޕްރީމް ކޯޓުގެ ތިން ފަނޑިޔާރުން ކަމުގައިވާ ޑރ. އަޒްމިރާލްދާއާއި މަހާޒު އަލީ ޒާހިރު އަދި ހުސްނުއްސުއޫދުގެ މައްޗަށް ޖިނާއީ ތަހުގީގެއް ހިންގާ ކަމަށް އޭސީސީން ޖުޑީޝަލް ސާވިސް ކޮމިޝަން (ޖޭއެސްސީ) އަށް އެންގިއެވެ. ޖޭއެސްސީން ހަމަ އެ ދުވަހު ތިން ފަނޑިޔާރުން ސަސްޕެންޑުކުރީ، މަޖިލިސް މެންބަރުން ޕާޓީ ބަދަލުކުރުމުން ގޮނޑި ގެއްލޭ ގޮތަށް ޤާނޫނުއަސާސީއަށް ގެނައި އިސްލާހާ ދެކޮޅަށް ހުށަހެޅި ދުސްތޫރީ މައްސަލައެއް ސުޕްރީމް ކޯޓުގައި ބައްލަވަމުން ގެންދެވި ދަނޑިވަޅުގައެވެ. މިދިޔަ އަހަރުގެ މާރިޗު ހަ ވަނަ ދުވަހު ފަނޑިޔާރު ސުއޫދު އަމިއްލަފުޅަށް އިސްތިއުފާ ދެއްވިއިރު، ޑރ. އަޒްމިރާލްދާއާއި މަހާޒު މަގާމުން ވަކިކުރީ މެއި 14 ވަނަ ދުވަހު ރައްޔިތުންގެ މަޖިލީހުން ފާސްކޮށްގެންނެވެ.

ސުއޫދާއި ޑރ. އަޒްމިރާލްދާ ވިދާޅުވެފައި ވަނީ "ސަރުކާރުން ސުޕްރީމް ކޯޓަށް ނުފޫޒު ފޯރުވައިގެން ދުސްތޫރީ މައްސަލަ ހުއްޓުވަން މަސައްކަތް ކުރި" ކަމަށެވެ. ސަރުކާރުން ވަނީ އެ ތުހުމަތުތައް ދޮގުކޮށްފައެވެ. ޖަވާބުދާރީވުމަށް އެކަށީގެންވާ ފުރުސަތެއް ނުދީ ވަކިކުރި ކަމުގެ ކަންބޮޑުވުން އެ ފަނޑިޔާރުންނާއި ބައިނަލްއަޤުވާމީ ޤާނޫނީ ޖަމާޢަތްތަކުން ވެސް ފާޅުކޮށްފައިވެއެވެ.

ފުލުހުންގެ ތަހުގީގު ނިމުނު ނަމަވެސް، އޭސީސީގެ ތަހުގީގު ކުރިއަށް ދާ ކަމެއް ނުވަތަ ނިމިފައިވާ ކަމެއް އެ ކޮމިޝަނުން ސާފުކޮށްދީފައެއް ނުވެއެވެ.