ހުކުރު ދުވަހު މެންދުރު ކެއުމަށްފަހު ފޮނި އެއްޗެއް ކާލުމަކީ ގިނަ މީހުންގެ އާދައަކަށް ވެފައިވާ ކަމަށެވެ. އެހެންވީމާ މިއަދު މި ގެނެސްދެނީ ފަސޭހައިން، ތަންކޮޅެ މަދު ތަކެތި ބޭނުން ކޮށްގެން ތައްޔާރު ކޮށްލެވޭނެ ބްރައުނީއެއްގެ ރެސިޕީ އެވެ. 

ބޭނުންވާ ތަކެތި

1 1/3 ޖޯޑު ހަކުރު

2/3 ޖޯޑު މެލްޓެޑް ބަޓާ

2 ބިސް

2/3 ޖޯޑު ފުށް

1/2 ޖޯޑު ކޮކޯ ޕައުޑާ

1/2 ސައިސަމުސާ ބޭކިންޕައުޑާ

3/4 ސައިސަމުސާ ލޮނު

150ގ ޗޮޕް ކޮށްފައި ހުރި ޗޮކޮލެޓް ( ބޭނުން ނަމަ) 

ތައްޔާރުކުރާނެ ގޮތް

1) އެންމެ ފުރަތަމަ މިކްސަރުން ހަކުރުކޮޅު ހިމުންވަންދެން ރަނގަޅަށް މުގުރާލާށެވެ. 

2) ދެން ހަކުރާއި މެލްޓެޑް ބަޓާ ތައްޓަކަށް އަޅައި, އަތުން ވިސްކް ކުރާ އެއްޗެއް ބޭނުން ކޮށްގެން، އެއްކޮށް ސްމޫތް ވަންދެން ވިސްކް ކޮށްލާށެވެ. 

3) އެއަށްފަހު ބިސް އެޅުމަށްފަހުގައިވެސް ރަނގަޅަށް އެކުވެ ސްމޫތް ވަންދެން ވިސްކް ކޮށްލާށެވެ.

4) ދެން ފުށާއި، ކޮކޯ ޕައުޑަރު އަދި ލޮނު އޭގެ ތެރެއަށް އަޅާލުމަށްފަހު، ވަރަށް މަޑުމަޑުން، ރަބަރު ސްޕެޓޫލާ އަކުން އެކުލަވާލާށެވެ. މާ ބާރަށް ވިސްކު ނުކުރާށެވެ. 

5) އެކުވުމުން ޗޮކުލެޓް އަޅާލުމަށްފަހުވެސް އެކުލަވާލާށެވެ. 

6) ޓްރޭއެއް މައްޗާއެކު ޕާޝްމަންޓް ޕޭޕާ އަޅާލުމަށްފަހު، މަތީގައި ކުޑަ މެލްޓެޑް ބަޓާ ކޮޅެއް ބްރަޝްކޮށްލާށެވެ.

7) ދެން ބްރައުނީ މިކްސް ޓްރޭއަށް އަޅާލާށެވެ. އަދި މައްޗަށްވެސް ޗޮޕް ކޮށްފައި ހުރި ޗޮކޮލެޓް އަޅާލާށެވެ. 

8) 175 ޑިގްރީސެލްސިއަސް ގައި 10 މިނެޓްވަންދެން އަވަން ޕްރީ ހީޓް ކޮށްލާށެވެ. އެއަށްފަހު ބްރައުނީ އަވަނަށް ލައި، 20-25 މިނެޓްވަންދެން ފިހެލާށެވެ. 

9) ފިހެވުމުން އަވަނުން ނަގާފައި، 20 ވަރަކަށް މިނެޓް ހިހޫ ކުރަން ބަހައްޓާށެވެ. ހިހޫ ވުމުން ސްލައިސް ކޮށްލައިގެން ވެނީލާ އައިސް ކްރީމްއާ އެކު ކާލަން ވަރަށް މީރުވާނެއެވެ.