މަޖިލީހުގެ ދެވަނަ ދައުރު 27 އޮގަސްޓާ ހަމައަށް ދެމިގެންދާ ގޮތަށް ފާސްކޮށްފި

ނުނިމި ހުރި މުހިންމު މަސައްކަތްތައް ނިންމުމަށްޓަކައި ރައްޔިތުންގެ މަޖިލީހުން މިއަހަރުގެ ދެވަނަ ދައުރުގެ މުއްދަތު ދެވަނަ ފަހަރަށް އިތުރުކޮށް މިމަހުގެ 27 ވަނަ ދުވަހާ ހަމައަށް ޖަލްސާތައް ކުރިއަށް ގެންދިޔުމަށް 58 މެންބަރުންގެ ވޯޓުން ފާސްކޮށްފިއެވެ.

މި ބަދަލު ގެނައުމަށް ރިޔާސަތުން ހުށަހެޅުއްވީ މަޖިލީހުގެ ރައީސް ޢަބްދުއްރަޙީމް ޢަބްދުﷲ ކަމަށް ވާއިރު އެމަނިކުފާނު ވިދާޅުވީ ދައުރުގައި ނިންމަން ޖެހޭ އެކި މަސައްކަތްތައް އެބަ ހުރި ކަމަށާއި ކޮމިޓީ މަރުހަލާގައި ވެސް ގިނަ ކަންކަން ފުނިޖެހިފައިވާ ކަމަށެވެ.

މަޖިލީހުގެ ގަވާއިދު ބުނާ ގޮތުން ދެވަނަ ދައުރު ނިމެނީ އޮގަސްޓް 15 ގައެވެ. އެ ތާރީޚާ ހަމައަށް ޖަލްސާތައް ނިންމެން ނެތުމުން މިދިޔަ ހަފުތާ ތެރޭގައި ފުރަތަމަ ފަހަރަށް ބުރާސްފައްޗާ ހަމައަށް މުއްދަތު ދެންމީއެވެ.

ނަމަވެސް އެ މުއްދަތުގެ ތެރޭގައި ވެސް ހުރިހާ ކަމެއް ފުރިހަމަ ނުވުމުން މިހާރު ދެވަނަ ފަހަރަށް އިތުރުކޮށް އަންނަ ހަފުތާގެ ބުރާސްފައްޗާ ހަމައަށް ދައުރު ވަނީ ދަމާލައިފައެވެ.

މަޖިލީހުގެ ގަވާއިދު ބަޔާންކުރާ ގޮތުގައި ކޮންމެ އަހަރަކު ވެސް ތިން ދައުރަކަށް ޖަލްސާތައް ބެހިގެންދެއެވެ. ފެބްރުއަރީ އެކަކުން މެއި 15 އަށް ފުރަތަމަ ދައުރު ކުރިއަށްދާ އިރު ޖޫން އެކެއް އިން އޮގަސްޓް 15 އާ ހަމައަށް ދެވަނަ ދައުރު ހިނގައެވެ. ތިންވަނަ ދައުރުގެ ޖަލްސާތައް ކުރިއަށް ގެންދަނީ އޮކްޓޫބަރު އެކެއް އިން ނޮވެމްބަރު މަހުގެ ނިޔަލަށެވެ. ދައުރުގެ މުއްދަތު ފަހަނައެޅި ނަމަވެސް ހުށަހެޅިފައިވާ ކަންކަން ނުނިމެނީނަމަ މެންބަރުންގެ ވޯޓަކުން ފާސްކޮށްގެން މުއްދަތު އިތުރުކުރެވޭ ގޮތް ގަވާއިދުގައި ވަނީ ހަމަޖެހިފައެވެ.