ހިމަބިއްސަށް ފައްސިވާ މީހުންގެ އަދަދު ވަރަށް ބޮޑަށް ދަށަށް ގޮސްފި

މިދިޔަ ހަފުތާގައި ހިމަބިއްސަށް ފައްސިވީ އެންމެ ދެ މީހުން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ބުނެފިއެވެ.

އެޗްޕީއޭއިން މިއަދު ޢާންމުކުރި ތަފާސްހިސާބުތައް ދައްކާ ގޮތުން، މިދިޔަ ހަފުތާގެ ދެ ކޭސްއާ އެކު މި އަހަރު ހިމަބިހި ޖެހުނު މީހުންގެ ޖުމުލަ އަދަދު ވަނީ 282 އަށް އަރައިފައެވެ. ހިމަބިހިން ރައްކާތެރިވުމަށް ދޭ ވެކްސިންގެ ޑޯޒްތައް ފުރިހަމަ ނުކޮށް ތިބި ފަރާތްތަކަށް ވެކްސިން ދިނުމުގެ މަސައްކަތް އެ އެޖެންސީން ކުރިއަށް ގެންދާ އިރު، މި އަހަރު މިހާތަނަށް 16,453 މީހަކު ވެކްސިން ޖަހައިފައިވެއެވެ.

ވެކްސިންގެ ދެ ޑޯޒް ފުރިހަމަކޮށްފައިވާ ކަން ޔަޤީން ނުވާ ފަރާތްތައް ވެކްސިން ދޭ މަރުކަޒުތަކަށް ޒިޔާރަތްކޮށް ވެކްސިން ފުރިހަމަ ކުރުމަށް އެޗްޕީއޭއިން ވަނީ އިލްތިމާސްކޮށްފައެވެ. ހިމަބިއްސަކީ ގައިންގަޔަށް ފަސޭހައިން އަރާ ބައްޔެއް ކަމުން، ވެކްސިން ފުރިހަމަ ކުރުމުގެ މުހިންމުކަން އެ އެޖެންސީން ދަނީ ތަކުރާރުކޮށް ފާހަގަކުރަމުންނެވެ.

ހިމަބިހި ނައްތައިލެވިފައިވާ ޤައުމެއްގެ ގޮތުގައި ރާއްޖެ ކަނޑައަޅައިފައި އޮއްވައި، މި އަހަރުގެ މެއި މަހުގެ ތެރޭގައި އެ ބަލީގެ ކޭސްތައް ފެންނަން ފެށީ އަލުންނެވެ. އޭގެ ފަހުން ބަލި ފެތުރުން އިތުރުވީ ނަމަވެސް، މިހާރު ފައްސިވާ މީހުންގެ އަދަދު ވަނީ ފާހަގަކޮށްލެވޭ މިންވަރަކަށް ދަށަށް ގޮސްފައެވެ.