ބިދޭސީ މަސައްކަތްތެރިންނަށް ދޫކުރެވޭ ސިމް ކާޑުގެ ޢަދަދު އެކަކަށް ލިމިޓުކުރަން ނިންމައިފި

ރާއްޖޭގައި ހުނަރުވެރި ނޫން ބިދޭސީ މަސައްކަތްތެރިންނަށް ދެން ގެންގުޅެވޭނީ އެންމެ ސިމް ކާޑެއް ކަމަށް ވަޒީރުންގެ މަޖިލީހުން ނިންމައިފިއެވެ.

މިދިޔަ އާދީއްތަ ދުވަހުގެ ވަޒީރުންގެ މަޖިލީހުގައި ފާސްކުރި މި ނިންމުމުގެ ތަފްޞީލް ރައީސް އޮފީހުން ހާމަކޮށްފައިވާ ގޮތުގައި މި ބާވަތުގެ ބިދޭސީ ފަރާތަކަށް ދޫކުރެވޭނީ ހަމައެކަނި އެއް ސިމް ކާޑެވެ.

އެ ސިމް ކާޑު ގެއްލުމެއް ނުވަތަ ހަލާކުވުމެއް ދިމާވެއްޖެ ނަމަ ފުލުހުންނަށް ރިޕޯޓު ހުށަހެޅުމަށް ފަހު ކަނޑައެޅިފައިވާ ވަކި އިޖުރާއަތްތަކެއް ފުރިހަމަކޮށްގެން ނޫނީ އާ ނަންބަރެއް ލިބެން ނޯންނާނެ ކަމަށް ރައީސް އޮފީހުން ބުނެފައިވެއެވެ.

ހަމައެހެންމެ ޖަލުތަކުގެ ތެރެއަށް ޤާނޫނާ ޚިލާފަށް ސިމް ކާޑު ވައްދާ މައްސަލައާ ގުޅިގެން އެ ސިމް ކާޑުތައް ރަޖިސްޓަރީކޮށްފައިވާ ފަރާތްތަކާ ދެކޮޅަށް ޤާނޫނީ އަދި އިދާރީ ފިޔަވަޅު އެޅުމަށް ވެސް ވަޒީރުންގެ މަޖިލީހުން ނިންމާފައިވެއެވެ.

ވަޒީފާ އަދާކުރުމަށް ރާއްޖެ އަންނަ ބިދޭސީންގެ ނަމުގައި ސިމް ކާޑު ނެގުމަށް ފަހު ސްކޭމް ހިންގުމާއި އެ ނޫން ވެސް ކުށުގެ ޢަމަލުތަކުގައި އެ ސިމް ކާޑުތައް ބޭނުންކުރާ މައްސަލަ ވަނީ ބޮޑުވެފައެވެ. މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން މިދިޔަ މަހު ޢާންމުކޮށްފައިވާ ތަފާސްހިސާބުތައް ދައްކާ ގޮތުން ރާއްޖޭގައި ދިރިއުޅޭ ޖުމްލަ 590,079 މީހުންގެ ތެރެއިން 196,024 މީހުންނަކީ ބިދޭސީންނެވެ.