އަނގޮޅިތީމުގައި ދޮށީ އުމުރުގެ އަންހެނަކަށް ޖިންސީ ގޯނާކުރި މީހާ 15 ދުވަހަށް ބަންދުކޮށްފި

ރ. އަނގޮޅިތީމުގައި 72 އަހަރުގެ އަންހެނަކަށް ގަދަކަމުން ޖިންސީ ގޯނާކޮށް މަރުގެ އިންޒާރު ދިން މައްސަލައިގައި ހައްޔަރުކުރި މީހާ 15 ދުވަހަށް ބަންދުގައި ބެހެއްޓުމަށް ކޯޓުން މިރޭ އަމުރުކޮށްފިއެވެ.

ފުލުހުން ބުނީ އަނގޮޅިތީމުގެ ގެއަކަށް މީހަކު ވަދެ އެ އަންހެން މީހާއާ މެދު ގަދަކަމުން ޖިންސީ ގޯނާކޮށް މަރާލާނެ ކަމަށް ބުނެ އިންޒާރު ދިން މައްސަލަ ސެޕްޓެމްބަރު 27 ވަނަ ދުވަހުގެ ރޭ 8:30 އެހާކަންހާއިރު ހުށަހެޅި ކަމަށެވެ.

އަނިޔާ ލިބުނު މީހާއަށް އަނގޮޅިތީމު ހެލްތު ސެންޓަރުގައި ފަރުވާ ދިނުމަށް ފަހު ވަނީ ދޫކޮށްލައިފައެވެ.

މި މައްސަލައާ ގުޅިގެން ހައްޔަރުކުރި މީހާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހުގެ ބަންދުގެ އަމުރެއް ކޯޓުން ނެރެފައިވާ ކަމަށް ފުލުހުން ބުނެފައިވެއެވެ.