ހޮޓެލް އޭޝިއާގައި އެސްޓީއޯއިން އައު ބްރޭންޑެއް ތައާރަފުކޮށް ރަހަ ބެލުމުގެ ފުރުސަތު ދެނީ

ހުޅުމާލޭ ސިންތެޓިކް ޓްރެކުގައި ކުރިއަށްދާ ހޮޓެލް އޭޝިއާ މޯލްޑިވްސް 2026 އެގްޒިބިޝަނުގައި ތިން ދާއިރާއަކުން ބައިވެރިވާ ކަމަށާއި މިއަދު މުޅިން އައު ބްރޭންޑެއް ތައާރަފުކުރުމަށް ރާވާފައިވާ ކަމަށް އެސްޓީއޯއިން ބުނެފިއެވެ.

އެ ކުންފުނިން ބައިވެރިވަނީ ޖެނެރަލް ޓްރޭޑިންގެ އިތުރުން ޕީޕަލްސް ޗޮއިސް އަދި އެނާޖީ ދާއިރާއިންނެވެ. އެގްޒިބިޝަނުގެ ދެވަނަ ދުވަހު ތައާރަފުކުރާ އައު ބްރޭންޑުގެ ޕްރޮޑަކްޓް ބޭނުންކޮށްގެން ތައްޔާރުކުރާ އައިސްކްރީމާއި ފޮނި ކާތަކެތީގެ ރަހަ ބެލުމުގެ ފުރުސަތު ސްޓޯލަށް ޒިޔާރަތްކުރާ ފަރާތްތަކަށް ލިބޭނެ ކަމަށް އެސްޓީއޯއިން ބުނެފައިވެއެވެ.

އެސްޓީއޯ ސުޕާމާކެޓުން ލިބެން ހުންނަ ޕްރޮޑަކްޓްތައް ބޭނުންކޮށްގެން ވަގުތުން ލުއި ކާނާ ތައްޔާރުކޮށްދޭ ސްޓޭޝަނެއް އެ ސްޓޯލުގައި ގާއިމުކޮށްފައިވެއެވެ. ތިން ދުވަހުގެ މުއްދަތަށް ކުރިއަށްދާ މި އެގްޒިބިޝަނުގައި ކޮފީސްޓޭޓް ބްރޭންޑުގެ ވަކި ބުއިންތަކެއް ހިލޭ ލިބޭނެ ކަމަށާއި ރާއްޖެއަށް އެތެރެކުރާ ތަފާތު ޕްރޮޑަކްޓްތަކާ ބެހޭ މައުލޫމާތު ސްޓޯލުން ފޯރުކޮށްދޭނެ ކަމަށް ވެސް އެ ކުންފުނިން ހާމަކޮށްފައިވެއެވެ. އެނާޖީ ދާއިރާއިން ބައިވެރިވާ ބައިގައި ރިޒޯޓު ކަސްޓަމަރުންނަށް ޚާއްސަކޮށް ތެޔޮ އުފުލައިދިނުމުގެ ޚިދުމަތްތަކާ ގުޅޭ މައުލޫމާތު ފޯރުކޮށްދީ، އެ މާކެޓުގައި ކަސްޓަމަރުންގެ ބޭނުންތައް ދެނެގަތުމަށް ވަނީ ހަމަޖައްސައިފައެވެ.

ސްޓޯލަށް ޒިޔާރަތްކޮށް ރަޖިސްޓަރީ ކުރާ ފަރާތްތަކުގެ މެދުގައި ކޮންމެ ދުވަހަކު ގުރުއަތުން ނަސީބުވެރި ފަރާތެއް ހޮވައި އިނާމު ދިނުމަށް "ރެޖިސްޓާ އެންޑް ވިން" ޕްރޮމޯޝަނެއް ހިންގުމަށް ވެސް ވަނީ ނިންމައިފައެވެ. އޭގެ އިތުރުން ޕީޕަލްސް ޗޮއިސް ޕޭޖް ފޮލޯ ކުރާ ފަރާތްތަކުގެ ތެރެއިން ނަސީބުވެރި ފަރާތަކަށް ޑިޝްވޮޝަރެއް ލިބުމުގެ ފުރުސަތު ވެސް ވަނީ ހުޅުވައިލައިފައެވެ.