ރަސްމާލޭ ބިމުގެ އެއްބަސްވުން ހާމަނުކޮށް ކުރިއަށް ގެންދާތީ ފައްޔާޒު ކަންބޮޑުވުން ފާޅުކުރައްވައިފި

ރަސްމާލޭގެ 500 ހެކްޓަރުގެ ބިން ޔޫއޭއީގެ އީގަލް ހިލްސް ކުންފުންޏާ ހަވާލުކުރުމަށް ސަރުކާރުން ވެފައިވާ އެއްބަސްވުމުގެ ވިޔަފާރީގެ ޝަރުތުތައް ރައްޔިތުންނަށް ހާމަނުކޮށް އެ މަޝްރޫޢު ކުރިއަށް ގެންދާތީ ކަންބޮޑުވުން ފާޅުކުރައްވައި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް މިއަދު ބަޔާނެއް ނެރުއްވައިފިއެވެ.

އެމްޑީޕީގެ ރިޔާސީ ޓިކެޓަށް ވާދަކުރައްވާ ފައްޔާޒު ނެރުއްވި ބަޔާނުގައި ވިދާޅުވެފައިވާ ގޮތުގައި ބޭރުގެ ވިޔަފާރިތަކުން ރާއްޖޭގައި އިންވެސްޓުކުރުމަށް އެމްޑީޕީން އަބަދުވެސް ތާއީދުކުރެއެވެ. އެހެން ނަމަވެސް މި ފެންވަރުގެ ބޮޑެތި މަޝްރޫޢުތައް ކާމިޔާބުކަމާ އެކު ހިންގޭނީ ހަރުދަނާ މާލީ އަދި ޤާނޫނީ ނިޒާމެއް ޤާއިމުކޮށް، ޓެކްސް އުސޫލުތައް ސާފުކޮށް ބާއްވައި، މައްސަލަ ޙައްލުކުރެވޭނެ އިތުބާރު ހިފޭ އިންތިޒާމެއް އޮވެގެން ކަމަށް އެ ބަޔާނުގައި ވެއެވެ. ރަސްމާލޭގެ 500 ހެކްޓަރު ބިމަށް އަގު ކަނޑައެޅި ގޮތް ސާފުނުވާ ކަމަށާއި ދޫކުރާ ބިމުން ދައުލަތަށް އެކަށީގެންވާ އާމްދަނީއެއް ލިބޭނެކަން ކަށަވަރުކުރެވެން ނެތް ކަމަށް ވެސް ފައްޔާޒު ވިދާޅުވެފައިވެއެވެ.

"މޯލްޑިވްސް ވޯޓާފްރޮންޓް އެންޑް މެރީނާ"ގެ ނަމުގައި އީގަލް ހިލްސްއާ އެކު ސޮއިކުރި އެއްބަސްވުމާ ގުޅޭ ގޮތުން ސަރުކާރުން މަޢުލޫމާތު އޮޅުވައިލާ ކަމަށް ވެސް ފައްޔާޒު ތުހުމަތުކުރެއްވިއެވެ. ސަރުކާރުގެ ނޫސް ބަޔާނުގައި ފިޔަވަހިތަކަކަށް ބަހާލައިގެން 20 ބިލިއަން ޑޮލަރު ހޭދަކުރާނެ ކަމަށް ބުނި ނަމަވެސް އީގަލް ހިލްސްއިން ނެރުނު ބަޔާނުގައި އެއްވެސް ޢަދަދެއް ހިމަނައިފައި ނެތް ކަން ފައްޔާޒު ފާހަގަކުރެއްވިއެވެ.

"...މިފަދަ އިންވެސްޓްމެންޓްތައް ގެންނަން ޖެހޭނީ ހާމަކަންބޮޑުކޮށް ދެފަރާތުގެ ހައްގުތައް ވެސް ރައްކާ ކުރެވޭނެ އިޖުރާއަތްތަކެއްގެ ތެރެއިންނެވެ. އެހެން ނަަމަވެސް ރަސްމާލޭގެ ދެބައިކުޅައެއްބައި ބޭރުގެ ކުންފުންޏަކަށް ދޭން ސަރުކާރުން ވެފައިވާ އެއްބަސްވުމުގައި މީގެ އެއްވެސް ޝަރުތެއް ފުރިހަމައެއް ނުވެ އެވެ" ފައްޔާޒު ވިދާޅުވެފައިވެއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ފައްޔާޒު ވިދާޅުވީ މި އެއްބަސްވުމުގެ ސަބަބުން ދިގު ރާސްތާގައި ޤައުމަށް ކުރާނެ އަސަރުތައް ރައްޔިތުންނަށް ސާފުކޮށްދީ، ރައްޔިތުންގެ ސުވާލުތަކަށް ޖަވާބު ދެވެން ޖެހޭ ކަމަށެވެ.

މި މައްސަލައިގައި ހައުސިން މިނިސްޓަރު ޑރ. ޢަބްދުﷲ މުއްތަލިބު ވަނީ ރަސްމާލެއިން ބިމުގެ މިލްކުވެރިކަން ނުވަތަ ފްރީހޯލްޑެއް ދޫނުކުރައްވާނެ ކަމުގެ ޔަޤީންކަން ދެއްވައިފައެވެ. "ރަސްމާލޭގެ އެއްވެސް ތަނެއް ސަރުކާރުގެ ހުއްދައެއް ނެތި އެކަކު އަނެކަކުގެ މެދުގައި ގަނެ ވިއްކައި ނުވަތަ ބަދަލެއް ނުކުރެވޭނެ. ކޮންމެ ޕްރޮޕަޓީއެއް ވިއްކާއިރު ސަރުކާރަށް ހުށަހަޅަން ޖެހޭނެ. އަދި ސަރުކާރުން އެ ތަނެއް ލިބޭ ފަރާތް ބަލައި އެކަމުގެ ހުއްދަ ދިނުމާއި ނުދިނުމަށް ނިންމުމުގެ އިހްތިޔާރު ލިބިގެންވޭ" މިނިސްޓަރު ވިދާޅުވެފައިވެއެވެ. ރަސްމާލެއިން ޕްރޮޕަޓީއެއް ގަތް ނަމަވެސް ރާއްޖޭގައި ދިރިއުޅުމުގެ ޙައްޤެއް ލިބޭނީ ރާއްޖޭގެ އިމިގްރޭޝަން ޤާނޫނާ އެއްގޮތަށް ކަމަށް ވެސް މިނިސްޓަރު ވިދާޅުވެފައިވެއެވެ.

ރާއްޖޭގެ ތާރީޚުގައި ވެސް ހިންގާ އެންމެ ބޮޑު ބޭރުގެ އިންވެސްޓްމެންޓް ކަމަށް ސިފަކުރާ މި މަޝްރޫޢާ މެދު ސަރުކާރާއި އިދިކޮޅު ފަރާތްތަކާ ދެމެދު ޚިޔާލު ތަފާތުވުން ދަނީ ބޮޑުވަމުންނެވެ.