ޤައުމީ ޔުނިވާސިޓީން ބައިނަލްއަޤުވާމީ ހަތަރު ތަމްރީނު ޕްރޮގްރާމެއް ނިންމައި ކާމިޔާބީ ފާހަގަކޮށްފި

ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން ބައިނަލްއަޤުވާމީ މުއައްސަސާތަކާ ގުޅިގެން ހިންގި ހަތަރު ޕްރޮފެޝަނަލް ޑިވެލޮޕްމަންޓް ޕްރޮގްރާމެއް ފުރިހަމަކުރި ކާމިޔާބީ ފާހަގަކުރުމަށް މިއަދު ޚާއްޞަ ރަސްމިއްޔާތެއް ބާއްވައިފިއެވެ.

އެ ރަސްމިއްޔާތުގެ ޝަރަފުވެރި މެހެމާނުންގެ ގޮތުގައި ބައިވެރިވެވަޑައިގެންނެވީ ޖަޕާނުން ރާއްޖެއަށް ކަނޑައަޅުއްވާފައިވާ ސަފީރު އިޝިގާމީ ރޫމިކޯ އާއި އޮސްޓްރޭލިއާއިން ރާއްޖެއަށް ކަނޑައަޅުއްވާފައިވާ ހައި ކޮމިޝަނާ ޑޭވިޑް ޖެސަޕެވެ.

ފުރިހަމަކުރި ޕްރޮގްރާމްތަކުގެ ތެރެއިން ފުރަތަމަ ޕްރޮގްރާމަކީ ޖަޕާން ފައުންޑޭޝަނާ ގުޅިގެން މޯލްޑިވްސް ކަސްޓަމްސް ސާވިސްގެ އޮފިސަރުންނަށް 2026 ވަނަ އަހަރުގެ އޮގަސްޓް 10 އިން ސެޕްޓެމްބަރު 21 އަށް ކުރިއަށް ގެންދިޔަ 30 ގަޑިއިރުގެ ޖަޕާނު ބަހުގެ ކޯހެވެ. އެ ކޯހުގެ ޒަރީޢާއިން ކަސްޓަމްސް އޮފިސަރުންނަށް ބަހުގެ ހުނަރާއި ފަންނީ ޢިލްމު ތަރައްޤީކުރުމުގެ ފުރުޞަތު ފަހިވެފައިވާ ކަމަށް އެމްއެންޔޫއިން ފާހަގަކޮށްފައިވެއެވެ. ދެވަނައަށް ހިންގީ މެލޭޝިއާގެ ޔުނިވާސިޓީ ސައިންސް އިސްލާމް މެލޭޝިއާ (ޔޫއެސްއައިއެމް) އާ ގުޅިގެން ސެޕްޓެމްބަރު 6 އިން 9 އަށް އެމްއެންޔޫގެ ޢަރަބި ބަހުގެ ޑިޕާޓްމަންޓުގެ ލެކްޗަރާއިންނަށް ޚާއްޞަކޮށްގެން ހިންގި ޕްރޮގްރާމެކެވެ. އެ ޕްރޮގްރާމުން ދިރާސާ މުޤައްރަރު ތައްޔާރުކުރުމާއި ޘަޤާފީ ބައްދަލުވުންތަކުގެ ފުރުޞަތު ލިބިފައިވެއެވެ. ތިންވަނައަށް ކުރިއަށް ގެންގޮސްފައިވަނީ އޮސްޓްރޭލިއާގެ ކާޓިން ޔުނިވާސިޓީއާ ގުޅިގެން ޕާތުގައި އެމްއެންޔޫގެ ފެކަލްޓީ އޮފް އާޓްސްގެ މުވައްޒަފުންނަށް ހިންގި ފެކަލްޓީ ޑިވެލޮޕްމަންޓް ޕްރޮގްރާމެކެވެ. ހަތަރުވަނަ ޕްރޮގްރާމެއްގެ ގޮތުގައި މޯލްޑިވްސް ލައިބްރަރީ އެސޯސިއޭޝަނާއި ކާޓިން ޔުނިވާސިޓީއާ ގުޅިގެން ސެޕްޓެމްބަރު 9 އިން 19 އަށް ޕާތުގައި ލައިބްރަރީ އެންޑް އިންފޮމޭޝަން ސާވިސަސްއާ ބެހޭ ވޯކްޝޮޕެއް ހިންގައިފައިވެއެވެ.

ފެކަލްޓީ އޮފް އާޓްސްގެ ޑީން ޑރ. އާމިނަތު ރިޔާޒް އެ ރަސްމިއްޔާތުގައި ވިދާޅުވީ "ޕްރޮފެޝަނަލް ޑިވެލޮޕްމަންޓަކީ ހަމައެކަނި ސެޓްފިކެޓް ހާސިލުކުރުމަށް ވުރެ މާ ފުޅާ ދާއިރާއެއް" ކަމަށާއި "އާ ނަޒަރިއްޔާތައް ދެނެގަތުމާއި ޢަމަލީ ހުނަރު ތަރައްޤީކުރުމާއި އާ ޚިޔާލުތައް މުޖުތަމަޢަށާއި ފަންނީ ދާއިރާތަކަށް ގެނެސްދިނުމުގެ ފުރުޞަތު އެކަމުން ފަހިވާ" ކަމަށެވެ.

މި ހަތަރު ޕްރޮގްރާމް ކާމިޔާބުކަމާ އެކު ހިންގުމުގައި ކާޓިން ޔުނިވާސިޓީ، އޮސްޓްރޭލިއާގެ ހައި ކޮމިޝަން، ޖަޕާން ފައުންޑޭޝަން، ޖަޕާން އެމްބަސީ، ޔޫއެސްއައިއެމް، މޯލްޑިވްސް ލައިބްރަރީ އެސޯސިއޭޝަން އަދި ބައިވެރިވި ހުރިހާ މުވައްޒަފުންގެ އެއްބާރުލުން ލިބިފައިވާ ކަމަށް އެމްއެންޔޫއިން ފާހަގަކޮށްފައިވެއެވެ.