ކުޑަހުވަދޫ ބޮޑުޢީދު ފުޓްސަލް ޗެލެންޖުގެ ޗެމްޕިއަންކަން ރުއްދަން ސްޕޯޓްސް ކްލަބު ހޯދައިފި

ބުރަދާސް އެކަޑަމީގެ ފަރާތުން އިންތިޒާމުކޮށް ބާއްވާ "ކުޑަހުވަދޫ ބޮޑު ޢީދު ފުޓްސަލް ޗެލެންޖު 1447" ގެ ޗެމްޕިއަންކަން ރުއްދަށް ސްޕޯޓްސްއިން ހޯދައިފިއެވެ.

މުބާރާތުގެ ޗެމްޕިއަންކަން ރުއްދަން ހޯދާފައިވަނީ ރޭ ކުޅުނު ފައިނަލް މެޗްގައި ޑްރީމްސް އެފްސީ އާ ދެކޮޅަށް ކުޅުނު މެޗް 3-2 ގެ ނަތީޖާއަކުން މޮޅުވެގެންނެވެ. 

ފޯރިގަދަ ކުޅުމެއް ފެނިގެންދިޔަ ފައިނަލް މެޗުގައި އެންމެ ފުރަތަމަ ލަނޑެއް ޖަހައި ކުރި ހޯދީ ރުއްދަން އެސްސީންނެވެ. މެޗް ފަށައިގެން ހަތަރުވަނަ މިނެޓް ތެރޭގައި މި ލަނޑު އެ ޓީމަށް ޖަހައިދިނީ ހާރޫން އިބްރާހީމެވެ. ރުއްދަން އިން ލީޑް ނަގާފައި ވަނިކޮށް، ޑްރީމް އެފްސީގެ ޢަބްދުﷲ ޒާން ވަނީ 19 ވަނަ މިނެޓް ތެރޭގައި ލަނޑެއް ޖަހައި މެޗް އެއްވަރުކޮށްދީފައެވެ. އަދި އޭގެ އެންމެ މިނެޓެއް ފަހުން ޑްރީމް އެފްސީގެ ޝަހްނީމް މޫސާ ލަނޑެއް ޖަހައި، ފުރަތަމަ ފަހަރަށް އެ ޓީމަށް ލީޑް ނަގައިދިނެވެ.

ނަމަވެސް ރުއްދަން އެސްސީ ހިތްވަރު އެލުވައެއް ނުލައެވެ. ޑްރީމް އެފްސީ ކުރީގައި އޮއްވައި ރުއްދަން އެސްސީން ވަނީ ނަތީޖާ އަނބުރާލައި، 3-2 ގެ ނަތީޖާއަކުން މެޗް ކާމިޔާބުކޮށްފައެވެ. ރުއްދަންއަށް ދެވަނަ ފަހަރަށް ލީޑް ނަގައިދިނީ 22 ވަނަ މިނެޓް ތެރޭގައި ހާރޫނެވެ. އަދި ޗެމްޕިއަންކަން ކަށަވަރުކޮށްދިން ލަނޑު ޖަހައިދިނީ އަޔާޒް އަހުމަދެވެ. މި މެޗްގެ މޮޅު ކުޅުންތެރިޔާގެ މަގާމުވެސް ހޯދާފައިވަނީވެސް އަޔާޒެވެ.

މިފަހަރު ބޭއްވި "ކުޑަހުވަދޫ ބޮޑު ޢީދު ފުޓްސަލް ޗެލެންޖު 1447" ގެ ތަށި ރުއްދަން ސްޕޯޓްސް ކްލަބް ހޯދިއިރު، މިދިޔަ ފަހަރު މި މުބާރާތުގެ ޗެމްޕިއަންކަން ހޯދީ، މައިދާން ސްޕޯޓްސް ކްލަބެވެ. މިފަހަރުގެ މުބާރާތުގެ ސެމީފައިނަލަށް މައިދާން ދަތުރުކުރިއިރު، އެމީފައިނަލުގައި އެޓީމް ބައްދަލުކުރީ ރުއްދަން ސްޕޯޓްސް ކްލަބާއެވެ.

ފައިނަލް މެޗް ނިމުމުން ވަނީ ޗެމްޕިއަން ޓީމަށް ތައްޓާއި އަދި މުބާރާތުގެ އެކި ވަނަތަކަށް ހޮވުނު ކުޅުންތެރިންނަށް އެކަމުގެ އެވޯޑް ހަވާލުކޮށްފައެވެ.

މިފަހަރުގެ މުބާރާތުގައި އަށް ޓީމަކުން ވަނީ ވާދަކޮށްފައެވެ. މިފަހަރުގެ މުބާރާތުގެ ވަނަތައް ހޯދި ޓީމްތަކަށް ކަނޑައެޅި އިނާމްތަކަށް ބަލާއިރު، ޗެމްޕިއަން ޓީމަށް 30،000 ރުފިޔާ، އަދި ރަނަރަޕް ޓީމަށް 15،000 ރުފިޔާގެ ފައިސާގެ އިނާމް ދިނުމަށް ވަނީ ހަމަޖެހިފައެވެ.

މުބާރާތް އިންތިޒާމްކުރި ބްރަދާސް އެކަޑަމީއަކީ ކުޑަހުވަދޫގައި ކުޅިވަރު ކުރިއެރުވުމަށް މިހާރު ވެސް ގިނަ ހަރަކާތްތަކެއް ހިންގަމުންދާ ވަރަށް ހިންގުންތެރި އެކަޑަމީއެކެވެ. އެގޮތުން މިހާރު ވެސް އެއެކަޑަމީގެ ފަރާތުން އަންނަނީ ކުޑަހުވަދޫގައި ފުޓްބޯޅަ އަދި ފުޓްސަލްގެ އިތުރުން އަންހެން ހޭންޑްބޯޅަ ވައިޑީޕީ ޕްރޮގްރާމް ހިންގަމުންނެވެ.