ފްރެންޑް 4 ދޯނިން ގެއްލުނު ތިން މީހުން ކަނޑުމަތިން ފެނުމުގެ އުންމީދު ކުޑަވެއްޖެ

ގއ. ކުޑަލަފަރީ ކައިރިން ފެތުނު ފްރެންޑް 4 ސަޕްލައި ދޯނީގެ ހާދިސާގައި ގެއްލުނު ތިން މީހުން ހޯދުމަށް ވައިގެ މަގުންނާއި ކަނޑުމަގުން ހުވަދޫ ކަނޑުގެ ސަރަޙައްދު އެއްކޮށް ބެލި ނަމަވެސް އެ މީހުންގެ ހިލަމެއް ނުވެ ކަނޑުމަތިން ފެނުމުގެ ފުރުޞަތު ކުޑަ ކަމަށް އެމްއެންޑީއެފުން ބުނެފިއެވެ.

މިމަހުގެ ފަސް ވަނަ ދުވަހުގެ ދަންވަރު ކުޑަލަފަރީގެ އިރުއުތުރުން 4.1 ނޯޓިކަލް މޭލު ބޭރުން އެ ދޯނި ކުއްލި ގޮތަކަށް ބަންޑުން ޖަހައިލައި ހުވަދޫ ކަނޑަށް އަޑިއަށް ދިޔައީ ސިފައިންގެ ލޭންޑިންގ ކްރާފްޓަކާއި ފުލުހުންގެ ލޯންޗަކާއި އެމްއެންޑީއެފް ލޯންޗެއް ވެސް ވަރަށް ކައިރީގައި އޮއްވައެވެ. ދޯނިން ފުންމައިލި މީހުންނާއި ބަންޑުން ޖަހައިލި ވަގުތު ނިކުމެވުނު މީހުން ވަގުތުން ސަލާމަތްކުރެވުނު ނަމަވެސް ރެސްކިޔު އޮޕަރޭޝަނުގައި ހަރަކާތްތެރިވި ސިފައިންގެ މީހަކާއި ފުލުހަކާއި ދޯނީގެ ކެޕްޓަން ވަނީ ގެއްލިފައެވެ.

ގެއްލުނު ތިން މީހުން ހޯދުމަށް ދިވެހި އަސްކަރިއްޔާގެ ޓީބީ 2 ޑްރޯން ބޭނުންކޮށްފައިވެއެވެ. އެއީ އިންފްރާރެޑް ސެންސަރު މެދުވެރިކޮށް ރޭގަނޑު ވެސް ކަނޑުމަތީގައި އެއްޗެއް އޮތްތޯ ދެނެގަނެވޭ ޑްރޯނެކެވެ. ހަމައެއާ އެކު މޯލްޑިވިއަން އެއާކްރާފްޓާއި އޮސްޓްރޭލިއާއިން ދިވެހި އަސްކަރިއްޔާއަށް ހަދިޔާކުރި ކޯސްޓްގާޑް ޝިޕް އިމާދުއްދީންގައި ހުރި ޒަމާނީ ޓެކްނޮލޮޖީ ވެސް ވަނީ މި ހޯދުމުގެ މަސައްކަތުގައި ބޭނުންކޮށްފައެވެ. ވަޔާއި ކަނޑުގެ އޮއިވަރަށް ބަލައި އޮޔާ ގޮސްދާނެ ކަމަށް ލަފާކުރެވޭ މިސްރާބުން ލާމު އަތޮޅާއި ގއ. އަތޮޅުގެ ފަރުތައް ވެސް ވަނީ ބެލިފައެވެ.

ދިވެހި ސަރުކާރުގެ އެދުމަކަށް އެމެރިކާ ސަރުކާރުން ވެސް ވަނީ މި ހޯދުމުގެ މަސައްކަތަށް އެހީ ފޯރުކޮށްދީފައެވެ. އެ ގޮތުން ކަނޑުމަތީގެ ސާޗް އެންޑް ރެސްކިޔު އާއި ސަވައިލެންސަށް ޚާއްޞަ އެމެރިކާ ނޭވީގެ ޕީ8 މަތިންދާބޯޓަކުން 6,300 އަކަ ނޯޓިކަލް މޭލުގެ ސަރަޙައްދެއް ހިމެނޭ ގޮތަށް މުޅި ހުވަދޫ ކަނޑުގެ ސަރަޙައްދު ވަނީ ބެލިފައެވެ. ހާދިސާ ހިނގިތާ 11 ދުވަސް ފާއިތުވީ ފަހުން އިއްޔެ އެކަނި ވެސް ވައިގެ މަގުން 17,220 އަކަ ނޯޓިކަލް މޭލާއި ކަނޑުމަގުން 2,790.10 އަކަ ނޯޓިކަލް މޭލުގެ ސަރަޙައްދެއް ބެލުމުގެ އިތުރުން ގޮނޑުދޮށްތަކާއި ފަރުތައް ހިމެނޭ 288 އަކަ ނޯޓިކަލް މޭލުގެ ސަރަޙައްދެއް ވެސް ވަނީ ބެލިފައެވެ.

އެމްއެންޑީއެފުން ބުނީ ދޯނި ފެތުނު ސަރަޙައްދު 1,600 މީޓަރަށް ވުރެ ފުން ކަމަށް ބެލެވޭ ކަމަށާއި މިއީ އިންސާނުންނަށް ޑައިވްކޮށްގެން ދެވޭނެ ފުންމިނެއް ނޫން ކަމަށެވެ. އެ ފުންމިނަކީ ބޭރު ޤައުމުތަކުގެ ކަނޑުގެ އަސްކަރިއްޔާގައި ބޭނުންކުރާ ކޮންވެންޝަނަލް އަދި ނިއުކްލިއާ ސަބްމެރީން ވެސް އޮޕަރޭޓްކުރެވޭ ފުންމިނެއް ނޫން ކަމަށް ވެސް އެ ފޯސް އިން ބުނެފައިވެއެވެ. ދޯނިން ސަލާމަތްވި މީހުންގެ ފަރާތުން ލިބުނު މަޢުލޫމާތާއި މިހާތަނަށް ކުރި ހުރިހާ މަސައްކަތަކަށް ރިޢާޔަތްކުރާ އިރު ގެއްލުނު ތިން މީހުން ކަނޑުމަތިން ފެނުމުގެ ފުރުޞަތު ކުޑަ ކަމަށް އެމްއެންޑީއެފުން ވަނީ ބުނެފައެވެ.