ތެލެސީމިއާ ކުދީންގެ މާލީ އިނާޔަތް މަހަކު 2،000 ރުފިޔާއަށް ބޮޑުކޮށްފި

ތެލެސީމިއާ ތަހައްމަލުކުރާ ކުދީންނަށް ދައުލަތުން ދެމުން އައި މާލީ އިނާޔަތް މަހަކު 2،000 ރުފިޔާއަށް ބޮޑުކޮށް، 500 އަށް ވުރެ ގިނަ ކުދީންނަށް އެ އެލަވަންސް ގަވާއިދުން ދެމުންދާ ކަމަށް ޞިއްޙަތާއި އާއިލާއާއި އިޖުތިމާޢީ އެހީއާ ބެހޭ ވަޒީރު ގީލާ ޢަލީ ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރީންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ތެލެސީމިއާ ކުދީންނަށް ޚާއްޞަ އެލަވަންސެއް ހަމަޖެއްސެވުމަކީ ރައީސް ޑރ. މުޙައްމަދު މުޢިއްޒުގެ މުހިންމު ވަޢުދުފުޅެއް ކަމަށެވެ. އެގޮތުން 1 ޖެނުއަރީ 2026 އިން ފެށިގެން މަހަކު 1،000 ރުފިޔާގެ އިނާޔަތެއް ދޭން ފެށި ނަމަވެސް، ރައީސުލްޖުމްހޫރިއްޔާގެ ޚާއްޞަ ނިންމެވުމެއްގެ ދަށުން އެ ޢަދަދު މިހާރު 2،000 ރުފިޔާއަށް ބޮޑުކޮށްދެއްވާފައިވާ ކަމަށް ވަޒީރު ވިދާޅުވިއެވެ. މި ބަދަލާ އެކު ރާއްޖޭގައި ތިބި 500 އަށް ވުރެ ގިނަ ތެލެސީމިއާ ކުދީންނަށް އެ އެލަވަންސް ގަވާއިދުން ލިބެމުންދާ ކަމަށް އެކަމަނާ ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، ތެލެސީމިއާ ކުދީންނާއި އެ ކުދީންގެ ޢާއިލާތަކުގެ ޙާލަތު ރަނގަޅުކޮށް، އެ ކުދީންނަށް އުފާވެރި ދިރިއުޅުމެއް ހޯދައިދިނުމަށް ސަރުކާރުން ފުޅާ ދާއިރާއެއްގައި މަސައްކަތްކުރަމުންދާ ކަމަށެވެ. އެގޮތުން ދާއިމީ ފަރުވާއެއް ހޯދައިދިނުމުގެ ގޮތުން ޒަކާތު ފަންޑުގެ އެހީގައި މިހާތަނަށް 28 ކުއްޖަކު ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވާ ކަމަށް ވިދާޅުވިއެވެ.

އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ވެފައިވާ އެއްބަސްވުމެއްގެ ދަށުން ކޮންމެ އަހަރަކު 10 ކުއްޖަކަށް ބޯންމެރޯ ހެދުމަށް، ކޮންމެ ކުއްޖަކަށް އެއް މިލިއަން ރުފިޔާއަށް ވުރެ އިތުރުނުވާނެހެން ޖުމްލަ 10 މިލިއަން ރުފިޔާ ސަރުކާރުން އަހަރަކު ޚަރަދުކުރަމުންދެއެވެ.