ޓީޖީއެސްޓީ އޮނިގަނޑު ބަދަލުކުރުމުގެ ނިންމެވުމަށް މަޓާޓޯއިން ތާއީދުކޮށް ޝުކުރު އަދާކޮށްފި

ޑެސްޓިނޭޝަން ޕްރިންސިޕަލް ޓީޖީއެސްޓީގެ އޮނިގަނޑު އިސްލާހުކުރުމަށް ރައީސް ޑރ. މުޙައްމަދު މުޢިއްޒު ނިންމެވި ނިންމެވުމަށް މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން މިއަދު މަރުހަބާ ކިޔައިފިއެވެ.

މަޓާޓޯއިން މިއަދު ނެރުނު ބަޔާނުގައި، ފަތުރުވެރިކަމުގެ ދާއިރާގެ ފަރާތްތަކުން ހުށަހެޅި ކަންބޮޑުވުންތައް ސަރުކާރުން ބަލައިގަނެ ފިޔަވަޅު އެޅިކަން ފާހަގަކޮށްފައިވެއެވެ. އެ ޓެކުހަށް ބަދަލު ގެނައުމުގެ ނިންމެވުން އިއުލާނުކުރެއްވީ ރޭ ބޭއްވި ފަތުރުވެރިކަމުގެ އަހަރީ ޚާއްޞަ ޖަލްސާގައި ފަތުރުވެރިކަމާ ބެހޭ ވަޒީރު މުޙައްމަދު އަމީނެވެ. ވަޒީރު ވިދާޅުވީ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއި ޓްރެވަލް އޭޖެންޓުން ހުށަހެޅި ޝަކުވާތަކަށް ރިޢާޔަތް ކުރެއްވުމަށްފަހު ސަރުކާރުން އެ ބަދަލު ގެނައީ ކަމަށެވެ.

މަޓާޓޯގެ ސެކްރެޓަރީ ޖެނެރަލް ޢަބްދުﷲ ސުޢޫދު ވިދާޅުވީ "މި ނިންމެވުމަކީ ވަރަށް ރަނގަޅު އަދި މުހިންމު ފިޔަވަޅެއް" ކަމަށެވެ. ފަތުރުވެރިކަމުގެ ދާއިރާއަށް ކާމިޔާބީ ހޯދެނީ ސަރުކާރާއި ސިނާއަތުގެ ފަރާތްތައް ގުޅިގެން މަޝްވަރާގެ މަތީން ކުރިއަށް ދިޔުމުން ކަމަށް ސުޢޫދު ފާހަގަކުރެއްވިއެވެ. ދައުލަތުގެ އާމްދަނީ ރައްކާތެރިކުރެވޭ، ބައިނަލްއަޤުވާމީ ބާޒާރުގައި ރާއްޖެއަކީ ވާދަވެރި އަދި ވިއްކަން ފަސޭހަ މަންޒިލެއްގެ ގޮތުގައި ދެމިއޮންނާނެކަން ކަށަވަރުކޮށްދޭ ހަމަހަމަ އޮނިގަނޑެއް އެކުލަވައިލުމުގައި ސަރުކާރަށް އެއްބާރުލުން ދިނުމަށް އެ ޖަމިއްޔާ ތައްޔާރަށް އޮތް ކަމަށް ވެސް ސުޢޫދު ވިދާޅުވިއެވެ.

ފާއިތުވި ހަފުތާތަކުގައި މަޓާޓޯއިން ވަނީ ރާއްޖެއާއި ރާއްޖެއިން ބޭރުގެ ކަމާ ގުޅޭ ފަރާތްތަކާ މަޝްވަރާކޮށް، އެ ބަދަލުތަކުގެ އަސަރު ދެނެގަތުމަށް މުޅި ސިނާއަތް ޝާމިލުވާ ސާވޭއެއް ވެސް ހިންގައިފައެވެ.