ކަރަންޓު ވިއުގައަށް ގެއްލުން ނުދީ މަގު ކޮނުމަށް ސްޓެލްކޯއިން އިލްތިމާސްކޮށްފި

ހުޅުމާލޭ ފުރަތަމަ ފިޔަވަހީގައި ބިން ކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވެ ކަރަންޓު ކެނޑުމާ ގުޅިގެން، ޢިމާރާތްކުރުމާއި މަގު ކޮނުމުގެ މަސައްކަތްތައް ޒިންމާދާރުކަމާ އެކު ކުރިއަށް ގެންދިއުމަށް ސްޓެލްކޯއިން އިއްޔެ އެދިއްޖެއެވެ.

ކަރަންޓު ކެނޑެން މެދުވެރިވީ ކުރެދިމާ ހިނގުމުގައި އަމިއްލަ ފަރާތަކުން ހިންގި ޢިމާރާތްކުރުމުގެ މަޝްރޫޢެއްގެ ތެރެއިން ބިން ކޮނުމުގައި ބިމުގެ އަޑީގައި އޮތް ހައިވޯލްޓޭޖް ކޭބަލަކަށް ލިބުނު ގެއްލުމުގެ ސަބަބުން ކަމަށް އެ ކުންފުނިން ބުނެފައިވެއެވެ. އެ ހާދިސާގެ ސަބަބުން އެ ސަރަހައްދުގެ ކަރަންޓުގެ ޚިދުމަތް މެދުކެނޑިފައިވެއެވެ.

ސްޓެލްކޯއިން ވަނީ ޢިމާރާތްކުރުމާއި ބިން ކޮނުމުގެ މަސައްކަތް ކުރާ ހުރިހާ ފަރާތްތަކުން ވެސް ބިމު އަޑީގައި އޮންނަ ކަރަންޓު ވިއުގައަށް ގެއްލުން ނުވާނެ ގޮތަށް މަސައްކަތް ރާވައިގެން ކުރިއަށް ގެންދިއުމަށް އިލްތިމާސްކޮށްފައެވެ. ކައިރިކައިރީގައި މިފަދަ ހާދިސާތައް ތަކުރާރުވުމަކީ ޢާންމު ރައްޔިތުންނަށް ބޮޑެތި ދަތިތައް ކުރިމަތިވާ ކަމެއް ކަމަށް އެ ކުންފުނިން ފާހަގަކޮށްފައިވެއެވެ.

މިދިޔަ ބުރާސްފަތި ދުވަހު ވެސް މިފަދަ ހާދިސާއެއް ހިނގައި ފުރަތަމަ ފިޔަވަހީގެ ބައެއް ސަރަހައްދުތަކުން ކަރަންޓުގެ ޚިދުމަތް ކެނޑިފައިވެއެވެ. ފަހަކަށް އައިސް ހުޅުމާލޭގައި ޢިމާރާތްކުރުމުގެ މަސައްކަތްތަކުގެ ތެރެއިން ކަރަންޓު ކޭބަލްތަކަށް ގެއްލުންވެ ޚިދުމަތް މެދުކެނޑޭ މައްސަލަ ދަނީ ތަކުރާރުވަމުންނެވެ.