އީގަލް ހިލްސްގެ ޗެއާމަން ރައްޔިތުންގެ އުއްމީދާ އެއްގޮތަށް މަސައްކަތްކުރާނެ ކަމުގެ ޔަޤީންކަން ދެއްވައިފި

ރަސްމާލޭގައި ހިންގުމަށް ރޭވިފައިވާ ބިޔަ މަޝްރޫޢާ ގުޅިގެން ދިވެހިންގެ އިތުބާރު ލިބިފައިވާ ކަމަށް ވިދާޅުވެ، އީގަލް ހިލްސްގެ ޗެއާމަން މުޙައްމަދު އަލައްބާރު ދިވެހިން އެދޭ ގޮތަށް މަސައްކަތްކޮށްދެއްވާނެ ކަމުގެ ޔަޤީންކަން ދެއްވައިފިއެވެ.

އަލައްބާރު މި ޔަޤީންކަން ދެއްވީ ރަސްމާލެ މަޝްރޫޢު ނިމޭ އިރު އެ ތަން ފެންނާނެ ގޮތް ދައްކުވައިދޭ، އާޓިފިޝަލް އިންޓެލިޖެންސް (އޭއައި) މެދުވެރިކޮށް ހެދި ވީޑިއޯއެއް އިންސްޓަގްރާމްގައި ޢާއްމުކުރައްވައި ދެއްވި މެސެޖެއްގައެވެ. އެ މެސެޖުގައި ވިދާޅުވެފައިވަނީ ރާއްޖޭގެ ތާރީޚުގައި އެންމެ ބޮޑު އިންވެސްޓްމެންޓް ގެންނަ ކުންފުނީގެ ހައިސިއްޔަތުން ދިވެހިން ކުރާ އިތުބާރު ޤަބޫލުކުރައްވާ ކަމަށާއި އެ ފުރުޞަތު ލިބުމަކީ ކުންފުންޏަށް ޝަރަފެއް ކަމަށެވެ.

"ތާރީހުގައި އަންނަ އެންމެ ބޮޑު އިންވެސްޓްމެންޓާ އެކު ދިވެހިން އަޅުގަނޑުމެންނަށް އިތުބާރުކުރޭ. މިއީ އަޅުގަނޑުމެންނަށް ލިބޭ ޝަރަފެއް" ކަމަށް އަލައްބާރު ވިދާޅުވެފައިވެއެވެ.

މަޝްރޫޢާ ގުޅޭ ތަފުޞީލު ހާމަކުރައްވަމުން އަލައްބާރު ވިދާޅުވެފައިވަނީ ރަސްމާލޭގައި ބިނާކުރަނީ ހަމައެކަނި ޢިމާރާތްތަކެއް ނޫން ކަމަށާއި ދިރިއުޅުމުގެ ވައްޓަފާޅިއެއް ކަމަށެވެ. އެ ތަނުން ޕްރޮޕަޓީ ގަންނަ ފަރާތްތަކަށް ދުނިޔޭގައި ވެސް އެ ފަދަ ވިޔަފާރިއަކުން ލިބޭނެ އެންމެ ރަނގަޅު ފައިދާ ލިބޭނެ ކަމަށް ވެސް ވިދާޅުވެފައިވެއެވެ.

"މި އުފައްދަނީ ދިރިއުޅޭނެ ތަނެއް. އެތަނުގައި މީހުންނަށް މަހެއް ވަންދެން ނޫނީ ހަފުތާއެއް ވަންދެން ތިބެވޭނެ. އެ ތަނުގައި ރީތި ގޮނޑުދޮށްތައް ހުންނާނެ. އަދި ރެސްޓޯރެންޓްތަކާއި ހޮޓާތަކާއި ކުޅިވަރުކުޅޭނެ ތަންތަނާއި ކުޑަކުދިންނަށް ހާއްސަ ތަންތަން ހުންނާނެ" ކަމަށް އަލައްބާރު ވިދާޅުވެފައިވެއެވެ.

"މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ހިންގާ މި މަޝްރޫޢަށް ފޮރިން ޑައިރެކްޓް އިންވެސްޓްމެންޓްގެ ގޮތުގައި 20 ބިލިއަން ޑޮލަރަށް ވުރެ ގިނައިން ފަންޑިން ލިބޭނެ ކަމަށް މަޝްރޫޢު ހިންގާ ފަރާތުން ބުނެފައިވެއެވެ. ސަރުކާރުން ވަނީ ރަސްމާލެއިން 500 ހެކްޓަރުގެ ބިން މި މަޝްރޫޢަށް ދޫކުރުމަށް ނިންމައިފައެވެ. ފިނޭންސް މިނިސްޓަރު ޙަސަން ޒަރީރު ވިދާޅުވެފައިވާ ގޮތުގައި މި މަޝްރޫޢު ނިމޭ އިރު ރަސްމާލެ ވާނީ ހުރިހާ ޚިދުމަތެއް ފޯރުކޮށްދޭ ޒަމާނީ އިންޓަގްރޭޓެޑް ސިޓީއަކަށެވެ. މިނިސްޓަރު ޒަރީރު ވިދާޅުވީ މި އެއްބަސްވުމުގައި ސޮއިކުރީ ކުންފުނީގެ މަސައްކަތުގެ ފެންވަރު ސީދާ ބެއްލެވުމަށް ފަހު ކަމަށާއި، އެ ގޮތުން މިސްރުގެ އިސްކަންދަރިއްޔާގައި "މަރާސީ" ގެ ނަމުގައި އީގަލް ހިލްސް އާއި އިމާރު ގުޅިގެން ހިންގާ މަޝްރޫޢުގައި ޔޮޓް މެރީނާއަކާއި ތިން ހޮޓަލާއި ތިން ޓައުނެއްގެ ގޮތުގައި ޕްރޮޕަޓީ ތަރައްޤީކޮށް ސްމާޓް ސިޓީއެއްގެ ގޮތުގައި ޚިދުމަތް ދެމުން ގެންދާ ކަމަށެވެ.