މެލޭޝިޔާގެ ކުރީގެ ބޮޑުވަޒީރު މަހާތީރުގެ އަނބިކަނބަލުން 100 އަހަރުފުޅުގައި އަވަހާރަވެއްޖެ

މެލޭޝިޔާގެ ކުރީގެ ބޮޑުވަޒީރު ޑރ. މަހާތީރު މުޙައްމަދުގެ އަނބިކަނބަލުން ޓުން ޑރ. ސިތީ ހަސްމާ މުޙައްމަދު ޢަލީ މިއަދު ކުއާލަލަމްޕޫރުގެ ނޭޝަނަލް ހާޓް އިންސްޓިޓިއުޓްގައި އުމުރުފުޅުން 100 އަހަރުގައި އަވަހާރަވެއްޖެއެވެ.

ސިތީ ހަސްމާ އަވަހާރަވި ޚަބަރު މަހާތީރު ވަނީ ފޭސްބުކް މެދުވެރިކޮށް ކަށަވަރުކޮށްދީފައެވެ. ހޮސްޕިޓަލުން ހަށިކޮޅު ބޭރަށް ނެރުމުގައި އެ ދެމަފިރިންގެ އެންމެ ހަގު ދަރިކަލުން މުޚްރިޒް މަހާތީރު ބައިވެރިވެވަޑައިގެންނެވި ކަމަށް މެލޭޝިޔާގެ މީޑިއާތަކުން ރިޕޯޓުކޮށްފައިވެއެވެ. ސިތީ ހަސްމާގެ ހަތް ބޭފުޅުން ދުނިޔޭގައި އެބަތިއްބެވިއެވެ.

އެކަމަނާ އަވަހާރަވުމާ ގުޅިގެން މެލޭޝިޔާގެ ރަސްގެފާނު ސުލްޠާން އިބްރާހީމާއި ރާނީ ރާޖާ ޒަރިތު ސޯފިޔާ ވަނީ ޢާއިލާއަށް ތަޢުޒިޔާ ފޮނުއްވައި ކެތްތެރިކަން ދެއްވުން އެދި ދުޢާ ދަންނަވައިފައެވެ. ބޮޑުވަޒީރު އަންވަރު އިބްރާހީމް ވެސް ވަނީ ރަސްމީ ހަރަކާތެއްގެ ތެރެއިން އެ ޚަބަރު ހާމަކޮށް، ސިތީ ހަސްމާގެ ފުރާނަފުޅަށް ހެޔޮ ދުޢާކޮށްދެއްވުމަށް އެދިފައެވެ. ސަރުކާރުން ހާމަކޮށްފައިވާ ގޮތުގައި ޖަނާޒާ ކުރިއަށް ގެންދާނީ ރަސްމީ ފެންވަރުގައެވެ. ފަސްދާނުލެއްވުމަށް ހަމަޖެހިފައި އޮތީ ޕުތުރާޖާޔާގެ ޕްރެސިންޓް 20 ގައި ހުންނަ ޤައުމީ ޤަބުރުސްތާނު "ޕުސާރާ ނެގަރާވަން" ގައެވެ.

ބޮޑުވަޒީރު އަންވަރުގެ އަނބިކަނބަލުން ޑރ. ވަން އަޒީޒާ ވަން އިސްމާޢީލް ވިދާޅުވީ "ސިތީ ހަސްމާއަކީ ހިތްހެޔޮ، ކެތްތެރި އަދި އަބުރުވެރިކަމާއެކު އުޅެން އޭނާއަށް ދަސްކޮށްދެއްވި ވަރަށް ޚާއްޞަ ޝަޚްޞިއްޔަތެއް" ކަމަށެވެ. 1998 ވަނަ އަހަރު އަންވަރު ބޮޑުވަޒީރުގެ ނައިބުކަމުން ވަކިކުރެއްވުމާ ގުޅިގެން ދެ ޢާއިލާ ދެމެދު ދުރުކަމެއް އައި ނަމަވެސް، 2018 ވަނަ އަހަރުގެ އިންތިޚާބަށް ދެ ބޭފުޅުން ސިޔާސީ ގޮތުން ގުޅިވަޑައިގެންފައިވެއެވެ.

12 ޖުލައި 1926 ގައި ސިލަންގޯގެ ކްލަންގަށް އުފަންވެވަޑައިގެންނެވި ސިތީ ހަސްމާ ވަނީ 1955 ވަނަ އަހަރު ސިންގަޕޫރުގެ ކިންގް އެޑްވަރޑް 7 ކޮލެޖް އޮފް މެޑިސިން އިން ޑޮކްޓަރުކަން ހާސިލްކުރައްވައިފައެވެ. އެކަމަނާއަކީ މެލޭޔާގެ ފުރަތަމަ މެލޭ އަންހެން މެޑިކަލް އޮފިސަރުންގެ ތެރޭގައި ހިމެނިވަޑައިގެންނެވި ބޭކަނބަލެކެވެ. މަހާތީރާ ކައިވެނިބައްލަވައިގެންނެވީ 1956 ވަނަ އަހަރުއެވެ. ދާދި ފަހުން އޮގަސްޓް ފަހެއްގައި އެ ދެކަނބަލުން ވަނީ ކައިވެނީގެ ޕްލެޓިނަމް ޖުބިލީ ފާހަގަކުރައްވައިފައެވެ.

މާތް ﷲ ސިތީ ހަސްމާގެ ފުރާނަފުޅަށް ރަޙްމަތް ލައްވައި، ޢާއިލާއަށް ކެތްތެރިކަން ދެއްވާށިއެވެ.