އެމްޑީޕީގެ ކޮންގްރެސް ފައްޓަވައި ނަޝީދު ސަރުކާރަށް ވަރަށް ބޮޑަށް ފާޑުވިދާޅުވެއްޖެ

މާލެ ސިޓީ ކައުންސިލްގެ ހޯލްގައި މިރޭ ފެށި އެމްޑީޕީގެ ފަސްވަނަ ކޮންގްރެސް ހުޅުވައިދެއްވައި، ދެން ވެސް ދިވެހިންނަށް ހެޔޮގޮތް ހޯދައިދޭނީ އެމްޑީޕީން ކަމަށް ވިދާޅުވެ، ކުރީގެ ރައީސް މުޙައްމަދު ނަޝީދު ރައީސް މުޢިއްޒުގެ ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

އެމްޑީޕީގެ ޗެއާޕާސަންގެ މަޤާމުގައި ވެސް ހުންނެވި ރައީސް ނަޝީދު ވަނީ އެ ޕާޓީގެ ވެރިކަމުގައި ރާއްޖެއަށް ގެނައި ބަދަލުތައް ފާހަގަކުރައްވާފައެވެ. އެގޮތުން އެހީތެރިކަން ބޭނުންވާ ފަރާތްތަކަށް އިނާޔަތް ދޭން ފެށުމާއި، ފޮތް ފަންސޫރު ހިލޭ ކުރުމާއި، ބޭސްފަރުވާއަށް ސަލާން ޖެހުން ނައްތައިލީ އެމްޑީޕީން ކަމަށް ވިދާޅުވިއެވެ. ހަމައެހެންމެ ދަތުރުފަތުރުގެ ނިޒާމުން ރައްޔިތުން ގުޅައި ރަށު ބަންދުން ވީއްލައިދިން ޕާޓީއަކީ ވެސް އެމްޑީޕީ ކަމަށް ވިދާޅުވިއެވެ.

ރައީސް މުޢިއްޒުގެ ސަރުކާރަށް ވަރަށް ބޮޑަށް ފާޑުވިދާޅުވަމުން ނަޝީދު ވިދާޅުވީ މިއީ ތަނެއް ދޮރެއް ނޭނގޭ ބަޔަކު ތިބި ސަރުކާރެއް ކަމަށާއި، މި ވެރިކަން ބަދަލުކުރައްވާނެ ކަމަށެވެ. އަދި ދެން އުފެދޭނީ އެމްޑީޕީގެ ސަރުކާރެއް ކަމަށް ވެސް ވިދާޅުވިއެވެ.

"އަޅުގަނޑުމެންގެ އިސްތިގުލާލު، އަޅުގަނޑުމެންގެ މިނިވަންކަން ގެއްލި ބުރޫއަރާ ދާނީ އަޅުގަނޑުމެންގެ ވެރިންނަށް ތަނެއް ދޮރެއް ނޭނގުނީމާ. މިތިބަ ގަމާރުން އަޅުގަނޑުމެންގެ ތެރޭގައި ވެރިކަމުގައި ބަހައްޓަން ޖެހުނީމާ،" ނަޝީދު ވިދާޅުވިއެވެ.