ރަސްމާލެ މަޝްރޫޢުގެ ޤާނޫނީ އޮނިގަނޑު މަޖިލީހުން ފާސްކުރުމަށް ނަޝީދު ގޮވާލައްވައިފި

ރަސްމާލެ މަޝްރޫޢާ ގުޅޭ ގޮތުން ދެ ކަންބޮޑުވުމެއް އެބައޮތް ކަމަށާއި އެ މަޝްރޫޢަށް ބޭނުންވާ ޤާނޫނީ އޮނިގަނޑު ރައްޔިތުންގެ މަޖިލީހުން ފާސްކުރަންޖެހޭ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ނަޝީދު އެކްސްގައި ޝާއިޢުކުރެއްވި ޕޯސްޓެއްގައި ވިދާޅުވީ ރެސިޑެންސީ ޕްރޮގްރާމަކަށް ރާއްޖެ ހުޅުވައިލުމަކީ އުސޫލީ ގޮތުން ރަނގަޅު ކަމެއް ކަމަށެވެ. ނަމަވެސް ސަރުކާރުން އީގަލް ހިލްސްއާ އެކު ހަދާފައިވާ އެއްބަސްވުން އަދި ހާމަކޮށްފައި ނުވާ ކަމަށާއި، މިހާތަނަށް ލިބިފައިވާ މަޢުލޫމާތުން ދެ މައްސަލައެއް ފާހަގަކުރެއްވޭ ކަމަށް އެމަނިކުފާނު ވިދާޅުވިއެވެ. އެއީ މަޝްރޫޢަށް އެޑްވާންސް ފައިސާ ލިބިފައި ނެތުމާއި، މާލެ ސަރަހައްދުގައި އެ މަޝްރޫޢު ހިންގުމެވެ.

"އަޅުގަނޑަށް ފެންނަ ގޮތުގައި ސަރުކާރަށް އެންމެ ރަނގަޅު ގޮތަކަށްވާނީ ކޮންޓްރެކްޓް އަވަހަށް މަޖިލީހަށް ފޮނުވުން. މި ސަރުކާރުގެ އަގުލަބިއްޔަތުން މި މަޝްރޫއުއަށް ބޭނުންވާ ގާނޫނީ އޮނިގަނޑު ފާސްކުރުން،" ނަޝީދު ވިދާޅުވިއެވެ.

ބަންޑާރަނައިބު އަޙްމަދު އުޝާމް ވަނީ މި މަޝްރޫޢު ހިނގާނީ މިހާރު އެކުލަވައިލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށް ވިދާޅުވެފައެވެ. މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓެއް ކަމަށާއި، މަޝްރޫޢު ފެށުމުގެ ކުރިން އެ ޓާމްސްތަކުގެ މައްޗަށް ބިނާކޮށް އިތުރު މަޝްވަރާކުރެވި ޑެފިނިޓިވް އެގްރީމެންޓްތަކެއްގައި ސޮއިކުރަންޖެހޭނެ ކަމަށާއި، އެކަމާ ގުޅުންހުރި ޤާނޫނުތައް މަޖިލީހުން ފާސްކުރަންޖެހޭނެ ކަމަށް ވެސް ބަންޑާރަނައިބު ވިދާޅުވިއެވެ. މީގެ އިތުރުން، މި މަޝްރޫޢު ކުރިއަށް ގެންދިޔުމުގައި ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަޤީންކަން ވެސް ބަންޑާރަނައިބު ދެއްވާފައިވެއެވެ.