ނިއަމް ރެސިޑެންސްގެ ޔުނިޓްތައް ވިއްކުމުގެ މުޢާމަލާތްތައް ހައްޖު ކޯޕަރޭޝަނުން ބާތިލްކޮށްފި

ހުޅުމާލޭގައި ތަރައްޤީކުރުމަށް ހަމަޖެހިފައިވާ ނިއަމް ރެސިޑެންސްގެ އެޕާޓްމަންޓް ޔުނިޓްތައް ވިއްކުމަށް މިހާތަނަށް ކޮށްފައިވާ ހުރިހާ މުޢާމަލާތެއް މޯލްޑިވްސް ހައްޖު ކޯޕަރޭޝަނުން ބާތިލްކޮށްފިއެވެ.

އެ ކޯޕަރޭޝަނުން ނެރުނު ބަޔާނެއްގައި ބުނެފައިވާ ގޮތުގައި، ކުންފުނީގެ މާލީ ޙާލަތު ރަނގަޅުކޮށް އެންމެ ބޮޑު ފައިދާއެއް ހޯދުމަށް ކުރެވޭ މަސައްކަތުގެ ތެރެއިން މި ނިންމުން ނިންމާފައިވެއެވެ. ބާތިލްކުރި މުޢާމަލާތްތަކުގެ ތެރޭގައި އެ ކުންފުނީގެ މުވައްޒަފުންނަށް އެޕާޓްމަންޓް ވިއްކުމަށް ހިންގާފައިވާ މުޢާމަލާތްތައް ވެސް ހިމެނެއެވެ.

ހައްޖު ކޯޕަރޭޝަނުން އިތުރަށް ހާމަކޮށްފައިވާ ގޮތުގައި، ކޮންމެ ޔުނިޓަކުން ކުންފުންޏަށް އެންމެ ބޮޑު މާލީ ފައިދާއެއް ލިބޭނެ ގޮތަށް މަޝްރޫޢު ކުރިއަށް ގެންދިއުމަށްޓަކައި ޔުނިޓްތަކުގެ އަގުތައް އަލުން ކަނޑައެޅުމުގެ މަސައްކަތް މިހާރު ދަނީ ކުރަމުންނެވެ.

އިދާރީ އަދި ފަންނީ މަސައްކަތްތައް ފުރިހަމަކުރުމަށް ފަހު ނިއަމް ރެސިޑެންސްގެ އެޕާޓްމަންޓްތައް ގަތުމުގެ ފުރުޞަތު ވަރަށް އަވަހަށް ޢާންމުކޮށް ހުޅުވައިލެވޭނެ ކަމަށް ވެސް އެ ބަޔާނުގައި ބުނެފައިވެއެވެ.