ޤައުމީ ފުޓްބޯޅަ ޓީމް މިރޭ ކިރްގިސްތާނާ ދެކޮޅަށް ނިކުންނާނެ

ތަޖުރިބާ ހޯދުމުގެ ދަތުރުގެ ދެވަނަ މެޗުގައި ދިވެހިރާއްޖޭގެ ޤައުމީ ސީނިއާ ފުޓްބޯޅަ ޓީމް މިރޭ 19:00 ގައި ކިރްގިސްތާނާ ބައްދަލުކުރާނެއެވެ.

ކިރްގިސްތާނުގައި ކުޅުމަށް ހަމަޖެހިފައިވާ މި މެޗަކީ ރާއްޖެއިން މި ދަތުރުގައި ކުޅޭ ދެވަނަ މެޗެވެ. ދަތުރުގެ ފުރަތަމަ މެޗުގައި ޗައިނާއާ ވާދަކޮށް ރާއްޖެ ބަލިވީ 3-0 ގެ ނަތީޖާއިންނެވެ.

ރާއްޖެއާއި ކިރްގިސްތާން މީގެ ކުރިން ހަތަރު ފަހަރެއްގެ މަތިން ބައްދަލުކޮށްފައިވާ އިރު، އޭގެ ތެރެއިން ދެ މެޗުން ރާއްޖެ މޮޅުވެފައިވެއެވެ. ދެ ޓީމު އެންމެ ފަހުން ބައްދަލުކުރީ މީގެ 10 އަހަރު ކުރިން ކަމަށް ވާ އިރު، އެ މެޗު ކާމިޔާބުކުރީ ވެސް ރާއްޖެއެވެ.

ކިރްގިސްތާން މެޗަށް ފަހު ރާއްޖެ ދެން ކުޅޭނީ ލުބުނާނާ ދެކޮޅަށެވެ. މި އެކުވެރިކަމުގެ މެޗުތައް ނިމުމުން ޓީމު ދެން ތައްޔާރުވާނީ ބަންގްލަދޭޝްގައި ބާއްވާ ސާފް ޗެމްޕިއަންޝިޕަށެވެ. އެ މުބާރާތް ތާވަލުކޮށްފައި އޮތީ އަންނަ ނޮވެމްބަރު މަހުގެ 4 އިން 17 އަށެވެ.