އެސްޓީއޯއިން އިންޑިއާގެ އަމުލް ބްރޭންޑުގެ އުފެއްދުންތައް ރާއްޖެއަށް ނެރެފި

ހޮޓެލް އޭޝިއާ އެގްޒިބިޝަންގައި ބޭއްވި ޚާއްޞަ ހަފުލާއެއްގައި އެސްޓީއޯ ޖެނެރަލް ޓްރޭޑިންގުން އިންޑިއާގެ މަޝްހޫރު ކިރުގެ ބްރޭންޑެއް ކަމުގައިވާ އަމުލްގެ ބާވަތްތައް މިއަދު ރާއްޖޭގެ ބާޒާރަށް ތަޢާރަފުކޮށްފިއެވެ.

އެ ހަފުލާގައި އަމުލް ބްރޭންޑު ރާއްޖެއަށް ތަޢާރަފުކޮށްދެއްވީ އެސްޓީއޯގެ އެކްސްކޯ މެންބަރުންނެވެ. މިއަދުން ފެށިގެން ކިރާއި ބަޓަރާއި ޗީޒް އަދި އައިސްކްރީމް ހިމެނޭ ގޮތަށް އެ ބްރޭންޑުގެ ތަފާތު ބާވަތްތައް އެސްޓީއޯ ޕީޕަލްސް ޗޮއިސް އިން ކަސްޓަމަރުންނަށް ގަންނަން ލިބެން ފަށާނެއެވެ. އެގްޒިބިޝަންގައި ހުރި އެސްޓީއޯގެ ސްޓޯލުން އަމުލް ބޭނުންކޮށްގެން ހަދާފައިވާ ފޮނި ކާތަކެއްޗާއި އައިސްކްރީމް ވެސް ރަހަ ބެލުމަށް ލިބެން ހުންނާނެ ކަމަށް އެ ކުންފުނިން ބުނެފައިވެއެވެ.

އެގްޒިބިޝަންގައި އެސްޓީއޯ ސްޓޯލަށް ޒިޔާރަތްކުރާ ފަރާތްތަކަށް ޕްރޮމޯޝަނަލް ދެ ހަރަކާތެއް ވެސް ކުރިއަށް ގެންދެއެވެ. "ރެޖިސްޓާ އެންޑް ވިން" ގެ ނަމުގައި ހިންގާ ހަރަކާތުގައި ސްޓޯލުގައި ރަޖިސްޓަރީ ކުރާ ފަރާތްތަކުގެ ތެރެއިން ކޮންމެ ދުވަހަކު ނަސީބުވެރި ފަރާތެއް ހޮވައި އިނާމު ދިނުން ހިމެނެއެވެ. "ފޮލޯ އެންޑް ވިން" ގެ ނަމުގައި ހިންގާ ހަރަކާތުގައި އެސްޓީއޯ ޕީޕަލްސް ޗޮއިސް ޕޭޖް ފޮލޯ ކުރާ ފަރާތްތަކުގެ ތެރެއިން ނަސީބުވެރި ފަރާތަކަށް ޑިޝްވޮޝަރެއް ލިބޭނެއެވެ.

އާނަންދު މިލްކް ޔޫނިއަން ލިމިޓެޑްގެ ނަމުން ނަން ނެގޮސްފައިވާ އަމުލް އަކީ އިންޑިއާގައި ކިރުގެ އުފެއްދުންތަކަށް ޚާއްޞަ ބޮޑު ބްރޭންޑެކެވެ. ދުނިޔޭގެ ފެންވަރުގައި ވެސް އެ ބްރޭންޑު މަޝްހޫރުވެފައި އޮތީ "ދަ ޓޭސްޓް އޮފް އިންޑިއާ" ގެ ގޮތުގައެވެ. ހޮޓެލް އޭޝިއާ އެގްޒިބިޝަން ކުރިއަށް ދާނީ މި މަހުގެ 28 އިން 30 ގެ ނިޔަލަށް ހުޅުމާލެ ސިންތެޓިކް ޓްރެކްގައެވެ.