ކުނި މެނޭޖުކުރުމުގެ ޤާނޫނަށް ގެނައި އިސްލާޙު ރައީސް ތަސްދީޤުކުރައްވައިފި

ޕްލާސްޓިކް ކޮތަޅުން ނަގާ ފީއަށް ލުޔެއް ލިބޭ ގޮތަށް ކުނި މެނޭޖުކުރުމުގެ ޤާނޫނަށް އިސްލާޙު ގެނައުމުގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތަސްދީޤުކުރައްވައިފިއެވެ.

މި ބިލު ރައްޔިތުންގެ މަޖިލީހުން ފާސްކޮށްފައިވަނީ 17 އޮގަސްޓު 2026 ވީ ހޯމަ ދުވަހުއެވެ. އެ އިސްލާޙުގެ ދަށުން ވިޔަފާރި ހަރަކާތްތަކުގައި ޕޮއިންޓް އޮފް ސޭލްގައި ކަސްޓަމަރުންނަށް ފޯރުކޮށްދޭ ޕްލާސްޓިކް ކޮތަޅަކުން ދެ ރުފިޔާ ނެގުމުގެ ޤަވާޢިދު 50 ކޮތަޅަށް ވުރެ ގިނައިން ހިމެނޭ ކޮތަޅު ބޮނޑިތަކަށް ނުހިނގާ ގޮތަށް ވަނީ ކަނޑައަޅައިފައެވެ. މި ބަދަލުގެ ސަބަބުން ކުރިން ދިމާވި ޑަބަލް ޓެކްސްގެ މައްސަލައަށް ޙައްލެއް ލިބިގެންދާނެއެވެ.

ބިލުގައި އިތުރު މުހިންމު ބަދަލުތަކެއް ވެސް ހިމެނެއެވެ. އެ ގޮތުން ކުނި މެނޭޖުކުރުމުގެ ނިޒާމުތަކާއި މަރުކަޒުތައް ޤާއިމުކުރާ ގޮތާއި އެ ތަންތަނުގެ މިންގަނޑުތައް ކަނޑައެޅުމުގެ ތަފްސީލް ހިމަނައިފައިވެއެވެ. އަދި ޤާނޫނު ތަންފީޛުކުރާ ވުޒާރާއާއި ޔުޓިލިޓީ ރެގިއުލޭޓަރީ އޮތޯރިޓީ އަދި އެންވަޔަރަންމަންޓަލް ރެގިއުލޭޓަރީ އޮތޯރިޓީގެ ދައުރުތައް އިތުރަށް ސާފުކުރުމަށް ބިލުގައި އިސްލާޙު ގެނެސްފައިވެއެވެ.

ހަމައެއާއެކު ރާއްޖެއަށް ކުނި އެތެރެކުރުން މަނާކުރުމާއި އިޤްތިޞާދީ އަދި ސިނާޢީ ތަންތަނުގައި ކުނި މެނޭޖުކުރުމުގެ ސިޔާސަތު އެކުލަވައިލުމާއި ޤައުމީ މާސްޓާ ޕްލޭނާ އެއްގޮތަށް ސިޓީ ފެންވަރުގައި ކުނި މެނޭޖުކުރުން ރޭވުން ވެސް ބިލުގެ މުހިންމު ބައިތަކުގެ ތެރޭގައި ހިމެނެއެވެ.

މި ޤާނޫނު ތަސްދީޤުކުރެއްވުމާ ގުޅިގެން ޤާނޫނަށް ޢަމަލުކުރަން ފަށާ ދުވަހުން ފެށިގެން 30 ދުވަހުގެ ތެރޭގައި ކަމާ ގުޅޭ ގަވާއިދުތައް އެކުލަވައިލައި ސަރުކާރުގެ ގެޒެޓުގައި ޝާއިޢުކުރަންޖެހޭނެއެވެ. ކުނި މެނޭޖުކުރުމުގެ ޤާނޫނަކީ 2022 ވަނަ އަހަރުގެ ޑިސެމްބަރު 18 ގައި ޢަމަލުކުރަން ފެށި ޤާނޫނެކެވެ. އެ ޤާނޫނުގެ އެންމެ ބޮޑު މަޤްޞަދަކީ ދެމެހެއްޓެނިވި ގޮތެއްގައި ކުނި މެނޭޖުކޮށް ތިމާވެށްޓާއި ޢާންމު ޞިއްޙަތު ރައްކާތެރިކުރުމެވެ.