އިހްތިރާމް އަދާކުރުމުގެ ޤައުމީ މަޝްރޫޢަށް ނުވަ މެންބަރުންގެ ވިލަރެސް ކޮމިޓީއެއް އެކުލަވާލައިފި

ރައީސުލްޖުމްހޫރިއްޔާގެ ރިޔާސީ ވަޢުދުފުޅެއް ކަމަށްވާ އިހްތިރާމް އަދާކުރުމުގެ ޤައުމީ މަޝްރޫޢު ވިލަރެސްކުރުމަށް ޚާއްޞަ ކޮމިޓީއެއް އެކުލަވާލައި، އެ ކޮމިޓީގެ ފުރަތަމަ ބައްދަލުވުން މިއަދު ފަންނާއި ސަގާފަތާއި ތަރިކައާ ބެހޭ ވުޒާރާގައި ބާއްވައިފިއެވެ.

ސަރުކާރުގެ މުހިންމު ވުޒާރާތަކާއި މީޑިއާގެ އިސް ފަރާތްތައް ހިމެނޭ ގޮތަށް ޖުމްލަ ނުވަ މެންބަރުންގެ މައްޗަށް އެކުލެވޭ މި ކޮމިޓީގައި ފަންނާއި ސަގާފަތާއި ތަރިކައާ ބެހޭ ވުޒާރާ، ދާޚިލީ ސަލާމަތާ ބެހޭ ވުޒާރާ، ދިފާޢީ ވުޒާރާ، ތަޢުލީމާ ބެހޭ ވުޒާރާ، މާލީ ވުޒާރާ، ޞިއްޙަތާ ބެހޭ ވުޒާރާ، އިސްލާމީ ކަންތައްތަކާ ބެހޭ ވުޒާރާ، ޒުވާނުން ބާރުވެރިކުރުވުމާ ބެހޭ ވުޒާރާ އަދި ޕަބްލިކް ސާވިސް މީޑިއާ (ޕީއެސްއެމް) ހިމެނެއެވެ.

މިއަދުގެ ބައްދަލުވުމުގައި މި މަޝްރޫޢު ކުރިއަށް ގެންދިޔުމަށް ރޭވިފައިވާ ގޮތްތަކާއި ކޮމިޓީން އަދާކުރާނެ ދައުރާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފައިވެއެވެ. އޭގެ އިތުރުން މަޝްރޫޢު ފުރިހަމައަށް ހިންގުމަށް އަޅަންޖެހޭ ފިޔަވަޅުތަކާއި ކަމާ ގުޅޭ އިދާރާތައް ގުޅިގެން މަސައްކަތް ރޭވުމާ ބެހޭ ގޮތުންވެސް ޚިޔާލު ބަދަލުކޮށްފައިވެއެވެ.

މިއީ ރައީސުލްޖުމްހޫރިއްޔާ ވަރަށް ޚާއްޞަ އިސްކަމެއް ދެއްވައިގެން ކުރިއަށް ގެންދަވާ ޤައުމީ މަޝްރޫޢެއް ކަމަށް ވުޒާރާއިން ބުނެފައިވާ އިރު، މި ކެމްޕެއިން ރަސްމީކޮށް ފެށުމަށް ވާންޖެހޭ އެންމެ ފަހުގެ ތައްޔާރީތައް އެ ވުޒާރާއިން ދަނީ ކުރަމުންނެވެ.