ބީއެމްއެލް އޭޓީއެމުން މަހެއްގެ މައްޗަށް ނެގޭ ޑޮލަރުގެ ޢަދަދު 3500 އަށް ހިފަހައްޓައިފި

ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް މެދުވެރިކޮށް ކޮންމެ މަހަކު ނަގުދު ޑޮލަރުގެ ގޮތުގައި ނެގޭ އެންމެ ގިނަ މިންވަރަކީ 3500 ޑޮލަރު ކަމަށް މިއަދު ކަނޑައަޅައިފިއެވެ.

އޭޓީއެމުން ނެގޭ ޑޮލަރުގެ ޢަދަދު މަހެއްގެ މައްޗަށް ވަކި މިންވަރެއްގައި ހިފެހެއްޓި މިއީ ފުރަތަމަ ފަހަރެވެ. ނަމަވެސް ކާޑަކުން ދުވާލެއްގެ މައްޗަށް 1600 ޑޮލަރު ނެގޭ ގޮތް ކުރިއެކޭ އެއްގޮތަށް ދެމި އޮންނާނެ ކަމަށް އެ ބޭންކުން ބުނެފައިވެއެވެ.

ޑިޖިޓަލް ބޭންކިން ޚިދުމަތް ފުޅާކުރުމުގެ ގޮތުން ގެނައި މި ބަދަލާ ގުޅޭ ގޮތުން ބީއެމްއެލް އިން ބުނެފައިވަނީ "މި ނިންމުމަކީ ނަގުދު ފައިސާއަށް ބަރޯސާވާ މިންވަރު ކުޑަކޮށް އަވަސް ރައްކާތެރި އަދި ލުއިފަސޭހަ ޑިޖިޓަލް މާލީނިޒާމެއް ކުރިއެރުވުމަށް ބީއެމްއެލް އިން ގެންގުޅޭ ދުރުރާސްތާގެ ސިޔާސަތުގެ ދަށުން ނިންމާފައިވާ ނިންމުމެކެވެ" ކަމަށެވެ.

ނަގުދު ފައިސާ ބޭނުންނުކޮށް ދެވޭ ޚިދުމަތްތައް ކުރިއެރުވުމަށް ބޮޑެތި އިންވެސްޓްމަންޓުތައް ކޮށްފައިވާ ކަމަށް އެ ބޭންކުން ފާހަގަކޮށްފައިވެއެވެ. އެ ގޮތުން މޮބައިލް ބޭންކިންނާއި އިންޓަނެޓް ބޭންކިން މެދުވެރިކޮށް ކޮންމެ ތަނެއްގައި ހުރެގެން ވެސް ވަގުތުން ފައިސާ ފޮނުވުމާއި ބިލް ދެއްކުން ފަދަ ޚިދުމަތްތައް ހިމެނެއެވެ. އޭގެ އިތުރުން ރާއްޖެ އާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމުގެ ޚިދުމަތް ވެސް ކަސްޓަމަރުންނަށް ލިބޭ ކަމަށް އެ ބޭންކުން ބުނެފައިވެއެވެ.

ޑިޖިޓަލް ވަސީލަތްތައް މެދުވެރިކޮށް މާލީ މުޢާމަލާތްތައް ކުރުމަށް ކަސްޓަމަރުން އަހުލުވެރިކުރުވުމުގެ މަޤުޞަދުގައި ބީއެމްއެލް އިން ގެންނަ ބަދަލުތަކުގެ ތެރެއިން ބަދަލެއް ކަމަށް އެ ބޭންކުން ބުނެފައިވެއެވެ.